No More Learning

[Fard] not thy visage in no wyse, 2285
For that of love is not thempryse;
For love doth haten, as I finde,
A beaute that cometh not of kinde.
Alwey in herte I rede thee
Glad and mery for to be, 2290
And be as Ioyful as thou can;
Love hath no Ioye of sorowful man.
That yvel is ful of curtesye
That [lauhwith] in his maladye;
For ever of love the siknesse 2295
Is meynd with swete and bitternesse.
The sore of love is merveilous;
For now the lover [is] Ioyous,
Now can he pleyne, now can he grone,
Now can he singen, now maken mone. 2300
To-day he pleyneth for hevinesse,
To-morowe he pleyeth for Iolynesse.
The lyf of love is ful contrarie,
Which stoundemele can ofte varie.
But if thou canst [som] mirthis make, 2305
That men in gree wole gladly take,
Do it goodly, I comaunde thee;
For men sholde, wher-so-ever they be,
Do thing that hem [best] sitting is,
For therof cometh good loos and pris. 2310
Wher-of that thou be vertuous,
Ne be not straunge ne daungerous.
For if that thou good rider be,
Prike gladly, that men may se.
In armes also if thou conne, 2315
Pursue, til thou a name hast wonne.
And if thy voice be fair and clere,
Thou shalt maken no gret daungere
Whan to singe they goodly preye;
It is thy worship for to obeye. 2320
Also to you it longith ay
To harpe and giterne, daunce and play;
For if he can wel foote and daunce,
It may him greetly do avaunce.
Among eek, for thy lady sake, 2325
Songes and complayntes that thou make;
For that wol meve [hem] in hir herte,
Whan they reden of thy smerte.
Loke that no man for scarce thee holde,
For that may greve thee manyfolde. 2330
Resoun wol that a lover be
In his yiftes more large and free
Than cherles that been not of loving.
For who ther-of can any thing,
He shal be leef ay for to yeve, 2335
In [Loves] lore who so wolde leve;
For he that, through a sodeyn sight,
Or for a kissing, anon-right
Yaf hool his herte in wille and thought,
And to him-silf kepith right nought, 2340
Aftir [swich yift], is good resoun,
He yeve his good in abandoun.
'Now wol I shortly here reherce,
Of that [that] I have seid in verse,
Al the sentence by and by, 2345
In wordis fewe compendiously,
That thou the bet mayst on hem thinke,
Whether-so it be thou wake or winke;
For [that] the wordis litel greve
A man to kepe, whanne it is breve. 2350
'Who-so with Love wol goon or ryde
He mot be curteys, and void of pryde,
Mery and fulle of Iolite,
And of largesse alosed be.
'First I Ioyne thee, here in penaunce, 2355
That ever, withoute repentaunce,
Thou set thy thought in thy loving,
To laste withoute repenting;
And thenke upon thy mirthis swete,
That shal folowe aftir whan ye mete. 2360
'And for thou trewe to love shalt be,
I wol, and [eek] comaunde thee,
That in oo place thou sette, al hool,
Thyn herte, withouten halfen dool,
For trecherie, [in] sikernesse; 2365
For I lovede never doublenesse.
To many his herte that wol depart,
Everiche shal have but litel part.
But of him drede I me right nought,
That in oo place settith his thought. 2370
Therfore in oo place it sette,
And lat it never thennes flette.
For if thou yevest it in lening,
I holde it but a wrecchid thing:
Therfore yeve it hool and quyte, 2375
And thou shalt have the more merite.
If it be lent, than aftir soon,
The bountee and the thank is doon;
But, in love, free yeven thing
Requyrith a gret guerdoning. 2380
Yeve it in yift al quit fully,
And make thy yift debonairly;
For men that yift [wol] holde more dere
That yeven is with gladsome chere.
That yift nought to preisen is 2385
That man yeveth, maugre his.
Whan thou hast yeven thyn herte, as I
Have seid thee here [al] openly,
Than aventures shulle thee falle,
Which harde and hevy been withalle. 2390
For ofte whan thou bithenkist thee
Of thy loving, wher-so thou be,
Fro folk thou must depart in hy,
That noon perceyve thy malady,
But hyde thyn harm thou must alone, 2395
And go forth sole, and make thy mone.
Thou shalt no whyl be in oo stat,
But whylom cold and whylom hat;
Now reed as rose, now yelowe and fade.
Such sorowe, I trowe, thou never hade; 2400
Cotidien, ne [yit] quarteyne,
It is nat so ful of peyne.
For ofte tymes it shal falle
In love, among thy peynes alle,
That thou thy-self, al hoolly, 2405
Foryeten shalt so utterly,
That many tymes thou shalt be
Stille as an image of tree,
Dom as a stoon, without stering
Of foot or hond, without speking. 2410
Than, sone after al thy peyne,
To memorie shalt thou come ageyn,
As man abasshed wondre sore,
And after sighen more and more.
For wit thou wel, withouten wene, 2415
In swich astat ful oft have been
That have the yvel of love assayd,
Wher-through thou art so dismayd.
'After, a thought shal take thee so,
That thy love is to fer thee fro: 2420
Thou shalt say, "God, what may this be,
That I ne may my lady see?
Myne herte aloon is to her go,
And I abyde al sole in wo,
Departed fro myn owne thought, 2425
And with myne eyen see right nought.
'"Alas, myn eyen sende I ne may,
My careful herte to convay!
Myn hertes gyde but they be,
I praise no-thing what ever they see. 2430
Shul they abyde thanne? nay;
But goon visyte without delay
That myn herte desyreth so.
For certeynly, but-if they go,
A fool my-self I may wel holde, 2435
Whan I ne see what myn herte wolde.
Wherfore I wol gon her to seen,
Or esed shal I never been,
But I have som tokening. "
Then gost thou forth without dwelling; 2440
But ofte thou faylest of thy desyre,
Er thou mayst come hir any nere,
And wastest in vayn thy passage.
Than fallest thou in a newe rage;
For want of sight thou ginnest morne, 2445
And homward pensif dost retorne.
In greet mischeef than shall thou be,
For than agayn shal come to thee
Sighes and pleyntes, with newe wo,
That no icching prikketh so. 2450
Who wot it nought, he may go lere
Of hem that byen love so dere.
'No-thing thyn herte appesen may,
That oft thou wolt goon and assay,
If thou mayst seen, by aventure, 2455
Thy lyves joy, thyn hertis cure;
So that, by grace if thou might
Atteyne of hir to have a sight,
Than shall thou doon non other dede
But with that sight thyn eyen fede. 2460
That faire fresh whan thou mayst see,
Thyn herte shal so ravisshed be,
That never thou woldest, thy thankis, lete,
Ne remove, for to see that swete.
The more thou seest in sothfastnesse, 2465
The more thou coveytest of that swetnesse;
The more thyn herte brenneth in fyr,
The more thyn herte is in desyr.
For who considreth every del,
It may be lykned wondir wel, 2470
The peyne of love, unto a fere;
For ever [the] more thou neighest nere
Thought, or who-so that it be,
For verray sothe I telle it thee,
The hatter ever shal thou brenne, 2475
As experience shal thee kenne.
Wher-so [thou] comest in any cost,
Who is next fyr, he brenneth most.
And yit forsothe, for al thyn hete,
Though thou for love swelte and swete, 2480
Ne for no-thing thou felen may,
Thou shalt not willen to passe away.
And though thou go, yet must thee nede
Thenke al-day on hir fairhede,
Whom thou bihelde with so good wille; 2485
And holde thysilf bigyled ille,
That thou ne haddest non hardement
To shewe hir ought of thyn entent.
Thyn herte ful sore thou wolt dispyse,
And eek repreve of cowardyse, 2490
That thou, so dulle in every thing,
Were dom for drede, without speking.
Thou shalt eek thenke thou didest foly,
That thou were hir so faste by,
And durst not auntre thee to say 2495
Som-thing, er thou cam away;
For thou haddist no more wonne,
To speke of hir whan thou bigonne:
But yif she wolde, for thy sake,
In armes goodly thee have take, 2500
It shulde have be more worth to thee
Than of tresour greet plentee.
'Thus shalt thou morne and eek compleyn,
And gete enchesoun to goon ageyn
Unto thy walk, or to thy place, 2505
Where thou biheld hir fleshly face.
And never, for fals suspeccioun,
Thou woldest finde occasioun
For to gon unto hir hous.
So art thou thanne desirous 2510
A sight of hir for to have,
If thou thine honour mightest save,
Or any erand mightist make
Thider, for thy loves sake;
Ful fayn thou woldist, but for drede 2515
Thou gost not, lest that men take hede.
Wherfore I rede, in thy going,
And also in thyn ageyn-coming,
Thou be wel war that men ne wit;
Feyne thee other cause than it 2520
To go that weye, or faste by;
To hele wel is no folye.
And if so be it happe thee
That thou thy love ther mayst see,
In siker wyse thou hir salewe, 2525
Wherwith thy colour wol transmewe,
And eke thy blood shal al to-quake,
Thyn hewe eek chaungen for hir sake.
But word and wit, with chere ful pale,
Shul wante for to telle thy tale. 2530
And if thou mayst so fer-forth winne,
That thou [thy] resoun durst biginne,
And woldist seyn three thingis or mo,
Thou shalt ful scarsly seyn the two.
Though thou bithenke thee never so wel, 2535
Thou shalt foryete yit somdel,
But-if thou dele with trecherye.
For fals lovers mowe al folye
Seyn, what hem lust, withouten drede,
They be so double in hir falshede; 2540
For they in herte cunne thenke a thing
And seyn another, in hir speking.
And whan thy speche is endid al,
Right thus to thee it shal bifal;
If any word than come to minde, 2545
That thou to seye hast left bihinde,
Than thou shalt brenne in greet martyr;
For thou shalt brenne as any fyr.
This is the stryf and eke the affray,
And the batail that lastith ay. 2550
This bargeyn ende may never take,
But-if that she thy pees wil make.
'And whan the night is comen, anon
A thousand angres shal come upon.
To bedde as fast thou wolt thee dight, 2555
Where thou shalt have but smal delyt;
For whan thou wenest for to slepe,
So ful of peyne shalt thou crepe,
Sterte in thy bedde aboute ful wyde,
And turne ful ofte on every syde; 2560
Now dounward groffe, and now upright,
And walowe in wo the longe night,
Thyne armis shalt thou sprede a-brede,
As man in werre were forwerreyd.
Than shal thee come a remembraunce 2565
Of hir shape and hir semblaunce,
Wherto non other may be pere.
And wite thou wel, withoute were,
That thee shal [seme], somtyme that night,
That thou hast hir, that is so bright, 2570
Naked bitwene thyn armes there,
Al sothfastnesse as though it were.
Thou shalt make castels than in Spayne,
And dreme of Ioye, al but in vayne,
And thee delyten of right nought, 2575
Whyl thou so slomrest in that thought,
That is so swete and delitable,
The which, in soth, nis but a fable,
For it ne shal no whyle laste.
Than shalt thou sighe and wepe faste, 2580
And say, "Dere god, what thing is this?
My dreme is turned al amis,
Which was ful swete and apparent,
But now I wake, it is al shent!
Now yede this mery thought away! 2585
Twenty tymes upon a day
I wolde this thought wolde come ageyn,
For it alleggith wel my peyn.
It makith me ful of Ioyful thought,
It sleeth me, that it lastith noght. 2590
A, lord! why nil ye me socoure,
The Ioye, I trowe, that I langoure?
The deth I wolde me shulde slo
Whyl I lye in hir armes two.
Myn harm is hard, withouten wene, 2595
My greet unese ful ofte I mene.
But wolde Love do so I might
Have fully Ioye of hir so bright,
My peyne were quit me richely.
Allas, to greet a thing aske I! 2600
It is but foly, and wrong wening,
To aske so outrageous a thing.
And who-so askith folily,
He moot be warned hastily;
And I ne wot what I may say, 2605
I am so fer out of the way;
For I wolde have ful gret lyking
And ful gret Ioye of lasse thing.
For wolde she, of hir gentilnesse,
Withouten more, me onis kesse, 2610
It were to me a greet guerdoun,
Relees of al my passioun.
But it is hard to come therto;
Al is but foly that I do,
So high I have myn herte set, 2615
Where I may no comfort get.
I noot wher I sey wel or nought;
But this I wot wel in my thought,
That it were bet of hir aloon,
For to stinte my wo and moon, 2620
A loke on [me] y-cast goodly,
[Than] for to have, al utterly,
Of another al hool the pley.
A! lord! wher I shal byde the day
That ever she shal my lady be? 2625
He is ful cured that may hir see.
A! god! whan shal the dawning spring?
To ly thus is an angry thing;
I have no Ioye thus here to ly
Whan that my love is not me by. 2630
A man to lyen hath gret disese,
Which may not slepe ne reste in ese.
I wolde it dawed, and were now day,
And that the night were went away;
For were it day, I wolde upryse. 2635
A! slowe sonne, shew thyn enpryse!
Speed thee to sprede thy bemis bright,
And chace the derknesse of the night,
To putte away the stoundes stronge,
Which in me lasten al to longe. " 2640
'The night shalt thou contene so,
Withoute rest, in peyne and wo;
If ever thou knewe of love distresse,
Thou shalt mowe lerne in that siknesse.
And thus enduring shalt thou ly, 2645
And ryse on morwe up erly
Out of thy bedde, and harneys thee
Er ever dawning thou mayst see.
Al privily than shalt thou goon,
What [weder] it be, thy-silf aloon, 2650
For reyn, or hayl, for snow, for slete,
Thider she dwellith that is so swete,
The which may falle aslepe be,
And thenkith but litel upon thee.
Than shalt thou goon, ful foule aferd; 2655
Loke if the gate be unsperd,
And waite without in wo and peyn,
Ful yvel a-cold in winde and reyn.
Than shal thou go the dore bifore,
If thou maist fynde any score, 2660
Or hole, or reft, what ever it were;
Than shalt thou stoupe, and lay to ere,
If they within a-slepe be;
I mene, alle save thy lady free.
Whom waking if thou mayst aspye, 2665
Go put thy-silf in Iupartye,
To aske grace, and thee bimene,
That she may wite, withouten wene,
That thou [a]night no rest hast had,
So sore for hir thou were bistad. 2670
Wommen wel ought pite to take
Of hem that sorwen for hir sake.
And loke, for love of that relyke,
That thou thenke non other lyke,
For [whom] thou hast so greet annoy, 2675
Shal kisse thee er thou go away,
And hold that in ful gret deyntee.
And, for that no man shal thee see
Bifore the hous, ne in the way,
Loke thou be goon ageyn er day. 2680
Suche coming, and such going,
Such hevinesse, and such walking,
Makith lovers, withouten wene,
Under hir clothes pale and lene,
For Love leveth colour ne cleernesse; 2685
Who loveth trewe hath no fatnesse.
Thou shalt wel by thy-selfe see
That thou must nedis assayed be.
For men that shape hem other wey
Falsly her ladies to bitray, 2690
It is no wonder though they be fat;
With false othes hir loves they gat;
For oft I see suche losengeours
Fatter than abbatis or priours.
'Yet with o thing I thee charge, 2695
That is to seye, that thou be large
Unto the mayd that hir doth serve,
So best hir thank thou shalt deserve.
Yeve hir yiftes, and get hir grace,
For so thou may [hir] thank purchace, 2700
That she thee worthy holde and free,
Thy lady, and alle that may thee see.
Also hir servauntes worshipe ay,
And plese as muche as thou may;
Gret good through hem may come to thee, 2705
Bicause with hir they been prive.
They shal hir telle how they thee fand
Curteis and wys, and wel doand,
And she shal preyse [thee] wel the mare.
Loke out of londe thou be not fare; 2710
And if such cause thou have, that thee
Bihoveth to gon out of contree,
Leve hool thyn herte in hostage,
Til thou ageyn make thy passage.
Thenk long to see the swete thing 2715
That hath thyn herte in hir keping.
'Now have I told thee, in what wyse
A lover shal do me servyse.
Do it than, if thou wolt have
The mede that thou aftir crave. ' 2720
Whan Love al this had boden me,
I seide him:--'Sire, how may it be
That lovers may in such manere
Endure the peyne ye have seid here?
I merveyle me wonder faste, 2725
How any man may live or laste
In such peyne, and such brenning,
In sorwe and thought, and such sighing,
Ay unrelesed wo to make,
Whether so it be they slepe or wake. 2730
In such annoy continuely,
As helpe me god, this merveile I,
How man, but he were maad of stele,
Might live a month, such peynes to fele. '
The God of Love than seide me, 2735
Freend, by the feith I owe to thee,
May no man have good, but he it by.
A man loveth more tendirly
The thing that he hath bought most dere.
For wite thou wel, withouten were, 2740
In thank that thing is taken more,
For which a man hath suffred sore.
Certis, no wo ne may atteyne
Unto the sore of loves peyne.
Non yvel therto ne may amounte, 2745
No more than a man [may] counte
The dropes that of the water be.
For drye as wel the grete see
Thou mightist, as the harmes telle
Of hem that with Love dwelle 2750
In servyse; for peyne hem sleeth,
And that ech man wolde flee the deeth,
And trowe they shulde never escape,
Nere that hope couthe hem make
Glad as man in prisoun set, 2755
And may not geten for to et
But barly-breed, and watir pure,
And lyeth in vermin and in ordure;
With alle this, yit can he live,
Good hope such comfort hath him yive, 2760
Which maketh wene that he shal be
Delivered and come to liberte;
In fortune is [his] fulle trust.
Though he lye in strawe or dust,
In hope is al his susteyning. 2765
And so for lovers, in hir wening,
Whiche Love hath shit in his prisoun;
Good-Hope is hir salvacioun.
Good-Hope, how sore that they smerte,
Yeveth hem bothe wille and herte 2770
To profre hir body to martyre;
For Hope so sore doth hem desyre
To suffre ech harm that men devyse,
For Ioye that aftir shal aryse.
Hope, in desire [to] cacche victorie; 2775
In Hope, of love is al the glorie,
For Hope is al that love may yive;
Nere Hope, ther shulde no lover live.
Blessid be Hope, which with desyre
Avaunceth lovers in such manere. 2780
Good-Hope is curteis for to plese,
To kepe lovers from al disese.
Hope kepith his lond, and wol abyde,
For any peril that may betyde;
For Hope to lovers, as most cheef, 2785
Doth hem enduren al mischeef;
Hope is her help, whan mister is.
And I shal yeve thee eek, y-wis,
Three other thingis, that greet solas
Doth to hem that be in my las. 2790
'The firste good that may be founde,
To hem that in my lace be bounde,
Is Swete-Thought, for to recorde
Thing wherwith thou canst accorde
Best in thyn herte, wher she be; 2795
Thought in absence is good to thee.
Whan any lover doth compleyne,
And liveth in distresse and peyne,
Than Swete-Thought shal come, as blyve,
Awey his angre for to dryve. 2800
It makith lovers have remembraunce
Of comfort, and of high plesaunce,
That Hope hath hight him for to winne.
For Thought anoon than shal biginne,
As fer, god wot, as he can finde, 2805
To make a mirrour of his minde;
For to biholde he wol not lette.
Hir person he shal afore him sette,
Hir laughing eyen, persaunt and clere,
Hir shape, hir fourme, hir goodly chere, 2810
Hir mouth that is so gracious,
So swete, and eek so saverous;
Of alle hir fetures he shal take heede,
His eyen with alle hir limes fede.
'Thus Swete-Thenking shal aswage 2815
The peyne of lovers, and hir rage.
Thy Ioye shal double, withoute gesse,
Whan thou thenkist on hir semlinesse,
Or of hir laughing, or of hir chere,
That to thee made thy lady dere. 2820
This comfort wol I that thou take;
And if the next thou wolt forsake
Which is not lesse saverous,
Thou shuldist been to daungerous.
'The secounde shal be Swete-Speche, 2825
That hath to many oon be leche,
To bringe hem out of wo and were,
And helpe many a bachilere;
And many a lady sent socoure,
That have loved par-amour, 2830
Through speking, whan they mighten here
Of hir lovers, to hem so dere.
To [hem] it voidith al hir smerte,
The which is closed in hir herte.
In herte it makith hem glad and light, 2835
Speche, whan they mowe have sight.
And therfore now it cometh to minde,
In olde dawes, as I finde,
That clerkis writen that hir knewe
Ther was a lady fresh of hewe, 2840
Which of hir love made a song
On him for to remembre among,
In which she seide, "Whan that I here
Speken of him that is so dere,
To me it voidith al [my] smerte, 2845
Y-wis, he sit so nere myn herte.
To speke of him, at eve or morwe,
It cureth me of al my sorwe.
To me is noon so high plesaunce
As of his persone daliaunce. " 2850
She wist ful wel that Swete-Speking
Comfortith in ful muche thing.
Hir love she had ful wel assayed,
Of him she was ful wel apayed;
To speke of him hir Ioye was set. 2855
Therfore I rede thee that thou get
A felowe that can wel concele
And kepe thy counsel, and wel hele,
To whom go shewe hoolly thyn herte,
Bothe wele and wo, Ioye and smerte: 2860
To gete comfort to him thou go,
And privily, bitween yow two,
Ye shal speke of that goodly thing,
That hath thyn herte in hir keping;
Of hir beaute and hir semblaunce, 2865
And of hir goodly countenaunce.
Of al thy state thou shalt him sey,
And aske him counseil how thou may
Do any thing that may hir plese;
For it to thee shal do gret ese, 2870
That he may wite thou trust him so,
Bothe of thy wele and of thy wo.
And if his herte to love be set,
His companye is muche the bet,
For resoun wol, he shewe to thee 2875
Al uttirly his privite;
And what she is he loveth so,
To thee pleynly he shal undo,
Withoute drede of any shame,
Bothe telle hir renoun and hir name. 2880
Than shal he forther, ferre and nere,
And namely to thy lady dere,
In siker wyse; ye, every other
Shal helpen as his owne brother,
In trouthe withoute doublenesse, 2885
And kepen cloos in sikernesse.
For it is noble thing, in fay,
To have a man thou darst say
Thy prive counsel every del;
For that wol comfort thee right wel, 2890
And thou shall holde thee wel apayed,
Whan such a freend thou hast assayed.
'The thridde good of greet comfort
That yeveth to lovers most disport,
Comith of sight and biholding, 2895
That clepid is Swete-Loking,
The whiche may noon ese do,
Whan thou art fer thy lady fro;
Wherfore thou prese alwey to be
In place, where thou mayst hir se. 2900
For it is thing most amerous,
Most delitable and saverous,
For to aswage a mannes sorowe,
To sene his lady by the morowe.
For it is a ful noble thing 2905
Whan thyn eyen have meting
With that relyke precious,
Wherof they be so desirous.
But al day after, soth it is,
They have no drede to faren amis, 2910
They dreden neither wind ne reyn,
Ne [yit] non other maner peyn.
For whan thyn eyen were thus in blis,
Yit of hir curtesye, y-wis,
Aloon they can not have hir Ioye, 2915
But to the herte they [it] convoye;
Part of hir blis to him [they] sende,
Of al this harm to make an ende.
The eye is a good messangere,
Which can to the herte in such manere 2920
Tidyngis sende, that [he] hath seen,
To voide him of his peynes cleen.
Wherof the herte reioyseth so
That a gret party of his wo
Is voided, and put awey to flight. 2925
Right as the derknesse of the night
Is chased with clerenesse of the mone,
Right so is al his wo ful sone
Devoided clene, whan that the sight
Biholden may that fresshe wight 2930
That the herte desyreth so,
That al his derknesse is ago;
For than the herte is al at ese,
Whan they seen that [that] may hem plese.
'Now have I thee declared alout, 2935
Of that thou were in drede and dout;
For I have told thee feithfully
What thee may curen utterly,
And alle lovers that wole be
Feithful, and ful of stabilite. 2940
Good-Hope alwey kepe by thy syde,
And Swete-Thought make eek abyde,
Swete-Loking and Swete-Speche;
Of alle thyn harmes they shal be leche.
Of every thou shalt have greet plesaunce; 2945
If thou canst byde in sufferaunce,
And serve wel without feyntyse,
Thou shalt be quit of thyn empryse,
With more guerdoun, if that thou live;
But al this tyme this I thee yive. ' 2950
The God of Love whan al the day
Had taught me, as ye have herd say,
And enfourmed compendiously,
He vanished awey al sodeynly,
And I alone lefte, al sole, 2955
So ful of compleynt and of dole,
For I saw no man ther me by.
My woundes me greved wondirly;
Me for to curen no-thing I knew,
Save the botoun bright of hew, 2960
Wheron was set hoolly my thought;
Of other comfort knew I nought,
But it were through the God of Love;
I knew nat elles to my bihove
That might me ese or comfort gete, 2965
But-if he wolde him entermete.
The roser was, withoute doute,
Closed with an hegge withoute,
As ye to-forn have herd me seyn;
And fast I bisied, and wolde fayn 2970
Have passed the haye, if I might
Have geten in by any slight
Unto the botoun so fair to see.
But ever I dradde blamed to be,
If men wolde have suspeccioun 2975
That I wolde of entencioun
Have stole the roses that ther were;
Therfore to entre I was in fere.
But at the last, as I bithought
Whether I sholde passe or nought, 2980
I saw come with a gladde chere
To me, a lusty bachelere,
Of good stature, and of good hight,
And Bialacoil forsothe he hight.
Sone he was to Curtesy, 2985
And he me graunted ful gladly
The passage of the outer hay,
And seide:--'Sir, how that ye may
Passe, if [it] your wille be,
The fresshe roser for to see, 2990
And ye the swete savour fele.
Your warrant may [I be] right wele;
So thou thee kepe fro folye,
Shal no man do thee vilanye.
If I may helpe you in ought, 2995
I shal not feyne, dredeth nought;
For I am bounde to your servyse,
Fully devoide of feyntyse. '
Than unto Bialacoil saide I,
'I thank you, sir, ful hertely, 3000
And your biheest [I] take at gree,
That ye so goodly prefer me;
To you it cometh of greet fraunchyse,
That ye me prefer your servyse. '
Than aftir, ful deliverly, 3005
Through the breres anoon wente I,
Wherof encombred was the hay.
I was wel plesed, the soth to say,
To see the botoun fair and swote,
So fresshe spronge out of the rote. 3010
And Bialacoil me served wel,
Whan I so nygh me mighte fele
Of the botoun the swete odour,
And so lusty hewed of colour.
But than a cherl (foule him bityde! ) 3015
Bisyde the roses gan him hyde,
To kepe the roses of that roser,
Of whom the name was Daunger.
This cherl was hid there in the greves,
Covered with grasse and with leves, 3020
To spye and take whom that he fond
Unto that roser putte an hond.
He was not sole, for ther was mo;
For with him were other two
Of wikkid maners, and yvel fame. 3025
That oon was clepid, by his name,
Wikked-Tonge, god yeve him sorwe!
For neither at eve, ne at morwe,
He can of no man [no] good speke;
On many a Iust man doth he wreke. 3030
Ther was a womman eek, that hight
Shame, that, who can reken right,
Trespas was hir fadir name,
Hir moder Resoun; and thus was Shame
[On lyve] brought of these ilk two. 3035
And yit had Trespas never ado
With Resoun, ne never ley hir by,
He was so hidous and ugly,
I mene, this that Trespas hight;
But Resoun conceyveth, of a sight, 3040
Shame, of that I spak aforn.
And whan that Shame was thus born,
It was ordeyned, that Chastitee
Shulde of the roser lady be,
Which, of the botouns more and las, 3045
With sondry folk assailed was,
That she ne wiste what to do.
For Venus hir assailith so,
That night and day from hir she stal
Botouns and roses over-al. 3050
To Resoun than prayeth Chastitee,
Whom Venus flemed over the see,
That she hir doughter wolde hir lene,
To kepe the roser fresh and grene.
Anoon Resoun to Chastitee 3055
Is fully assented that it be,
And grauntid hir, at hir request,
That Shame, bicause she is honest,
Shal keper of the roser be.
And thus to kepe it ther were three, 3060
That noon shulde hardy be ne bold
(Were he yong, or were he old)
Ageyn hir wille awey to bere
Botouns ne roses, that ther were.
I had wel sped, had I not been 3065
Awayted with these three, and seen.
For Bialacoil, that was so fair,
So gracious and debonair,
Quitte him to me ful curteisly,
And, me to plese, bad that I 3070
Shuld drawe me to the botoun nere;
Prese in, to touche the rosere
Which bar the roses, he yaf me leve;
This graunt ne might but litel greve.
And for he saw it lyked me, 3075
Right nygh the botoun pullede he
A leef al grene, and yaf me that,
The which ful nygh the botoun sat;
I made [me] of that leef ful queynt.
And whan I felte I was aqueynt 3080
With Bialacoil, and so prive,
I wende al at my wille had be.
Than wex I hardy for to tel
To Bialacoil how me bifel
Of Love, that took and wounded me, 3085
And seide: 'Sir, so mote I thee,
I may no loye have in no wyse,
Upon no syde, but it ryse;
For sithe (if I shal not feyne)
In herte I have had so gret peyne, 3090
So gret annoy, and such affray,
That I ne wot what I shal say;
I drede your wrath to disserve.
Lever me were, that knyves kerve
My body shulde in pecis smalle, 3095
Than in any wyse it shulde falle
That ye wratthed shulde been with me. '
Sey boldely thy wille,' quod he,
I nil be wroth, if that I may,
For nought that thou shalt to me say. ' 3100
Thanne seide I, 'Sir, not you displese
To knowen of my greet unese,
In which only love hath me brought;
For peynes greet, disese and thought,
Fro day to day he doth me drye; 3105
Supposeth not, sir, that I lye.
In me fyve woundes dide he make,
The sore of whiche shal never slake
But ye the botoun graunte me,
Which is most passaunt of beautee, 3110
My lyf, my deth, and my martyre,
And tresour that I most desyre. '
Than Bialacoil, affrayed all,
Seyde, 'Sir, it may not fall;
That ye desire, it may not ryse. 3115
What? wolde ye shende me in this wyse?
A mochel foole than I were,
If I suffrid you awey to bere
The fresh botoun, so fair of sight.
For it were neither skile ne right 3120
Of the roser ye broke the rind,
Or take the rose aforn his kind;
Ye ar not courteys to aske it.
Lat it stil on the roser sit,
And growe til it amended be, 3125
And parfitly come to beaute.
I nolde not that it pulled wer
Fro the roser that it ber,
To me it is so leef and dere. '
With that sterte out anoon Daungere, 3130
Out of the place where he was hid.
His malice in his chere was kid;
Ful greet he was, and blak of hewe,
Sturdy and hidous, who-so him knewe;
Like sharp urchouns his here was growe, 3135
His eyes rede as the fire-glow;
His nose frounced ful kirked stood,
He com criand as he were wood,
And seide, 'Bialacoil, tel me why
Thou bringest hider so boldly 3140
Him that so nygh [is] the roser?
Thou worchist in a wrong maner;
He thenkith to dishonour thee,
Thou art wel worthy to have maugree
To late him of the roser wit; 3145
Who serveth a feloun is yvel quit.
Thou woldist have doon greet bountee,
And he with shame wolde quyte thee.
Flee hennes, felowe! I rede thee go!
It wanteth litel I wol thee slo; 3150
For Bialacoil ne knew thee nought,
Whan thee to serve he sette his thought;
For thou wolt shame him, if thou might,
Bothe ageyn resoun and right.
I wol no more in thee affye, 3155
That comest so slyghly for tespye;
For it preveth wonder wel,
Thy slight and tresoun every del. '
I durst no more ther make abode,
For the cherl, he was so wode; 3160
So gan he threten and manace,
And thurgh the haye he did me chace.
For feer of him I tremblid and quook,
So cherlishly his heed he shook;
And seide, if eft he might me take, 3165
I shulde not from his hondis scape.
Than Bialacoil is fled and mate,
And I al sole, disconsolate,
Was left aloon in peyne and thought;
For shame, to deth I was nygh brought. 3170
Than thought I on myn high foly,
How that my body, utterly,
Was yeve to peyne and to martyre;
And therto hadde I so gret yre,
That I ne durst the hayes passe; 3175
There was non hope, there was no grace.
I trowe never man wiste of peyne,
But he were laced in Loves cheyne;
Ne no man [wot], and sooth it is,
But-if he love, what anger is. 3180
Love holdith his heest to me right wele,
Whan peyne he seide I shulde fele.
Non herte may thenke, ne tunge seyne,
A quarter of my wo and peyne.
I might not with the anger laste; 3185
Myn herte in poynt was for to braste,
Whan I thought on the rose, that so
Was through Daunger cast me froo.
A long whyl stood I in that state,
Til that me saugh so mad and mate 3190
The lady of the highe ward,
Which from hir tour lokid thiderward.
Resoun men clepe that lady,
Which from hir tour deliverly
Come doun to me withouten more. 3195
But she was neither yong, ne hore,
Ne high ne low, ne fat ne lene,
But best, as it were in a mene.
Hir eyen two were cleer and light
As any candel that brenneth bright; 3200
And on hir heed she hadde a crown.
Hir semede wel an high persoun;
For rounde enviroun, hir crownet
Was ful of riche stonis fret.
Hir goodly semblaunt, by devys, 3205
I trowe were maad in paradys;
Nature had never such a grace,
To forge a werk of such compace.
For certeyn, but the letter lye,
God him-silf, that is so high, 3210
Made hir aftir his image,
And yaf hir sith sich avauntage,
That she hath might and seignorye
To kepe men from al folye;
Who-so wole trowe hir lore, 3215
Ne may offenden nevermore.
And whyl I stood thus derk and pale,
Resoun bigan to me hir tale;
She seide: 'Al hayl, my swete frend!
Foly and childhood wol thee shend, 3220
Which thee have put in greet affray;
Thou hast bought dere the tyme of May,
That made thyn herte mery to be.
In yvel tyme thou wentist to see
The gardin, wherof Ydilnesse 3225
Bar the keye, and was maistresse
Whan thou yedest in the daunce
With hir, and haddest aqueyntaunce:
Hir aqueyntaunce is perilous,
First softe, and aftir[ward] noyous; 3230
She hath [thee] trasshed, withoute ween;
The God of Love had thee not seen,
Ne hadde Ydilnesse thee conveyed
In the verger where Mirthe him pleyed.
If Foly have supprised thee, 3235
Do so that it recovered be;
And be wel war to take no more
Counsel, that greveth aftir sore;
He is wys that wol himsilf chastyse.
And though a young man in any wyse 3240
Trespace among, and do foly,
Lat him not tarye, but hastily
Lat him amende what so be mis.
And eek I counseile thee, y-wis,
The God of Love hoolly foryet, 3245
That hath thee in sich peyne set,
And thee in herte tormented so.
I can nat seen how thou mayst go
Other weyes to garisoun;
For Daunger, that is so feloun, 3250
Felly purposith thee to werrey,
Which is ful cruel, the soth to sey.
'And yit of Daunger cometh no blame,
In reward of my doughter Shame,
Which hath the roses in hir warde, 3255
As she that may be no musarde.
And Wikked-Tunge is with these two,
That suffrith no man thider go;
For er a thing be do, he shal,
Where that he cometh, over-al, 3260
In fourty places, if it be sought,
Seye thing that never was doon ne wrought;
So moche tresoun is in his male,
Of falsnesse for to [feyne] a tale.
Thou delest with angry folk, y-wis; 3265
Wherfor to thee [it] bettir is
From these folk awey to fare,
For they wol make thee live in care.
This is the yvel that Love they calle,
Wherin ther is but foly alle, 3270
For love is foly everydel;
Who loveth, in no wyse may do wel,
Ne sette his thought on no good werk.
His scole he lesith, if he be clerk;
Of other craft eek if he be, 3275
He shal not thryve therin; for he
In love shal have more passioun
Than monke, hermyte, or chanoun.
The peyne is hard, out of mesure,
The Ioye may eek no whyl endure; 3280
And in the possessioun
Is muche tribulacioun;
The Ioye it is so short-lasting,
And but in happe is the geting;
For I see ther many in travaille, 3285
That atte laste foule fayle.
I was no-thing thy counseler,
Whan thou were maad the homager
Of God of Love to hastily;
Ther was no wisdom, but foly. 3290
Thyn herte was Ioly, but not sage,
Whan thou were brought in sich a rage,
To yelde thee so redily,
And to Love, of his gret maistry.
'I rede thee Love awey to dryve, 3295
That makith thee recche not of thy lyve.
The foly more fro day to day
Shal growe, but thou it putte away.
Take with thy teeth the bridel faste,
To daunte thyn herte; and eek thee caste, 3300
If that thou mayst, to gete defence
For to redresse thy first offence.
Who-so his herte alwey wol leve,
Shal finde among that shal him greve'
Whan I hir herd thus me chastyse, 3305
I answerd in ful angry wyse.
I prayed hir cessen of hir speche,
Outher to chastyse me or teche,
To bidde me my thought refreyne,
Which Love hath caught in his demeyne:-- 3310
What? wene ye Love wol consent,
That me assailith with bowe bent,
To draw myn herte out of his honde,
Which is so quikly in his bonde?
That ye counsayle, may never be; 3315
For whan he first arested me,
He took myn herte so hool him til,
That it is no-thing at my wil;
He [taughte] it so him for to obey,
That he it sparred with a key. 3320
I pray yow lat me be al stille.
For ye may wel, if that ye wille,
Your wordis waste in idilnesse;
For utterly, withouten gesse,
Al that ye seyn is but in veyne. 3325
Me were lever dye in the peyne,
Than Love to me-ward shulde arette
Falsheed, or tresoun on me sette.
I wol me gete prys or blame,
And love trewe, to save my name; 3330
Who me chastysith, I him hate. '
With that word Resoun wente hir gate,
Whan she saugh for no sermoning
She might me fro my foly bring.
Than dismayed, I lefte al sool, 3335
Forwery, forwandred as a fool,
For I ne knew no chevisaunce.
Than fel into my remembraunce,
How Love bade me to purveye
A felowe, to whom I mighte seye 3340
My counsel and my privete,
For that shulde muche availe me.
With that bithought I me, that I
Hadde a felowe faste by,
Trewe and siker, curteys, and hend, 3345
And he was called by name a Freend;
A trewer felowe was no-wher noon.
In haste to him I wente anoon,
And to him al my wo I tolde,
Fro him right nought I wold withholde. 3350
I tolde him al withoute were,
And made my compleynt on Daungere,
How for to see he was hidous,
And to-me-ward contrarious;
The whiche through his cruelte 3355
Was in poynt to have meygned me;
With Bialacoil whan he me sey
Within the gardyn walke and pley,
Fro me he made him for to go,
And I bilefte aloon in wo; 3360
I durst no lenger with him speke,
For Daunger seide he wolde be wreke,
Whan that he sawe how I wente
The fresshe botoun for to hente,
If I were hardy to come neer 3365
Bitwene the hay and the roser.
This Freend, whan he wiste of my thought,
He discomforted me right nought,
But seide, 'Felowe, be not so mad,
Ne so abaysshed nor bistad. 3370
My-silf I knowe ful wel Daungere,
And how he is feers of his chere,
At prime temps, Love to manace;
Ful ofte I have ben in his caas.
A feloun first though that he be, 3375
Aftir thou shalt him souple see.
Of long passed I knew him wele;
Ungoodly first though men him fele,
He wol meek aftir, in his bering,
Been, for service and obeysshing. 3380
I shal thee telle what thou shalt do. --
Mekely I rede thou go him to,
Of herte pray him specialy
Of thy trespace to have mercy,
And hote him wel, [him] here to plese, 3385
That thou shalt nevermore him displese.
Who can best serve of flatery,
Shal plese Daunger most uttirly. '
My Freend hath seid to me so wel,
That he me esid hath somdel, 3390
And eek allegged of my torment;
For through him had I hardement
Agayn to Daunger for to go,
To preve if I might meke him so.
To Daunger cam I, al ashamed, 3395
The which aforn me hadde blamed,
Desyring for to pese my wo;
But over hegge durst I not go,
For he forbad me the passage.
I fond him cruel in his rage, 3400
And in his hond a gret burdoun.
To him I knelid lowe adoun,
Ful meke of port, and simple of chere,
And seide, 'Sir, I am comen here
Only to aske of you mercy. 3405
That greveth me, [sir], ful gretly
That ever my lyf I wratthed you,
But for to amende I am come now,
With al my might, bothe loude and stille,
To doon right at your owne wille; 3410
For Love made me for to do
That I have trespassed hidirto;
Fro whom I ne may withdrawe myn herte;
Yit shal I never, for Ioy ne smerte,
What so bifalle, good or ille, 3415
Offende more ageyn your wille.
Lever I have endure disese
Than do that shulde you displese.
'I you require and pray, that ye
Of me have mercy and pitee, 3420
To stinte your yre that greveth so,
That I wol swere for evermo
To be redressid at your lyking,
If I trespasse in any thing;
Save that I pray thee graunte me 3425
A thing that may nat warned be,
That I may love, al only;
Non other thing of you aske I.
I shal doon elles wel, y-wis,
If of your grace ye graunte me this. 3430
And ye [ne] may not letten me,
For wel wot ye that love is free,
And I shal loven, [sith] that I wil,
Who-ever lyke it wel or il;
And yit ne wold I, for al Fraunce, 3435
Do thing to do you displesaunce. '
Than Daunger fil in his entent
For to foryeve his maltalent;
But al his wratthe yit at laste
He hath relesed, I preyde so faste: 3440
Shortly he seide, 'Thy request
Is not to mochel dishonest;
Ne I wol not werne it thee,
For yit no-thing engreveth me.
For though thou love thus evermore, 3445
To me is neither softe ne sore.
Love wher thee list; what recchith me,
So [thou] fer fro my roses be?
Trust not on me, for noon assay,
In any tyme to passe the hay. ' 3450
Thus hath he graunted my prayere.
Than wente I forth, withouten were,
Unto my Freend, and tolde him al,
Which was right Ioyful of my tale.
He seide, 'Now goth wel thyn affaire, 3455
He shal to thee be debonaire.
Though he aforn was dispitous,
He shal heeraftir be gracious.
If he were touchid on som good veyne,
He shuld yit rewen on thy peyne. 3460
Suffire, I rede, and no boost make,
Til thou at good mes mayst him take.
By suffraunce, and [by] wordis softe,
A man may overcomen ofte
Him that aforn he hadde in drede, 3465
In bookis sothly as I rede. '
Thus hath my Freend with gret comfort
Avaunced me with high disport,
Which wolde me good as mich as I.
And thanne anoon ful sodeynly 3470
I took my leve, and streight I went
Unto the hay; for gret talent
I had to seen the fresh botoun,
Wherin lay my salvacioun;
And Daunger took kepe, if that I 3475
Kepe him covenaunt trewly.
So sore I dradde his manasing,
I durst not breke[n] his bidding;
For, lest that I were of him shent,
I brak not his comaundement, 3480
For to purchase his good wil.
It was [hard] for to come ther-til,
His mercy was to fer bihinde;
I wepte, for I ne might it finde.
I compleyned and sighed sore, 3485
And languisshed evermore,
For I durst not over go
Unto the rose I loved so.
Thurghout my deming outerly,
[Than] had he knowlege certeinly, 3490
[That] Love me ladde in sich a wyse,
That in me ther was no feyntyse,
Falsheed, ne no trecherye.
And yit he, ful of vilanye,
Of disdeyne, and cruelte, 3495
On me ne wolde have pite,
His cruel wil for to refreyne,
Though I wepe alwey, and compleyne.
And while I was in this torment,
Were come of grace, by god sent, 3500
Fraunchyse, and with hir Pite
Fulfild the botoun of bountee.
They go to Daunger anon-right
To forther me with al hir might,
And helpe in worde and in dede, 3505
For wel they saugh that it was nede.
First, of hir grace, dame Fraunchyse
Hath taken [word] of this empryse:
She seide, 'Daunger, gret wrong ye do
To worche this man so muche wo, 3510
Or pynen him so angerly;
It is to you gret vilany.
I can not see why, ne how,
That he hath trespassed ageyn you,
Save that he loveth; wherfore ye shulde 3515
The more in cherete of him holde.
The force of love makith him do this;
Who wolde him blame he dide amis?
He leseth more than ye may do;
His peyne is hard, ye may see, lo! 3520
And Love in no wyse wolde consente
That [he] have power to repente;
For though that quik ye wolde him sloo,
Fro Love his herte may not go.
Now, swete sir, is it your ese 3525
Him for to angre or disese?
Allas, what may it you avaunce
To doon to him so greet grevaunce?
What worship is it agayn him take,
Or on your man a werre make, 3530
Sith he so lowly every wyse
Is redy, as ye lust devyse?
If Love hath caught him in his lace,
You for tobeye in every caas,
And been your suget at your wille, 3535
Shulde ye therfore willen him ille?
Ye shulde him spare more, al-out,
Than him that is bothe proud and stout.
Curtesye wol that ye socour
Hem that ben meke undir your cure. 3540
His herte is hard, that wole not meke,
Whan men of mekenesse him biseke. '
'That is certeyn,' seide Pite;
We see ofte that humilitee
Bothe ire, and also felonye 3545
Venquissheth, and also melancolye;
To stonde forth in such duresse,
This crueltee and wikkednesse.
Wherfore I pray you, sir Daungere,
For to mayntene no lenger here 3550
Such cruel werre agayn your man,
As hoolly youres as ever he can;
Nor that ye worchen no more wo
On this caytif that languisshith so,
Which wol no more to you trespasse, 3555
But put him hoolly in your grace.
His offense ne was but lyte;
The God of Love it was to wyte,
That he your thral so gretly is,
And if ye harm him, ye doon amis; 3560
For he hath had ful hard penaunce,
Sith that ye refte him thaqueyntaunce
Of Bialacoil, his moste Ioye,
Which alle his peynes might acoye.
He was biforn anoyed sore, 3565
But than ye doubled him wel more;
For he of blis hath ben ful bare,
Sith Bialacoil was fro him fare.
Love hath to him do greet distresse,
He hath no nede of more duresse. 3570
Voideth from him your ire, I rede;
Ye may not winnen in this dede.
Makith Bialacoil repeire ageyn,
And haveth pite upon his peyn;
For Fraunchise wol, and I, Pite, 3575
That merciful to him ye be;
And sith that she and I accorde,
Have upon him misericorde;
For I you pray, and eek moneste,
Nought to refusen our requeste; 3580
For he is hard and fel of thought,
That for us two wol do right nought. '
Daunger ne might no more endure,
He meked him unto mesure.
'I wol in no wyse,' seith Daungere, 3585
Denye that ye have asked here;
It were to greet uncurtesye.
I wol ye have the companye
Of Bialacoil, as ye devyse;
I wol him letten in no wyse. ' 3590
To Bialacoil than wente in hy
Fraunchyse, and seide ful curteisly:--
Ye have to longe be deignous
Unto this lover, and daungerous,
Fro him to withdrawe your presence, 3595
Which hath do to him grete offence,
That ye not wolde upon him see;
Wherfore a sorowful man is he.
Shape ye to paye him, and to plese,
Of my love if ye wol have ese. 3600
Fulfil his wil, sith that ye knowe
Daunger is daunted and brought lowe
Thurgh help of me and of Pite;
You [thar] no more afered be. '
'I shal do right as ye wil,' 3605
Saith Bialacoil, 'for it is skil,
Sith Daunger wol that it so be. '
Than Fraunchise hath him sent to me.
Bialacoil at the biginning
Salued me in his coming. 3610
No straungenes was in him seen,
No more than he ne had wrathed been.
As faire semblaunt than shewed he me,
And goodly, as aforn did he;
And by the honde, withouten doute, 3615
Within the haye, right al aboute
He ladde me, with right good chere,
Al environ the vergere,
That Daunger had me chased fro.
Now have I leve over-al to go; 3620
Now am I raised, at my devys,
Fro helle unto paradys.
Thus Bialacoil, of gentilnesse,
With alle his peyne and besinesse,
Hath shewed me, only of grace, 3625
The estres of the swote place.
I saw the rose, whan I was nigh,
Was gretter woxen, and more high,
Fresh, rody, and fair of hewe,
Of colour ever yliche newe. 3630
And whan I had it longe seen,
I saugh that through the leves grene
The rose spredde to spanishing;
To sene it was a goodly thing.
But it ne was so spred on brede, 3635
That men within might knowe the sede;
For it covert was and [en]close
Bothe with the leves and with the rose.
The stalk was even and grene upright,
It was theron a goodly sight; 3640
And wel the better, withouten wene,
For the seed was not [y]-sene.
Ful faire it spradde, [god it] blesse!
For suche another, as I gesse,
Aforn ne was, ne more vermayle. 3645
I was abawed for merveyle,
For ever, the fairer that it was,
The more I am bounden in Loves laas.
Longe I abood there, soth to saye,
Til Bialacoil I gan to praye, 3650
Whan that I saw him in no wyse
To me warnen his servyse,
That he me wolde graunte a thing,
Which to remembre is wel sitting;
This is to sayne, that of his grace 3655
He wolde me yeve leyser and space
To me that was so desirous
To have a kissing precious
Of the goodly freshe rose,
That swetely smelleth in my nose; 3660
For if it you displesed nought,
I wolde gladly, as I have sought,
Have a cos therof freely
Of your yeft; for certainly
I wol non have but by your leve, 3665
So loth me were you for to greve. '
He sayde, 'Frend, so god me spede,
Of Chastite I have suche drede,
Thou shuldest not warned be for me,
But I dar not, for Chastite. 3670
Agayn hir dar I not misdo,
For alwey biddeth she me so
To yeve no lover leve to kisse;
For who therto may winnen, y-wis,
He of the surplus of the pray 3675
May live in hope to get som day.
For who so kissing may attayne,
Of loves peyne hath, soth to sayne,
The beste and most avenaunt,
And ernest of the remenaunt. ' 3680
Of his answere I syghed sore;
I durst assaye him tho no more,
I had such drede to greve him ay.
A man shulde not to muche assaye
To chafe his frend out of mesure, 3685
Nor put his lyf in aventure;
For no man at the firste stroke
Ne may nat felle doun an oke;
Nor of the reisins have the wyne,
Til grapes rype and wel afyne 3690
Be sore empressid, I you ensure,
And drawen out of the pressure.
But I, forpeyned wonder stronge,
[Thought] that I abood right longe
Aftir the kis, in peyne and wo, 3695
Sith I to kis desyred so:
Til that, [rewing] on my distresse,
Ther [to me] Venus the goddesse,
Which ay werreyeth Chastite,
Came of hir grace, to socoure me, 3700
Whos might is knowe fer and wyde,
For she is modir of Cupyde,
The God of Love, blinde as stoon,
That helpith lovers many oon.
This lady brought in hir right hond 3705
Of brenning fyr a blasing brond;
Wherof the flawme and hote fyr
Hath many a lady in desyr
Of love brought, and sore het,
And in hir servise hir hertes set. 3710
This lady was of good entayle,
Right wondirful of apparayle;
By hir atyre so bright and shene,
Men might perceyve wel, and seen,
She was not of religioun. 3715
Nor I nil make mencioun
Nor of [hir] robe, nor of tresour,
Of broche, [nor] of hir riche attour;
Ne of hir girdil aboute hir syde,
For that I nil not long abyde. 3720
But knowith wel, that certeynly
She was arayed richely.
Devoyd of pryde certeyn she was;
To Bialacoil she wente a pas,
And to him shortly, in a clause, 3725
She seide: 'Sir, what is the cause
Ye been of port so daungerous
Unto this lover, and deynous,
To graunte him no-thing but a kis?
To werne it him ye doon amis; 3730
Sith wel ye wote, how that he
Is Loves servaunt, as ye may see,
And hath beaute, wher-through [he] is
Worthy of love to have the blis.
How he is semely, biholde and see, 3735
How he is fair, how he is free,
How he is swote and debonair,
Of age yong, lusty, and fair.
Ther is no lady so hauteyne,
Duchesse, countesse, ne chasteleyne, 3740
That I nolde holde hir ungoodly
For to refuse him outerly.
His breeth is also good and swete,
And eke his lippis rody, and mete
Only to pleyen, and to kisse. 3745
Graunte him a kis, of gentilnesse!
His teeth arn also whyte and clene;
Me thinkith wrong, withouten wene,
If ye now werne him, trustith me,
To graunte that a kis have he; 3750
The lasse [to] helpe him that ye haste,
The more tyme shul ye waste. '
Whan the flawme of the verry brond,
That Venus brought in hir right hond,
Had Bialacoil with hete smete, 3755
Anoon he bad, withouten lette,
Graunte to me the rose kisse.
Than of my peyne I gan to lisse,
And to the rose anoon wente I,
And kissid it ful feithfully. 3760
Thar no man aske if I was blythe,
Whan the savour soft and lythe
Strook to myn herte withoute more,
And me alegged of my sore,
So was I ful of Ioye and blisse. 3765
It is fair sich a flour to kisse,
It was so swote and saverous.
I might not be so anguisshous,
That I mote glad and Ioly be,
Whan that I remembre me. 3770
Yit ever among, sothly to seyn,
I suffre noye and moche peyn.
The see may never be so stil,
That with a litel winde it [nil]
Overwhelme and turne also, 3775
As it were wood, in wawis go.
Aftir the calm the trouble sone
Mot folowe, and chaunge as the mone.
Right so farith Love, that selde in oon
Holdith his anker; for right anoon 3780
Whan they in ese wene best to live,
They been with tempest al fordrive.
Who serveth Love, can telle of wo;
The stoundemele Ioye mot overgo.
Now he hurteth, and now he cureth, 3785
For selde in oo poynt Love endureth.
Now is it right me to procede,
How Shame gan medle and take hede,
Thurgh whom felle angres I have had;
And how the stronge wal was maad, 3790
And the castell of brede and lengthe,
That God of Love wan with his strengthe.
Al this in romance wil I sette,
And for no-thing ne wil I lette,
So that it lyking to hir be, 3795
That is the flour of beaute;
For she may best my labour quyte,
That I for hir love shal endyte.
Wikkid-Tunge, that the covyne
Of every lover can devyne 3800
Worst, and addith more somdel,
(For Wikkid-Tunge seith never wel),
To me-ward bar he right gret hate,
Espying me erly and late,
Til he hath seen the grete chere 3805
Of Bialacoil and me y-fere.
He mighte not his tunge withstonde
Worse to reporte than he fonde,
He was so ful of cursed rage;
It sat him wel of his linage, 3810
For him an Irish womman bar.
His tunge was fyled sharp, and squar,
Poignaunt and right kerving,
And wonder bitter in speking.
For whan that he me gan espye, 3815
He swoor, afferming sikirly,
Bitwene Bialacoil and me
Was yvel aquayntaunce and privee.
He spak therof so folily,
That he awakid Ielousy; 3820
Which, al afrayed in his rysing,
Whan that he herde [him] Iangling,
He ran anoon, as he were wood,
To Bialacoil ther that he stood;
Which hadde lever in this caas 3825
Have been at Reynes or Amyas;
For foot-hoot, in his felonye
To him thus seide Ielousye:--
Why hast thou been so necligent,
To kepen, whan I was absent, 3830
This verger here left in thy ward?
To me thou haddist no reward,
To truste (to thy confusioun)
Him thus, to whom suspeccioun
I have right greet, for it is nede; 3835
It is wel shewed by the dede.
Greet faute in thee now have I founde;
By god, anoon thou shalt be bounde,
And faste loken in a tour,
Withoute refuyt or socour. 3840
For Shame to long hath be thee fro;
Over sone she was agoo.
Whan thou hast lost bothe drede and fere,
It semed wel she was not here.
She was [not] bisy, in no wyse, 3845
To kepe thee and [to] chastyse,
And for to helpen Chastitee
To kepe the roser, as thinkith me.
For than this boy-knave so boldely
Ne sholde not have be hardy, 3850
[Ne] in this verger had such game,
Which now me turneth to gret shame. '
Bialacoil nist what to sey;
Ful fayn he wolde have fled awey,
For fere han hid, nere that he 3855
Al sodeynly took him with me.
And whan I saugh he hadde so,
This Ielousye, take us two,
I was astoned, and knew no rede,
But fledde awey for verrey drede. 3860
Than Shame cam forth ful simply;
She wende have trespaced ful gretly;
Humble of hir port, and made it simple,
Wering a vayle in stede of wimple,
As nonnis doon in hir abbey. 3865
Bicause hir herte was in affray,
She gan to speke, within a throwe,
To Ielousye, right wonder lowe.
First of his grace she bisought,
And seide:--'Sire, ne leveth nought 3870
Wikkid-Tunge, that fals espye,
Which is so glad to feyne and lye.
He hath you maad, thurgh flatering,
On Bialacoil a fals lesing.
His falsnesse is not now anew, 3875
It is to long that he him knew.
This is not the firste day;
For Wikkid-Tunge hath custom ay
Yonge folkis to bewreye,
And false lesinges on hem leye. 3880
'Yit nevertheles I see among,
That the loigne it is so longe
Of Bialacoil, hertis to lure,
In Loves servise for to endure,
Drawing suche folk him to, 3885
That he had no-thing with to do;
But in sothnesse I trowe nought,
That Bialacoil hadde ever in thought
To do trespace or vilanye;
But, for his modir Curtesye 3890
Hath taught him ever [for] to be
Good of aqueyntaunce and privee;
For he loveth non hevinesse,
But mirthe and pley, and al gladnesse;
He hateth alle [trecherous], 3895
Soleyn folk and envious;
For [wel] ye witen how that he
Wol ever glad and Ioyful be
Honestly with folk to pley.
I have be negligent, in good fey, 3900
To chastise him; therfore now I
Of herte crye you here mercy,
That I have been so recheles
To tamen him, withouten lees.
Of my foly I me repente; 3905
Now wol I hool sette myn entente
To kepe, bothe [loude] and stille,
Bialacoil to do your wille. '
'Shame, Shame,' seyde Ielousy,
'To be bitrasshed gret drede have I. 3910
Lecherye hath clombe so hye,
That almost blered is myn ye;
No wonder is, if that drede have I.
Over-al regnith Lechery,
Whos might [yit] growith night and day. 3915
Bothe in cloistre and in abbey
Chastite is werreyed over-al.
Therfore I wol with siker wal
Close bothe roses and roser.
I have to longe in this maner 3920
Left hem unclosid wilfully;
Wherfore I am right inwardly
Sorowful and repente me.
But now they shal no lenger be
Unclosid; and yit I drede sore, 3925
I shal repente ferthermore,
For the game goth al amis.