No More Learning

For than this boy-knave so boldely
Ne sholde not have be hardy, 3850
[Ne] in this verger had such game,
Which now me turneth to gret shame. '
Bialacoil nist what to sey;
Ful fayn he wolde have fled awey,
For fere han hid, nere that he 3855
Al sodeynly took him with me.
And whan I saugh he hadde so,
This Ielousye, take us two,
I was astoned, and knew no rede,
But fledde awey for verrey drede. 3860
Than Shame cam forth ful simply;
She wende have trespaced ful gretly;
Humble of hir port, and made it simple,
Wering a vayle in stede of wimple,
As nonnis doon in hir abbey. 3865
Bicause hir herte was in affray,
She gan to speke, within a throwe,
To Ielousye, right wonder lowe.
First of his grace she bisought,
And seide:--'Sire, ne leveth nought 3870
Wikkid-Tunge, that fals espye,
Which is so glad to feyne and lye.
He hath you maad, thurgh flatering,
On Bialacoil a fals lesing.
His falsnesse is not now anew, 3875
It is to long that he him knew.
This is not the firste day;
For Wikkid-Tunge hath custom ay
Yonge folkis to bewreye,
And false lesinges on hem leye. 3880
'Yit nevertheles I see among,
That the loigne it is so longe
Of Bialacoil, hertis to lure,
In Loves servise for to endure,
Drawing suche folk him to, 3885
That he had no-thing with to do;
But in sothnesse I trowe nought,
That Bialacoil hadde ever in thought
To do trespace or vilanye;
But, for his modir Curtesye 3890
Hath taught him ever [for] to be
Good of aqueyntaunce and privee;
For he loveth non hevinesse,
But mirthe and pley, and al gladnesse;
He hateth alle [trecherous], 3895
Soleyn folk and envious;
For [wel] ye witen how that he
Wol ever glad and Ioyful be
Honestly with folk to pley.
I have be negligent, in good fey, 3900
To chastise him; therfore now I
Of herte crye you here mercy,
That I have been so recheles
To tamen him, withouten lees.
Of my foly I me repente; 3905
Now wol I hool sette myn entente
To kepe, bothe [loude] and stille,
Bialacoil to do your wille. '
'Shame, Shame,' seyde Ielousy,
'To be bitrasshed gret drede have I. 3910
Lecherye hath clombe so hye,
That almost blered is myn ye;
No wonder is, if that drede have I.
Over-al regnith Lechery,
Whos might [yit] growith night and day. 3915
Bothe in cloistre and in abbey
Chastite is werreyed over-al.
Therfore I wol with siker wal
Close bothe roses and roser.
I have to longe in this maner 3920
Left hem unclosid wilfully;
Wherfore I am right inwardly
Sorowful and repente me.
But now they shal no lenger be
Unclosid; and yit I drede sore, 3925
I shal repente ferthermore,
For the game goth al amis.
Counsel I [mot take] newe, y-wis.
I have to longe tristed thee,
But now it shal no lenger be; 3930
For he may best, in every cost,
Disceyve, that men tristen most.
I see wel that I am nygh shent,
But-if I sette my ful entent
Remedye to purveye. 3935
Therfore close I shal the weye
Fro hem that wol the rose espye,
And come to wayte me vilanye,
For, in good feith and in trouthe,
I wol not lette, for no slouthe, 3940
To live the more in sikirnesse,
[To] make anoon a forteresse,
[To enclose] the roses of good savour.
In middis shal I make a tour
To putte Bialacoil in prisoun, 3945
For ever I drede me of tresoun.
I trowe I shal him kepe so,
That he shal have no might to go
Aboute to make companye
To hem that thenke of vilanye; 3950
Ne to no such as hath ben here
Aforn, and founde in him good chere,
Which han assailed him to shende,
And with hir trowandyse to blende.
A fool is eyth [for] to bigyle; 3955
But may I lyve a litel while,
He shal forthenke his fair semblaunt. '
And with that word cam Drede avaunt,
Which was abasshed, and in gret fere,
Whan he wiste Ielousye was there. 3960
He was for drede in such affray,
That not a word durste he say,
But quaking stood ful stille aloon,
Til Ielousye his wey was goon,
Save Shame, that him not forsook; 3965
Bothe Drede and she ful sore quook;
[Til] that at laste Drede abreyde,
And to his cosin Shame seyde:
Shame,' he seide, 'in sothfastnesse,
To me it is gret hevinesse, 3970
That the noyse so fer is go,
And the sclaundre of us two.
But sith that it is [so] bifalle,
We may it not ageyn [do] calle,
Whan onis sprongen is a fame. 3975
For many a yeer withouten blame
We han been, and many a day;
For many an April and many a May
We han [y]-passed, not [a]shamed,
Til Ielousye hath us blamed 3980
Of mistrust and suspecioun
Causeles, withouten enchesoun.
Go we to Daunger hastily,
And late us shewe him openly,
That he hath not aright [y]-wrought, 3985
Whan that he sette nought his thought
To kepe better the purpryse;
In his doing he is not wyse.
He hath to us [y]-do gret wrong,
That hath suffred now so long 3990
Bialacoil to have his wille,
Alle his lustes to fulfille.
He must amende it utterly,
Or ellis shal he vilaynsly
Exyled be out of this londe; 3995
For he the werre may not withstonde
Of Ielousye, nor the greef,
Sith Bialacoil is at mischeef. '
To Daunger, Shame and Drede anoon
The righte wey ben [bothe a]-goon. 4000
The cherl they founden hem aforn
Ligging undir an hawethorn.
Undir his heed no pilowe was,
But in the stede a trusse of gras.
He slombred, and a nappe he took, 4005
Til Shame pitously him shook,
And greet manace on him gan make.
Why slepist thou whan thou shulde wake? '
Quod Shame; 'thou dost us vilanye!
Who tristith thee, he doth folye, 4010
To kepe roses or botouns,
Whan they ben faire in hir sesouns.
Thou art woxe to familiere
Where thou shulde be straunge of chere,
Stout of thy port, redy to greve. 4015
Thou dost gret foly for to leve
Bialacoil here-in, to calle
The yonder man to shenden us alle.
Though that thou slepe, we may here
Of Ielousie gret noyse here. 4020
Art thou now late? ryse up [in hy],
And stoppe sone and deliverly
Alle the gappis of the hay;
Do no favour, I thee pray.
It fallith no-thing to thy name 4025
Make fair semblaunt, where thou maist blame.
'If Bialacoil be swete and free,
Dogged and fel thou shuldist be;
Froward and outrageous, y-wis;
A cherl chaungeth that curteis is. 4030
This have I herd ofte in seying,
That man [ne] may, for no daunting,
Make a sperhauke of a bosarde.
Alle men wole holde thee for musarde,
That debonair have founden thee, 4035
It sit thee nought curteis to be;
To do men plesaunce or servyse,
In thee it is recreaundyse.
Let thy werkis, fer and nere,
Be lyke thy name, which is Daungere. ' 4040
Than, al abawid in shewing,
Anoon spak Dreed, right thus seying,
And seide, 'Daunger, I drede me
That thou ne wolt [not] bisy be
To kepe that thou hast to kepe; 4045
Whan thou shuldist wake, thou art aslepe.
Thou shalt be greved certeynly,
If thee aspye Ielousy,
Or if he finde thee in blame.
He hath to-day assailed Shame, 4050
And chased awey, with gret manace,
Bialacoil out of this place,
And swereth shortly that he shal
Enclose him in a sturdy wal;
And al is for thy wikkednesse, 4055
For that thee faileth straungenesse.
Thyn herte, I trowe, be failed al;
Thou shalt repente in special,
If Ielousye the sothe knewe;
Thou shalt forthenke, and sore rewe. ' 4060
With that the cherl his clubbe gan shake,
Frouning his eyen gan to make,
And hidous chere; as man in rage,
For ire he brente in his visage.
Whan that he herde him blamed so, 4065
He seide, 'Out of my wit I go;
To be discomfit I have gret wrong.
Certis, I have now lived to long,
Sith I may not this closer kepe;
Al quik I wolde be dolven depe, 4070
If any man shal more repeire
Into this garden, for foule or faire.
Myn herte for ire goth a-fere,
That I lete any entre here.
I have do foly, now I see, 4075
But now it shal amended bee.
Who settith foot here any more,
Truly, he shal repente it sore;
For no man mo into this place
Of me to entre shal have grace. 4080
Lever I hadde, with swerdis tweyne,
Thurgh-out myn herte, in every veyne
Perced to be, with many a wounde,
Than slouthe shulde in me be founde.
From hennesforth, by night or day, 4085
I shal defende it, if I may,
Withouten any excepcioun
Of ech maner condicioun;
And if I any man it graunte,
Holdeth me for recreaunte. ' 4090
Than Daunger on his feet gan stonde,
And hente a burdoun in his honde.
Wroth in his ire, ne lefte he nought,
But thurgh the verger he hath sought.
If he might finde hole or trace, 4095
Wher-thurgh that men mot forth-by pace,
Or any gappe, he dide it close,
That no man mighte touche a rose
Of the roser al aboute;
He shitteth every man withoute. 4100
Thus day by day Daunger is wers,
More wondirful and more divers,
And feller eek than ever he was;
For him ful oft I singe 'allas! '
For I ne may nought, thurgh his ire, 4105
Recover that I most desire.
Myn herte, allas, wol brest a-two,
For Bialacoil I wratthed so.
For certeynly, in every membre
I quake, whan I me remembre 4110
Of the botoun, which [that] I wolde
Fulle ofte a day seen and biholde.
And whan I thenke upon the kisse,
And how muche Ioye and blisse
I hadde thurgh the savour swete, 4115
For wante of it I grone and grete.
Me thenkith I fele yit in my nose
The swete savour of the rose.
And now I woot that I mot go
So fer the fresshe floures fro, 4120
To me ful welcome were the deeth;
Absens therof, allas, me sleeth!
For whylom with this rose, allas,
I touched nose, mouth, and face;
But now the deeth I must abyde. 4125
But Love consente, another tyde,
That onis I touche may and kisse,
I trowe my peyne shal never lisse.
Theron is al my coveityse,
Which brent myn herte in many wyse. 4130
Now shal repaire agayn sighinge,
Long wacche on nightis, and no slepinge;
Thought in wisshing, torment, and wo,
With many a turning to and fro,
That half my peyne I can not telle. 4135
For I am fallen into helle
From paradys and welthe, the more
My turment greveth; more and more
Anoyeth now the bittirnesse,
That I toforn have felt swetnesse. 4140
And Wikkid-Tunge, thurgh his falshede,
Causeth al my wo and drede.
On me he leyeth a pitous charge,
Bicause his tunge was to large.
Now it is tyme, shortly that I 4145
Telle you som-thing of Ielousy,
That was in gret suspecioun.
Aboute him lefte he no masoun,
That stoon coude leye, ne querrour;
He hired hem to make a tour. 4150
And first, the roses for to kepe,
Aboute hem made he a diche depe,
Right wondir large, and also brood;
Upon the whiche also stood
Of squared stoon a sturdy wal, 4155
Which on a cragge was founded al,
And right gret thikkenesse eek it bar.
Abouten, it was founded squar,
An hundred fadome on every syde,
It was al liche longe and wyde. 4160
Lest any tyme it were assayled,
Ful wel aboute it was batayled;
And rounde enviroun eek were set
Ful many a riche and fair touret.
At every corner of this wal 4165
Was set a tour ful principal;
And everich hadde, withoute fable,
A porte-colys defensable
To kepe of enemies, and to greve,
That there hir force wolde preve. 4170
And eek amidde this purpryse
Was maad a tour of gret maistryse;
A fairer saugh no man with sight,
Large and wyde, and of gret might.
They [ne] dredde noon assaut 4175
Of ginne, gunne, nor skaffaut.
[For] the temprure of the mortere
Was maad of licour wonder dere;
Of quikke lyme persant and egre,
The which was tempred with vinegre. 4180
The stoon was hard [as] ademant,
Wherof they made the foundement.
The tour was rounde, maad in compas;
In al this world no richer was,
Ne better ordeigned therwithal. 4185
Aboute the tour was maad a wal,
So that, bitwixt that and the tour,
Rosers were set of swete savour,
With many roses that they bere.
And eek within the castel were 4190
Springoldes, gunnes, bows, archers;
And eek above, atte corners,
Men seyn over the walle stonde
Grete engynes, [whiche] were nigh honde;
And in the kernels, here and there, 4195
Of arblasters gret plentee were.
Noon armure might hir stroke withstonde,
It were foly to prece to honde.
Without the diche were listes made,
With walles batayled large and brade, 4200
For men and hors shulde not atteyne
To neigh the diche over the pleyne.
Thus Ielousye hath enviroun
Set aboute his garnisoun
With walles rounde, and diche depe, 4205
Only the roser for to kepe.
And Daunger [eek], erly and late
The keyes kepte of the utter gate,
The which openeth toward the eest.
And he hadde with him atte leest 4210
Thritty servauntes, echon by name.
That other gate kepte Shame,
Which openede, as it was couth,
Toward the parte of the south.
Sergeauntes assigned were hir to 4215
Ful many, hir wille for to do.
Than Drede hadde in hir baillye
The keping of the conestablerye,
Toward the north, I undirstonde,
That opened upon the left honde, 4220
The which for no-thing may be sure,
But-if she do [hir] bisy cure
Erly on morowe and also late,
Strongly to shette and barre the gate.
Of every thing that she may see 4225
Drede is aferd, wher-so she be;
For with a puff of litel winde
Drede is astonied in hir minde.
Therfore, for stelinge of the rose,
I rede hir nought the yate unclose. 4230
A foulis flight wol make hir flee,
And eek a shadowe, if she it see.
Thanne Wikked-Tunge, ful of envye,
With soudiours of Normandye,
As he that causeth al the bate, 4235
Was keper of the fourthe gate,
And also to the tother three
He went ful ofte, for to see.
Whan his lot was to wake a-night,
His instrumentis wolde he dight, 4240
For to blowe and make soun,
Ofter than he hath enchesoun;
And walken oft upon the wal,
Corners and wikettis over-al
Ful narwe serchen and espye; 4245
Though he nought fond, yit wolde he lye.
Discordaunt ever fro armonye,
And distoned from melodye,
Controve he wolde, and foule fayle,
With hornpypes of Cornewayle. 4250
In floytes made he discordaunce,
And in his musik, with mischaunce,
He wolde seyn, with notes newe,
That he [ne] fond no womman trewe,
Ne that he saugh never, in his lyf, 4255
Unto hir husbonde a trewe wyf;
Ne noon so ful of honestee,
That she nil laughe and mery be
Whan that she hereth, or may espye,
A man speken of lecherye. 4260
Everich of hem hath somme vyce;
Oon is dishonest, another is nyce;
If oon be ful of vilanye,
Another hath a likerous ye;
If oon be ful of wantonesse, 4265
Another is a chideresse.
Thus Wikked-Tunge (god yeve him shame! )
Can putte hem everichone in blame
Withoute desert and causeles;
He lyeth, though they been giltles. 4270
I have pite to seen the sorwe,
That waketh bothe eve and morwe,
To innocents doth such grevaunce;
I pray god yeve him evel chaunce,
That he ever so bisy is 4275
Of any womman to seyn amis!
Eek Ielousye god confounde,
That hath [y]-maad a tour so rounde,
And made aboute a garisoun
To sette Bialacoil in prisoun; 4280
The which is shet there in the tour,
Ful longe to holde there soiour,
There for to liven in penaunce.
And for to do him more grevaunce,
[Ther] hath ordeyned Ielousye 4285
An olde vekke, for to espye
The maner of his governaunce;
The whiche devel, in hir enfaunce,
Had lerned [muche] of Loves art,
And of his pleyes took hir part; 4290
She was [expert] in his servyse.
She knew ech wrenche and every gyse
Of love, and every [loveres] wyle,
It was [the] harder hir to gyle.
Of Bialacoil she took ay hede, 4295
That ever he liveth in wo and drede.
He kepte him coy and eek privee,
Lest in him she hadde see
Any foly countenaunce,
For she knew al the olde daunce. 4300
And aftir this, whan Ielousye
Had Bialacoil in his baillye,
And shette him up that was so free,
For seure of him he wolde be,
He trusteth sore in his castel; 4305
The stronge werk him lyketh wel.
He dradde nat that no glotouns
Shulde stele his roses or botouns.
The roses weren assured alle,
Defenced with the stronge walle. 4310
Now Ielousye ful wel may be
Of drede devoid, in libertee,
Whether that he slepe or wake;
For of his roses may noon be take.
But I, allas, now morne shal; 4315
Bicause I was without the wal,
Ful moche dole and mone I made.
Who hadde wist what wo I hadde,
I trowe he wolde have had pitee.
Love to deere had sold to me 4320
The good that of his love hadde I.
I [wende a bought] it al queyntly;
But now, thurgh doubling of my peyn,
I see he wolde it selle ageyn,
And me a newe bargeyn lere, 4325
The which al-out the more is dere,
For the solace that I have lorn,
Than I hadde it never aforn.
Certayn I am ful lyk, indeed,
To him that cast in erthe his seed; 4330
And hath Ioie of the newe spring,
Whan it greneth in the ginning,
And is also fair and fresh of flour,
Lusty to seen, swote of odour;
But er he it in sheves shere, 4335
May falle a weder that shal it dere,
And maken it to fade and falle,
The stalk, the greyn, and floures alle;
That to the tilier is fordone
The hope that he hadde to sone. 4340
I drede, certeyn, that so fare I;
For hope and travaile sikerly
Ben me biraft al with a storm;
The floure nil seden of my corn.
For Love hath so avaunced me, 4345
Whan I bigan my privitee
To Bialacoil al for to telle,
Whom I ne fond froward ne felle,
But took a-gree al hool my play.
But Love is of so hard assay, 4350
That al at onis he reved me,
Whan I wend best aboven have be.
It is of Love, as of Fortune,
That chaungeth ofte, and nil contune;
Which whylom wol on folke smyle, 4355
And gloumbe on hem another whyle;
Now freend, now foo, [thou] shalt hir fele,
For [in] a twinkling tourneth hir wheel.
She can wrythe hir heed awey,
This is the concours of hir pley; 4360
She can areyse that doth morne,
And whirle adown, and overturne
Who sittith hieghst, [al] as hir list;
A fool is he that wol hir trist.
For it [am] I that am com doun 4365
Thurgh change and revolucioun!
Sith Bialacoil mot fro me twinne,
Shet in the prisoun yond withinne,
His absence at myn herte I fele;
For al my Ioye and al myn hele 4370
Was in him and in the rose,
That but yon [wal], which him doth close,
Open, that I may him see,
Love nil not that I cured be
Of the peynes that I endure, 4375
Nor of my cruel aventure.
A, Bialacoil, myn owne dere!
Though thou be now a prisonere,
Kepe atte leste thyn herte to me,
And suffre not that it daunted be; 4380
Ne lat not Ielousye, in his rage,
Putten thyn herte in no servage.
Although he chastice thee withoute,
And make thy body unto him loute,
Have herte as hard as dyamaunt, 4385
Stedefast, and nought pliaunt;
In prisoun though thy body be,
At large kepe thyn herte free.
A trewe herte wol not plye
For no manace that it may drye. 4390
If Ielousye doth thee payne,
Quyte him his whyle thus agayne,
To venge thee, atte leest in thought,
If other way thou mayest nought;
And in this wyse sotilly 4395
Worche, and winne the maistry.
But yit I am in gret affray
Lest thou do not as I say;
I drede thou canst me greet maugree,
That thou emprisoned art for me; 4400
But that [is] not for my trespas,
For thurgh me never discovered was
Yit thing that oughte be secree.
Wel more anoy [ther] is in me,
Than is in thee, of this mischaunce; 4405
For I endure more hard penaunce
Than any [man] can seyn or thinke,
That for the sorwe almost I sinke.
Whan I remembre me of my wo,
Ful nygh out of my wit I go. 4410
Inward myn herte I fele blede,
For comfortles the deeth I drede.
Ow I not wel to have distresse,
Whan false, thurgh hir wikkednesse,
And traitours, that arn envyous, 4415
To noyen me be so coragious?
A, Bialacoil! ful wel I see,
That they hem shape to disceyve thee,
To make thee buxom to hir lawe,
And with hir corde thee to drawe 4420
Wher-so hem lust, right at hir wil;
I drede they have thee brought thertil.
Withoute comfort, thought me sleeth;
This game wol bringe me to my deeth.
For if your gode wille I lese, 4425
I mote be deed; I may not chese.
And if that thou foryete me,
Myn herte shal never in lyking be;
Nor elles-where finde solace,
If I be put out of your grace, 4430
As it shal never been, I hope;
Than shulde I fallen in wanhope.

[_Here, at_ l. 4070 _of the_ French text, _ends the work of_ G. de Lorris;
_and begins the work of_ Jean de Meun. ]

Allas, in wanhope? --nay, pardee!
For I wol never dispeired be.
If Hope me faile, than am I 4435
Ungracious and unworthy;
In Hope I wol comforted be,
For Love, whan he bitaught hir me,
Seide, that Hope, wher-so I go,
Shulde ay be relees to my wo. 4440
But what and she my balis bete,
And be to me curteis and swete?
She is in no-thing ful certeyn.
Lovers she put in ful gret peyn,
And makith hem with wo to dele. 4445
Hir fair biheest disceyveth fele,
For she wol bihote, sikirly,
And failen aftir outrely.
A! that is a ful noyous thing!
For many a lover, in loving, 4450
Hangeth upon hir, and trusteth fast,
Whiche lese hir travel at the last.
Of thing to comen she woot right nought;
Therfore, if it be wysly sought,
Hir counseille, foly is to take. 4455
For many tymes, whan she wol make
A ful good silogisme, I drede
That aftirward ther shal in dede
Folwe an evel conclusioun;
This put me in confusioun. 4460
For many tymes I have it seen,
That many have bigyled been,
For trust that they have set in Hope,
Which fel hem aftirward a-slope.
But natheles yit, gladly she wolde, 4465
That he, that wol him with hir holde,
Hadde alle tymes [his] purpos clere,
Withoute deceyte, or any were.
That she desireth sikirly;
Whan I hir blamed, I did foly. 4470
But what avayleth hir good wille,
Whan she ne may staunche my stounde ille?
That helpith litel, that she may do,
Outake biheest unto my wo.
And heeste certeyn, in no wyse, 4475
Withoute yift, is not to pryse.
Whan heest and deed a-sundir varie,
They doon [me have] a gret contrarie.
Thus am I possed up and doun
With dool, thought, and confusioun; 4480
Of my disese ther is no noumbre.
Daunger and Shame me encumbre,
Drede also, and Ielousye,
And Wikked-Tunge, ful of envye,
Of whiche the sharpe and cruel ire 4485
Ful oft me put in gret martire.
They han my Ioye fully let,
Sith Bialacoil they have bishet
Fro me in prisoun wikkidly,
Whom I love so entierly, 4490
That it wol my bane be,
But I the soner may him see.
And yit moreover, wurst of alle,
Ther is set to kepe, foule hir bifalle!
A rimpled vekke, fer ronne in age, 4495
Frowning and yelowe in hir visage,
Which in awayte lyth day and night,
That noon of hem may have a sight.
Now moot my sorwe enforced be;
Ful soth it is, that Love yaf me 4500
Three wonder yiftes of his grace,
Which I have lorn now in this place,
Sith they ne may, withoute drede
Helpen but litel, who taketh hede.
For here availeth no Swete-Thought, 4505
And Swete-Speche helpith right nought.
The thridde was called Swete-Loking,
That now is lorn, without lesing.
[The] yiftes were fair, but not forthy
They helpe me but simply, 4510
But Bialacoil [may] loosed be,
To gon at large and to be free.
For him my lyf lyth al in dout,
But-if he come the rather out.
Allas! I trowe it wol not been! 4515
For how shuld I evermore him seen?
He may not out, and that is wrong,
Bicause the tour is so strong.
How shulde he out? by whos prowesse,
Out of so strong a forteresse? 4520
By me, certeyn, it nil be do;
God woot, I have no wit therto!
But wel I woot I was in rage,
Whan I to Love dide homage.
Who was in cause, in sothfastnesse, 4525
But hir-silf, dame Idelnesse,
Which me conveyed, thurgh fair prayere,
To entre into that fair vergere?
She was to blame me to leve,
The which now doth me sore greve. 4530
A foolis word is nought to trowe,
Ne worth an appel for to lowe;
Men shulde him snibbe bittirly,
At pryme temps of his foly.
I was a fool, and she me leved, 4535
Thurgh whom I am right nought releved.
She accomplisshed al my wil,
That now me greveth wondir il.
Resoun me seide what shulde falle.
A fool my-silf I may wel calle, 4540
That love asyde I had not leyde,
And trowed that dame Resoun seyde.
Resoun had bothe skile and right.
Whan she me blamed, with al hir might,
To medle of love, that hath me shent; 4545
But certeyn now I wol repent.
'And shulde I repent? Nay, parde!
A fals traitour than shulde I be.
The develles engins wolde me take,
If I my [lorde] wolde forsake, 4550
Or Bialacoil falsly bitraye.
Shulde I at mischeef hate him? nay,
Sith he now, for his curtesye,
Is in prisoun of Ielousye.
Curtesye certeyn dide he me, 4555
So muche, it may not yolden be,
Whan he the hay passen me lete,
To kisse the rose, faire and swete;
Shulde I therfore cunne him maugree?
Nay, certeynly, it shal not be; 4560
For Love shal never, [if god wil],
Here of me, thurgh word or wil,
Offence or complaynt, more or lesse,
Neither of Hope nor Idilnesse;
For certis, it were wrong that I 4565
Hated hem for hir curtesye.
Ther is not ellis, but suffre and thinke,
And waken whan I shulde winke;
Abyde in hope, til Love, thurgh chaunce,
Sende me socour or allegeaunce, 4570
Expectant ay til I may mete
To geten mercy of that swete.
'Whylom I thinke how Love to me
Seyde he wolde taken atte gree
My servise, if unpacience 4575
Caused me to doon offence.
He seyde, "In thank I shal it take,
And high maister eek thee make,
If wikkednesse ne reve it thee;
But sone, I trowe, that shal not be. " 4580
These were his wordis by and by;
It semed he loved me trewly.
Now is ther not but serve him wele,
If that I thinke his thank to fele.
My good, myn harm, lyth hool in me; 4585
In Love may no defaute be;
For trewe Love ne failid never man.
Sothly, the faute mot nedis than
(As God forbede! ) be founde in me,
And how it cometh, I can not see. 4590
Now lat it goon as it may go;
Whether Love wol socoure me or slo,
He may do hool on me his wil.
I am so sore bounde him til,
From his servyse I may not fleen; 4595
For lyf and deth, withouten wene,
Is in his hand; I may not chese;
He may me do bothe winne and lese.
And sith so sore he doth me greve,
Yit, if my lust he wolde acheve 4600
To Bialacoil goodly to be,
I yeve no force what felle on me.
For though I dye, as I mot nede,
I praye Love, of his goodlihede,
To Bialacoil do gentilnesse, 4605
For whom I live in such distresse,
That I mote deyen for penaunce.
But first, withoute repentaunce,
I wol me confesse in good entent,
And make in haste my testament, 4610
As lovers doon that felen smerte:--
To Bialacoil leve I myn herte
Al hool, withoute departing,
Or doublenesse of repenting. '

COMENT RAISOUN VIENT A L'AMANT.

Thus as I made my passage 4615
In compleynt, and in cruel rage,
And I not wher to finde a leche
That couthe unto myn helping eche,
Sodeynly agayn comen doun
Out of hir tour I saugh Resoun, 4620
Discrete and wys, and ful plesaunt,
And of hir porte ful avenaunt.
The righte wey she took to me,
Which stood in greet perplexite,
That was posshed in every side, 4625
That I nist where I might abyde,
Til she, demurely sad of chere,
Seide to me as she com nere:--
'Myn owne freend, art thou yit greved?
How is this quarel yit acheved 4630
Of Loves syde? Anoon me telle;
Hast thou not yit of love thy fille?
Art thou not wery of thy servyse
That thee hath [pyned] in sich wyse?
What Ioye hast thou in thy loving? 4635
Is it swete or bitter thing?
Canst thou yit chese, lat me see,
What best thy socour mighte be?
'Thou servest a ful noble lord,
That maketh thee thral for thy reward, 4640
Which ay renewith thy turment,
With foly so he hath thee blent.
Thou felle in mischeef thilke day,
Whan thou didest, the sothe to say,
Obeysaunce and eek homage; 4645
Thou wroughtest no-thing as the sage.
Whan thou bicam his liege man,
Thou didist a gret foly than;
Thou wistest not what fel therto,
With what lord thou haddist to do. 4650
If thou haddist him wel knowe,
Thou haddist nought be brought so lowe;
For if thou wistest what it were,
Thou noldist serve him half a yeer,
Not a weke, nor half a day, 4655
Ne yit an hour withoute delay,
Ne never [han] loved paramours,
His lordship is so ful of shoures.
Knowest him ought? '
_L'Amaunt. _ 'Ye, dame, parde! '
_Raisoun. _ 'Nay, nay. '
_L'Amaunt. _ 'Yes, I. '
_Raisoun. _ 'Wherof, lat see? ' 4660
_L'Amaunt. _ 'Of that he seyde I shulde be
Glad to have sich lord as he,
And maister of sich seignory. '
_Raisoun. _ 'Knowist him no more? '
_L'Amaunt. _ 'Nay, certis, I,
Save that he yaf me rewles there, 4665
And wente his wey, I niste where,
And I abood bounde in balaunce. '
_Raisoun. _ 'Lo, there a noble conisaunce!
But I wil that thou knowe him now
Ginning and ende, sith that thou 4670
Art so anguisshous and mate,
Disfigured out of astate;
Ther may no wrecche have more of wo,
Ne caitif noon enduren so.
It were to every man sitting 4675
Of his lord have knowleching.
For if thou knewe him, out of dout,
Lightly thou shulde escapen out
Of the prisoun that marreth thee. '
_L'Amaunt. _ 'Ye, dame! sith my lord is he, 4680
And I his man, maad with myn honde,
I wolde right fayn undirstonde
To knowen of what kinde he be,
If any wolde enferme me. '
_Raisoun. _ 'I wolde,' seid Resoun, 'thee lere, 4685
Sith thou to lerne hast sich desire,
And shewe thee, withouten fable,
A thing that is not demonstrable.
Thou shalt [here lerne] without science,
And knowe, withoute experience, 4690
The thing that may not knowen be,
Ne wist ne shewid in no degree.
Thou mayst the sothe of it not witen,
Though in thee it were writen.
Thou shalt not knowe therof more 4695
Whyle thou art reuled by his lore;
But unto him that love wol flee,
The knotte may unclosed be,
Which hath to thee, as it is founde,
So long be knet and not unbounde. 4700
Now sette wel thyn entencioun,
To here of love discripcioun.
'Love, it is an hateful pees,
A free acquitaunce, without relees,
[A trouthe], fret full of falshede, 4705
A sikernesse, al set in drede;
In herte is a dispeiring hope,
And fulle of hope, it is wanhope;
Wyse woodnesse, and wood resoun,
A swete peril, in to droune, 4710
An hevy birthen, light to bere,
A wikked wawe awey to were.
It is Caribdis perilous,
Disagreable and gracious.
It is discordaunce that can accorde, 4715
And accordaunce to discorde.
It is cunning withoute science,
Wisdom withoute sapience,
Wit withoute discrecioun,
Havoir, withoute possessioun. 4720
It is sike hele and hool siknesse,
A thrust drowned [in] dronkenesse,
An helthe ful of maladye,
And charitee ful of envye,
An [hunger] ful of habundaunce, 4725
And a gredy suffisaunce;
Delyt right ful of hevinesse,
And drerihed ful of gladnesse;
Bitter swetnesse and swete errour,
Right evel savoured good savour; 4730
Sinne that pardoun hath withinne,
And pardoun spotted without [with] sinne;
A peyne also it is, Ioyous,
And felonye right pitous;
Also pley that selde is stable, 4735
And stedefast [stat], right mevable;
A strengthe, weyked to stonde upright,
And feblenesse, ful of might;
Wit unavysed, sage folye,
And Ioye ful of turmentrye; 4740
A laughter it is, weping ay,
Rest, that traveyleth night and day;
Also a swete helle it is,
And a sorowful Paradys;
A plesaunt gayl and esy prisoun, 4745
And, ful of froste, somer sesoun;
Pryme temps, ful of frostes whyte,
And May, devoide of al delyte,
With seer braunches, blossoms ungrene;
And newe fruyt, fillid with winter tene. 4750
It is a slowe, may not forbere
Ragges, ribaned with gold, to were;
For al-so wel wol love be set
Under ragges as riche rochet;
And eek as wel be amourettes 4755
In mourning blak, as bright burnettes.
For noon is of so mochel prys,
Ne no man founden [is] so wys,
Ne noon so high is of parage,
Ne no man founde of wit so sage, 4760
No man so hardy ne so wight,
Ne no man of so mochel might,
Noon so fulfilled of bounte,
[But] he with love may daunted be.
Al the world holdith this way; 4765
Love makith alle to goon miswey,
But it be they of yvel lyf,
Whom Genius cursith, man and wyf,
That wrongly werke ageyn nature.
Noon suche I love, ne have no cure 4770
Of suche as Loves servaunts been,
And wol not by my counsel fleen.
For I ne preyse that loving,
Wher-thurgh man, at the laste ending,
Shal calle hem wrecchis fulle of wo, 4775
Love greveth hem and shendith so.
But if thou wolt wel Love eschewe,
For to escape out of his mewe,
And make al hool thy sorwe to slake,
No bettir counsel mayst thou take, 4780
Than thinke to fleen wel, y-wis;
May nought helpe elles; for wite thou this:--
If thou flee it, it shal flee thee;
Folowe it, and folowen shal it thee. '
_L'Amaunt. _ Whan I hadde herd al Resoun seyn, 4785
Which hadde spilt hir speche in veyn:
Dame,' seyde I, 'I dar wel sey
Of this avaunt me wel I may
That from your scole so deviaunt
I am, that never the more avaunt 4790
Right nought am I, thurgh your doctryne;
I dulle under your disciplyne;
I wot no more than [I] wist [er],
To me so contrarie and so fer
Is every thing that ye me lere; 4795
And yit I can it al parcuere.
Myn herte foryetith therof right nought,
It is so writen in my thought;
And depe graven it is so tendir
That al by herte I can it rendre, 4800
And rede it over comunely;
But to my-silf lewedist am I.
'But sith ye love discreven so,
And lakke and preise it, bothe two,
Defyneth it into this letter, 4805
That I may thenke on it the better;
For I herde never [diffyne it ere],
And wilfully I wolde it lere. '
_Raisoun. _ 'If love be serched wel and sought,
It is a sykenesse of the thought 4810
Annexed and knet bitwixe tweyne,
[Which] male and female, with oo cheyne,
So frely byndith, that they nil twinne,
Whether so therof they lese or winne.
The roote springith, thurgh hoot brenning, 4815
Into disordinat desiring
For to kissen and enbrace,
And at her lust them to solace.
Of other thing love recchith nought,
But setteth hir herte and al hir thought 4820
More for delectacioun
Than any procreacioun
Of other fruyt by engendring;
Which love to god is not plesing;
For of hir body fruyt to get 4825
They yeve no force, they are so set
Upon delyt, to pley in-fere.
And somme have also this manere,
To feynen hem for love seke;
Sich love I preise not at a leke. 4830
For paramours they do but feyne;
To love truly they disdeyne.
They falsen ladies traitoursly,
And sweren hem othes utterly,
With many a lesing, and many a fable, 4835
And al they finden deceyvable.
And, whan they her lust han geten,
The hoote ernes they al foryeten.
Wimmen, the harm they byen ful sore;
But men this thenken evermore, 4840
That lasse harm is, so mote I thee,
Disceyve them, than disceyved be;
And namely, wher they ne may
Finde non other mene wey.
For I wot wel, in sothfastnesse, 4845
That [who] doth now his bisynesse
With any womman for to dele,
For any lust that he may fele,
But-if it be for engendrure,
He doth trespasse, I you ensure. 4850
For he shulde setten al his wil
To geten a likly thing him til,
And to sustene[n], if he might,
And kepe forth, by kindes right,
His owne lyknesse and semblable, 4855
For bicause al is corumpable,
And faile shulde successioun,
Ne were ther generacioun
Our sectis strene for to save.
Whan fader or moder arn in grave, 4860
Hir children shulde, whan they ben deede,
Ful diligent ben, in hir steede,
To use that werke on such a wyse,
That oon may thurgh another ryse.
Therfore set Kinde therin delyt, 4865
For men therin shulde hem delyte,
And of that dede be not erke,
But ofte sythes haunt that werke.
For noon wolde drawe therof a draught
Ne were delyt, which hath him caught. 4870
This hadde sotil dame Nature;
For noon goth right, I thee ensure,
Ne hath entent hool ne parfyt;
For hir desir is for delyt,
The which fortened crece and eke 4875
The pley of love for-ofte seke,
And thralle hem-silf, they be so nyce,
Unto the prince of every vyce.
For of ech sinne it is the rote,
Unlefulle lust, though it be sote, 4880
And of al yvel the racyne,
As Tullius can determyne,
Which in his tyme was ful sage,
In a boke he made of Age,
Wher that more he preyseth Elde, 4885
Though he be croked and unwelde,
And more of commendacioun,
Than Youthe in his discripcioun.
For Youthe set bothe man and wyf
In al perel of soule and lyf; 4890
And perel is, but men have grace,
The [tyme] of youthe for to pace,
Withoute any deth or distresse,
It is so ful of wildenesse;
So ofte it doth shame or damage 4895
To him or to his linage.
It ledith man now up, now doun,
In mochel dissolucioun,
And makith him love yvel company,
And lede his lyf disrewlily, 4900
And halt him payed with noon estate.
Within him-silf is such debate,
He chaungith purpos and entent,
And yalt [him] into som covent,
To liven aftir her empryse, 4905
And lesith fredom and fraunchyse,
That Nature in him hadde set,
The which ageyn he may not get,
If he there make his mansioun
For to abyde professioun. 4910
Though for a tyme his herte absente,
It may not fayle, he shal repente,
And eke abyde thilke day
To leve his abit, and goon his way,
And lesith his worship and his name, 4915
And dar not come ageyn for shame;
But al his lyf he doth so mourne,
Bicause he dar not hoom retourne.
Fredom of kinde so lost hath he
That never may recured be, 4920
But-if that god him graunte grace
That he may, er he hennes pace,
Conteyne undir obedience
Thurgh the vertu of pacience.
For Youthe set man in al folye, 4925
In unthrift and in ribaudye,
In leccherye, and in outrage,
So ofte it chaungith of corage.
Youthe ginneth ofte sich bargeyn,
That may not ende withouten peyn. 4930
In gret perel is set youth-hede,
Delyt so doth his bridil lede.
Delyt thus hangith, drede thee nought,
Bothe mannis body and his thought,
Only thurgh Youthe, his chamberere, 4935
That to don yvel is customere,
And of nought elles taketh hede
But only folkes for to lede
Into disporte and wildenesse,
So is [she] froward from sadnesse. 4940
'But Elde drawith hem therfro;
Who wot it nought, he may wel go
[Demand] of hem that now arn olde,
That whylom Youthe hadde in holde,
Which yit remembre of tendir age, 4945
How it hem brought in many a rage,
And many a foly therin wrought.
But now that Elde hath hem thurghsought,
They repente hem of her folye,
That Youthe hem putte in Iupardye, 4950
In perel and in muche wo,
And made hem ofte amis to do,
And suen yvel companye,
Riot and avouterye.
'But Elde [can] ageyn restreyne 4955
From suche foly, and refreyne,
And set men, by hir ordinaunce,
In good reule and in governaunce.
But yvel she spendith hir servyse,
For no man wol hir love, ne pryse; 4960
She is hated, this wot I wele.
Hir acqueyntaunce wolde no man fele,
Ne han of Elde companye,
Men hate to be of hir alye.
For no man wolde bicomen olde, 4965
Ne dye, whan he is yong and bolde.
And Elde merveilith right gretly,
Whan they remembre hem inwardly
Of many a perelous empryse,
Whiche that they wrought in sondry wyse, 4970
How ever they might, withoute blame,
Escape awey withoute shame,
In youthe, withoute[n] damage
Or repreef of her linage,
Losse of membre, sheding of blode, 4975
Perel of deth, or losse of good.
'Wost thou nought where Youthe abit,
That men so preisen in her wit?
With Delyt she halt soiour,
For bothe they dwellen in oo tour. 4980
As longe as Youthe is in sesoun,
They dwellen in oon mansioun.
Delyt of Youthe wol have servyse
To do what so he wol devyse;
And Youthe is redy evermore 4985
For to obey, for smerte of sore,
Unto Delyt, and him to yive
Hir servise, whyl that she may live.
'Where Elde abit, I wol thee telle
Shortly, and no whyle dwelle, 4990
For thider bihoveth thee to go.
If Deth in youthe thee not slo,
Of this journey thou maist not faile.
With hir Labour and Travaile
Logged been, with Sorwe and Wo, 4995
That never out of hir courte go.
Peyne and Distresse, Syknesse and Ire,
And Malencoly, that angry sire,
Ben of hir paleys senatours;
Groning and Grucching, hir herbergeours, 5000
The day and night, hir to turment,
With cruel Deth they hir present,
And tellen hir, erliche and late,
That Deth stant armed at hir gate.
Than bringe they to hir remembraunce 5005
The foly dedis of hir infaunce,
Which causen hir to mourne in wo
That Youthe hath hir bigiled so,
Which sodeynly awey is hasted.
She wepeth the tyme that she hath wasted, 5010
Compleyning of the preterit,
And the present, that not abit,
And of hir olde vanitee,
That, but aforn hir she may see
In the future som socour, 5015
To leggen hir of hir dolour,
To graunt hir tyme of repentaunce,
For hir sinnes to do penaunce,
And at the laste so hir governe
To winne the Ioy that is eterne, 5020
Fro which go bakward Youthe [hir] made,
In vanitee to droune and wade.
For present tyme abidith nought,
It is more swift than any thought;
So litel whyle it doth endure 5025
That ther nis compte ne mesure.
'But how that ever the game go,
Who list [have] Ioye and mirth also
Of love, be it he or she,
High or lowe, who[so] it be, 5030
In fruyt they shulde hem delyte;
Her part they may not elles quyte,
To save hem-silf in honestee.
And yit ful many oon I see
Of wimmen, sothly for to seyne, 5035
That [ay] desire and wolde fayne
The pley of love, they be so wilde,
And not coveite to go with childe.
And if with child they be perchaunce,
They wole it holde a gret mischaunce; 5040
But what-som-ever wo they fele,
They wol not pleyne, but concele;
But-if it be any fool or nyce,
In whom that shame hath no Iustyce.
For to delyt echon they drawe, 5045
That haunte this werk, bothe high and lawe,
Save sich that ar[e]n worth right nought,
That for money wol be bought.
Such love I preise in no wyse,
Whan it is given for coveitise. 5050
I preise no womman, though [she] be wood,
That yeveth hir-silf for any good.
For litel shulde a man telle
Of hir, that wol hir body selle,
Be she mayde, be she wyf, 5055
That quik wol selle hir, by hir lyf.
How faire chere that ever she make,
He is a wrecche, I undirtake,
That loveth such one, for swete or sour,
Though she him calle hir paramour, 5060
And laugheth on him, and makith him feeste.
For certeynly no suche [a] beeste
To be loved is not worthy,
Or bere the name of druery.
Noon shulde hir please, but he were wood, 5065
That wol dispoile him of his good.
Yit nevertheles, I wol not sey
[But] she, for solace and for pley,
May a Iewel or other thing
Take of her loves free yeving; 5070
But that she aske it in no wyse,
For drede of shame of coveityse.
And she of hirs may him, certeyn,
Withoute sclaundre, yeven ageyn,
And ioyne her hertes togidre so 5075
In love, and take and yeve also.
Trowe not that I wolde hem twinne,
Whan in her love ther is no sinne;
I wol that they togedre go,
And doon al that they han ado, 5080
As curteis shulde and debonaire,
And in her love beren hem faire,
Withoute vyce, bothe he and she;
So that alwey, in honestee,
Fro foly love [they] kepe hem clere 5085
That brenneth hertis with his fere;
And that her love, in any wyse,
Be devoid of coveityse.
Good love shulde engendrid be
Of trewe herte, iust, and secree, 5090
And not of such as sette her thought
To have her lust, and ellis nought,
So are they caught in Loves lace,
Truly, for bodily solace.
Fleshly delyt is so present 5095
With thee, that sette al thyn entent,
Withoute more (what shulde I glose? )
For to gete and have the Rose;
Which makith thee so mate and wood
That thou desirest noon other good. 5100
But thou art not an inche the nerre,
But ever abydest in sorwe and werre,
As in thy face it is sene;
It makith thee bothe pale and lene;
Thy might, thy vertu goth away. 5105
A sory gest, in goode fay,
Thou [herberedest than] in thyn inne,
The God of Love whan thou let inne!
Wherfore I rede, thou shette him out,
Or he shal greve thee, out of doute; 5110
For to thy profit it wol turne,
If he nomore with thee soiourne.
In gret mischeef and sorwe sonken
Ben hertis, that of love arn dronken,
As thou peraventure knowen shal, 5115
Whan thou hast lost [thy] tyme al,
And spent [thy youthe] in ydilnesse,
In waste, and woful lustinesse;
If thou maist live the tyme to see
Of love for to delivered be, 5120
Thy tyme thou shall biwepe sore
The whiche never thou maist restore.
(For tyme lost, as men may see,
For no-thing may recured be).
And if thou scape yit, atte laste, 5125
Fro Love, that hath thee so faste
Knit and bounden in his lace,
Certeyn, I holde it but a grace.
For many oon, as it is seyn,
Have lost, and spent also in veyn, 5130
In his servyse, withoute socour,
Body and soule, good, and tresour,
Wit, and strengthe, and eek richesse,
Of which they hadde never redresse. '
Thus taught and preched hath Resoun, 5135
But Love spilte hir sermoun,
That was so imped in my thought,
That hir doctrine I sette at nought.
And yit ne seide she never a dele,
That I ne understode it wele, 5140
Word by word, the mater al.
But unto Love I was so thral,
Which callith over-al his pray,
He chasith so my thought [alway],
And holdith myn herte undir his sele, 5145
As trust and trew as any stele;
So that no devocioun
Ne hadde I in the sermoun
Of dame Resoun, ne of hir rede;
It toke no soiour in myn hede. 5150
For alle yede out at oon ere
That in that other she dide lere;
Fully on me she lost hir lore,
Hir speche me greved wondir sore.
[Than] unto hir for ire I seide, 5155
For anger, as I dide abraide:
Dame, and is it your wille algate,
That I not love, but that I hate
Alle men, as ye me teche?
For if I do aftir your speche, 5160
Sith that ye seyn love is not good,
Than must I nedis say with mood,
If I it leve, in hatrede ay
Liven, and voide love away
From me, [and been] a sinful wrecche, 5165
Hated of all that [love that] tecche.
I may not go noon other gate,
For either must I love or hate.
And if I hate men of-newe
More than love, it wol me rewe, 5170
As by your preching semeth me,
For Love no-thing ne preisith thee.
Ye yeve good counseil, sikirly,
That prechith me al-day, that I
Shulde not Loves lore alowe; 5175
He were a fool, wolde you not trowe!
In speche also ye han me taught
Another love, that knowen is naught,
Which I have herd you not repreve,
To love ech other; by your leve, 5180
If ye wolde diffyne it me,
I wolde gladly here, to see,
At the leest, if I may lere
Of sondry loves the manere. '
_Raison. _ 'Certis, freend, a fool art thou 5185
Whan that thou no-thing wolt allowe
That I [thee] for thy profit say.
Yit wol I sey thee more, in fay;
For I am redy, at the leste,
To accomplisshe thy requeste, 5190
But I not wher it wol avayle;
In veyne, perauntre, I shal travayle.
Love ther is in sondry wyse,
As I shal thee here devyse.
For som love leful is and good; 5195
I mene not that which makith thee wood,
And bringith thee in many a fit,
And ravisshith fro thee al thy wit,
It is so merveilous and queynt;
With such love be no more aqueynt. 5200

COMMENT RAISOUN DIFFINIST AMISTIE.

'Love of Frendshipe also ther is,
Which makith no man doon amis,
Of wille knit bitwixe two,
That wol not breke for wele ne wo;
Which long is lykly to contune, 5205
Whan wille and goodis ben in comune;
Grounded by goddis ordinaunce,
Hool, withoute discordaunce;
With hem holding comuntee
Of al her goode in charitee, 5210
That ther be noon excepcioun
Thurgh chaunging of entencioun;
That ech helpe other at hir neede,
And wysly hele bothe word and dede;
Trewe of mening, devoid of slouthe, 5215
For wit is nought withoute trouthe;
So that the ton dar al his thought
Seyn to his freend, and spare nought,
As to him-silf, without dreding
To be discovered by wreying. 5220
For glad is that coniunccioun,
Whan ther is noon suspecioun
[Ne lak in hem], whom they wolde prove
That trew and parfit weren in love.
For no man may be amiable, 5225
But-if he be so ferme and stable,
That fortune chaunge him not, ne blinde,
But that his freend alwey him finde,
Bothe pore and riche, in oon [e]state.
For if his freend, thurgh any gate, 5230
Wol compleyne of his povertee,
He shulde not byde so long, til he
Of his helping him requere;
For good deed, done [but] thurgh prayere,
Is sold, and bought to dere, y-wis, 5235
To hert that of gret valour is.
For hert fulfilled of gentilnesse
Can yvel demene his distresse.
And man that worthy is of name
To asken often hath gret shame. 5240
A good man brenneth in his thought
For shame, whan he axeth ought.
He hath gret thought, and dredith ay
For his disese, whan he shal pray
His freend, lest that he warned be, 5245
Til that he preve his stabiltee.
But whan that he hath founden oon
That trusty is and trew as stone,
And [hath] assayed him at al,
And found him stedefast as a wal, 5250
And of his freendship be certeyne,
He shal him shewe bothe Ioye and peyne,
And al that [he] dar thinke or sey,
Withoute shame, as he wel may.
For how shulde he ashamed be 5255
Of sich oon as I tolde thee?
For whan he woot his secree thought,
The thridde shal knowe ther-of right nought;
For tweyn in nombre is bet than three
In every counsel and secree. 5260
Repreve he dredeth never a del,
Who that biset his wordis wel;
For every wys man, out of drede,
Can kepe his tunge til he see nede;
And fooles can not holde hir tunge; 5265
A fooles belle is sone runge.
Yit shal a trewe freend do more
To helpe his felowe of his sore,
And socoure him, whan he hath nede,
In al that he may doon in dede; 5270
And gladder [be] that he him plesith
Than [is] his felowe that he esith.
And if he do not his requeste,
He shal as mochel him moleste
As his felow, for that he 5275
May not fulfille his voluntee
[As] fully as he hath requered.
If bothe the hertis Love hath fered,
Joy and wo they shul depart,
And take evenly ech his part. 5280
Half his anoy he shal have ay,
And comfort [him] what that he may;
And of his blisse parte shal he,
If love wol departed be.
'And whilom of this [amitee] 5285
Spak Tullius in a ditee;
["A man] shulde maken his request
Unto his freend, that is honest;
And he goodly shulde it fulfille,
But it the more were out of skile, 5290
And otherwise not graunt therto,
Except only in [cases] two:
If men his freend to deth wolde dryve,
Lat him be bisy to save his lyve.
Also if men wolen him assayle, 5295
Of his wurship to make him faile,
And hindren him of his renoun,
Lat him, with ful entencioun,
His dever doon in ech degree
That his freend ne shamed be, 5300
In this two [cases] with his might,
Taking no kepe to skile nor right,
As ferre as love may him excuse;
This oughte no man to refuse. "
This love that I have told to thee 5305
Is no-thing contrarie to me;
This wol I that thou folowe wel,
And leve the tother everydel.
This love to vertu al attendith,
The tothir fooles blent and shendith. 5310
'Another love also there is,
That is contrarie unto this,
Which desyre is so constreyned
That [it] is but wille feyned;
Awey fro trouthe it doth so varie, 5315
That to good love it is contrarie;
For it maymeth, in many wyse,
Syke hertis with coveityse;
Al in winning and in profyt
Sich love settith his delyt. 5320
This love so hangeth in balaunce
That, if it lese his hope, perchaunce,
Of lucre, that he is set upon,
It wol faile, and quenche anon;
For no man may be amorous, 5325
Ne in his living vertuous,
But-[if] he love more, in mood,
Men for hem-silf than for hir good.
For love that profit doth abyde
Is fals, and bit not in no tyde. 5330
[This] love cometh of dame Fortune,
That litel whyle wol contune;
For it shal chaungen wonder sone,
And take eclips right as the mone,
Whan she is from us [y]-let 5335
Thurgh erthe, that bitwixe is set
The sonne and hir, as it may falle,
Be it in party, or in alle;
The shadowe maketh her bemis merke,
And hir hornes to shewe derke, 5340
That part where she hath lost hir lyght
Of Phebus fully, and the sight;
Til, whan the shadowe is overpast,
She is enlumined ageyn as faste,
Thurgh brightnesse of the sonne bemes 5345
That yeveth to hir ageyn hir lemes.
That love is right of sich nature;
Now is [it] fair, and now obscure.
Now bright, now clipsy of manere,
And whylom dim, and whylom clere. 5350
As sone as Poverte ginneth take,
With mantel and [with] wedis blake
[It] hidith of Love the light awey,
That into night it turneth day;
It may not see Richesse shyne 5355
Til the blakke shadowes fyne.
For, whan Richesse shyneth bright,
Love recovereth ageyn his light;
And whan it failith, he wol flit,
And as she [groweth, so groweth] it. 5360
'Of this love, here what I sey:--
The riche men are loved ay,
And namely tho that sparand bene,
That wol not wasshe hir hertes clene
Of the filthe, nor of the vyce 5365
Of gredy brenning avaryce.
The riche man ful fond is, y-wis,
That weneth that he loved is.
If that his herte it undirstood,
It is not he, it is his good; 5370
He may wel witen in his thought,
His good is loved, and he right nought.
For if he be a nigard eke,
Men wole not sette by him a leke,
But haten him; this is the soth. 5375
Lo, what profit his catel doth!
Of every man that may him see,
It geteth him nought but enmitee.
But he amende him of that vyce,
And knowe him-silf, he is not wys. 5380
'Certis, he shulde ay freendly be,
To gete him love also ben free,
Or ellis he is not wyse ne sage
No more than is a gote ramage.
That he not loveth, his dede proveth, 5385
Whan he his richesse so wel loveth,
That he wol hyde it ay and spare,
His pore freendis seen forfare;
To kepe [it ay is] his purpose,
Til for drede his eyen close, 5390
And til a wikked deth him take;
Him hadde lever asondre shake,
And late his limes a sondre ryve,
Than leve his richesse in his lyve.
He thenkith parte it with no man; 5395
Certayn, no love is in him than.
How shulde love within him be,
Whan in his herte is no pite?
That he trespasseth, wel I wat,
For ech man knowith his estat; 5400
For wel him oughte be reproved
That loveth nought, ne is not loved.
'But sith we arn to Fortune comen,
And [han] our sermoun of hir nomen,
A wondir wil I telle thee now, 5405
Thou herdist never sich oon, I trow.
I not wher thou me leven shal,
Though sothfastnesse it be [in] al,
As it is writen, and is sooth,
That unto men more profit doth 5410
The froward Fortune and contraire,
Than the swote and debonaire:
And if thee thinke it is doutable,
It is thurgh argument provable.
For the debonaire and softe 5415
Falsith and bigylith ofte;
For liche a moder she can cherishe
And milken as doth a norys;
And of hir goode to hem deles,
And yeveth hem part of her loweles, 5420
With grete richesse and dignitee;
And hem she hoteth stabilitee
In a state that is not stable,
But chaunging ay and variable;
And fedith hem with glorie veyne, 5425
And worldly blisse noncerteyne.
Whan she hem settith on hir whele,
Than wene they to be right wele,
And in so stable state withalle,
That never they wene for to falle.