འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས།
དེ་སྟོན་པར་བྱེད་པའི་བླ་མ་ནི་རྩ་བའི་བླ་མ་སྟེ་དེ་དང་རང་ཉིད་འབྲེལ་བ་ཆེ་ཚུལ་ཡང་། སྤྱིར་སེམས་ཅན་ཐམས་ཅད་དང་ཆོས་ཀྱི་དབྱིངས་གཅིག་པས་མ་འབྲེལ་བ་མེད་པས་ཀྱང་འབྲེལ།
སྒོས་སུ་བླ་མ་རིན་པོ་ཆེ་སྔོན་སློབ་ལམ་དུ་བྱང་ཆུབ་ཀྱི་སྤྱོད་པ་སྤྱད་པའི་སྐབས་ནས་རང་རེ་འབུ་སྲིན་ཕྲ་མོ་ལྟ་བུའི་ལུས་བླངས་སྐུ་ཡི་གྲིབ་མས་རེག་པའམ།
གསུང་གི་ཆ་ཤས་ཐོས་པ་དང་། ཐུགས་ཀྱི་དགོངས་པའི་ཟེར་ཕྲ་མོས་ཁྱབ་པ་གང་རུང་གི་དངོས་དང་བརྒྱུད་ཀྱི་འབྲེལ་བ་ནས་བརྩམས་དེང་གི་བར་དུ་བཟང་ངན་གྱི་འབྲེལ་པ་ཞོག་པས་སྔོན་ནས་འབྲེལ་བའི་ཚེ་རབས་ཀྱི་བླ་མ་ཞེས་བགྱི་ལ། དེ་ཡང་སྣང་བ་ཐམས་ཅད་རང་སྣང་ཡིན་བཞིན་བླ་མ་ཡང་རང་སེམས་དག་པའི་སྣང་བ་ལས་ཤར་བའི་བླ་མ་ཡིན་པས། བླ་མ་ཕྱི་ན་མི་བཞུགས་ངེས་དོན་དུ་རང་གི་རིག་པ་བླ་མ་ཉིད་དང་། དེའི་སྣང་ཆའི་རྩལ་ཕྱིར་ཤར་བ་ལས་བླ་མའི་གཟུགས་སྐུ་བློའི་རིམ་པ་དང་འཚམ་པར་འཆར་བའོ.
