No More Learning

I there wi' something did forgather,
That put me in an eerie swither;
An awfu' scythe, out-owre ae shouther,
Clear-dangling, hang;
A three-taed leister on the ither
Lay, large an' lang.

Its stature seem'd lang Scotch ells twa,
The queerest shape that e'er I saw,
For fient a wame it had ava:
And then, its shanks,
They were as thin, as sharp an' sma'
As cheeks o' branks.

"Guid-een," quo' I; "Friend, hae ye been mawin,
When ither folk are busy sawin? "
It seem'd to mak a kind o' stan',
But naething spak;
At length, says I, "Friend, where ye gaun,
Will ye go back? "

It spak right howe,--"My name is Death,
But be na fley'd. "--Quoth I, "Guid faith,
Ye're may be come to stap my breath;
But tent me, billie;
I red ye weel, take care o' skaith,
See, there's a gully! "

"Guidman," quo' he, "put up your whittle,
I'm no design'd to try its mettle;
But if I did, I wad be kittle
To be mislear'd,
I wad nae mind it, no that spittle
Out-owre my beard. "

"Weel, weel! " says I, "a bargain be't;
Come, gies your hand, an' sae we're gree't;
We'll ease our shanks an' tak a seat,
Come, gies your news!
This while ye hae been mony a gate
At mony a house.

"Ay, ay! " quo' he, an' shook his head,
"It's e'en a lang, lang time indeed
Sin' I began to nick the thread,
An' choke the breath:
Folk maun do something for their bread,
An' sae maun Death.

"Sax thousand years are near hand fled
Sin' I was to the butching bred,
An' mony a scheme in vain's been laid,
To stap or scar me;
Till ane Hornbook's ta'en up the trade,
An' faith, he'll waur me.

"Ye ken Jock Hornbook i' the Clachan,
Deil mak his kings-hood in a spleuchan!
He's grown sae weel acquaint wi' Buchan[6]
An' ither chaps,
The weans haud out their fingers laughin
And pouk my hips.

"See, here's a scythe, and there's a dart,
They hae pierc'd mony a gallant heart;
But Doctor Hornbook, wi' his art
And cursed skill,
Has made them baith no worth a f----t,
Damn'd haet they'll kill.

"'Twas but yestreen, nae farther gaen,
I threw a noble throw at ane;
Wi' less, I'm sure, I've hundreds slain;
But-deil-ma-care,
It just play'd dirl on the bane,
But did nae mair.

"Hornbook was by, wi' ready art,
And had sae fortified the part,
That when I looked to my dart,
It was sae blunt,
Fient haet o't wad hae pierc'd the heart
Of a kail-runt.

"I drew my scythe in sic a fury,
I near-hand cowpit wi' my hurry,
But yet the bauld Apothecary,
Withstood the shock;
I might as weel hae tried a quarry
O' hard whin rock.

"Ev'n them he canna get attended,
Although their face he ne'er had kend it,
Just sh---- in a kail-blade, and send it,
As soon's he smells't,
Baith their disease, and what will mend it,
At once he tells't.

"And then a' doctor's saws and whittles,
Of a' dimensions, shapes, an' mettles,
A' kinds o' boxes, mugs, an' bottles,
He's sure to hae;
Their Latin names as fast he rattles
As A B C.

"Calces o' fossils, earths, and trees;
True sal-marinum o' the seas;
The farina of beans and pease,
He has't in plenty;
Aqua-fortis, what you please,
He can content ye.

"Forbye some new, uncommon weapons,
Urinus spiritus of capons;
Or mite-horn shavings, filings, scrapings,
Distill'd _per se_;
Sal-alkali o' midge-tail clippings,
And mony mae. "

"Waes me for Johnny Ged's-Hole[7] now,"
Quo' I, "If that thae news be true!
His braw calf-ward whare gowans grew,
Sae white and bonie,
Nae doubt they'll rive it wi' the plew;
They'll ruin Johnie! "

The creature grain'd an eldritch laugh,
And says, "Ye need na yoke the plough,
Kirkyards will soon be till'd eneugh,
Tak ye nae fear;
They'll a' be trench'd wi' mony a sheugh
In twa-three year.

"Whare I kill'd ane a fair strae death,
By loss o' blood or want of breath,
This night I'm free to tak my aith,
That Hornbook's skill
Has clad a score i' their last claith,
By drap an' pill.

"An honest wabster to his trade,
Whase wife's twa nieves were scarce weel bred,
Gat tippence-worth to mend her head,
When it was sair;
The wife slade cannie to her bed,
But ne'er spak mair

"A countra laird had ta'en the batts,
Or some curmurring in his guts,
His only son for Hornbook sets,
An' pays him well.
The lad, for twa guid gimmer-pets,
Was laird himsel.

"A bonnie lass, ye kend her name,
Some ill-brewn drink had hov'd her wame;
She trusts hersel, to hide the shame,
In Hornbook's care;
_Horn_ sent her aff to her lang hame,
To hide it there.

"That's just a swatch o' Hornbook's way;
Thus goes he on from day to day,
Thus does he poison, kill, an' slay,
An's weel paid for't;
Yet stops me o' my lawfu' prey,
Wi' his d--mn'd dirt:

"But, hark! I'll tell you of a plot,
Though dinna ye be speaking o't;
I'll nail the self-conceited sot,
As dead's a herrin':
Niest time we meet, I'll wad a groat,
He gets his fairin'! "

But just as he began to tell,
The auld kirk-hammer strak' the bell
Some wee short hour ayont the twal,
Which rais'd us baith:
I took the way that pleas'd mysel',
And sae did Death.

FOOTNOTES:

[Footnote 6: Buchan's Domestic Medicine. ]

[Footnote 7: The grave-digger. ]

* * * * *




XVI.

THE TWA HERDS:

OR,

THE HOLY TULZIE.

[The actors in this indecent drama were Moodie, minister of Ricartoun,
and Russell, helper to the minister of Kilmarnock: though apostles of
the "Old Light," they forgot their brotherhood in the vehemence of
controversy, and went, it is said, to blows. "This poem," says Burns,
"with a certain description of the clergy as well as laity, met with a
roar of applause. "]


O a' ye pious godly flocks,
Weel fed on pastures orthodox,
Wha now will keep you frae the fox,
Or worrying tykes,
Or wha will tent the waifs and crocks,
About the dykes?

The twa best herds in a' the wast,
That e'er ga'e gospel horn a blast,
These five and twenty simmers past,
O! dool to tell,
Ha'e had a bitter black out-cast
Atween themsel.

O, Moodie, man, and wordy Russell,
How could you raise so vile a bustle,
Ye'll see how New-Light herds will whistle
And think it fine:
The Lord's cause ne'er got sic a twistle
Sin' I ha'e min'.

O, sirs! whae'er wad ha'e expeckit
Your duty ye wad sae negleckit,
Ye wha were ne'er by lairds respeckit,
To wear the plaid,
But by the brutes themselves eleckit,
To be their guide.

What flock wi' Moodie's flock could rank,
Sae hale and hearty every shank,
Nae poison'd sour Arminian stank,
He let them taste,
Frae Calvin's well, ay clear they drank,--
O sic a feast!

The thummart, wil'-cat, brock, and tod,
Weel kend his voice thro' a' the wood,
He smelt their ilka hole and road,
Baith out and in,
And weel he lik'd to shed their bluid,
And sell their skin.

What herd like Russell tell'd his tale,
His voice was heard thro' muir and dale,
He kend the Lord's sheep, ilka tail,
O'er a' the height,
And saw gin they were sick or hale,
At the first sight.

He fine a mangy sheep could scrub,
Or nobly fling the gospel club,
And New-Light herds could nicely drub,
Or pay their skin;
Could shake them o'er the burning dub,
Or heave them in.

Sic twa--O! do I live to see't,
Sic famous twa should disagreet,
An' names, like villain, hypocrite,
Ilk ither gi'en,
While New-Light herds, wi' laughin' spite,
Say neither's liein'!

An' ye wha tent the gospel fauld,
There's Duncan, deep, and Peebles, shaul,
But chiefly thou, apostle Auld,
We trust in thee,
That thou wilt work them, hot and cauld,
Till they agree.

Consider, Sirs, how we're beset;
There's scarce a new herd that we get
But comes frae mang that cursed set
I winna name;
I hope frae heav'n to see them yet
In fiery flame.

Dalrymple has been lang our fae,
M'Gill has wrought us meikle wae,
And that curs'd rascal call'd M'Quhae,
And baith the Shaws,
That aft ha'e made us black and blae,
Wi' vengefu' paws.

Auld Wodrow lang has hatch'd mischief,
We thought ay death wad bring relief,
But he has gotten, to our grief,
Ane to succeed him,
A chield wha'll soundly buff our beef;
I meikle dread him.

And mony a ane that I could tell,
Wha fain would openly rebel,
Forbye turn-coats amang oursel,
There's Smith for ane,
I doubt he's but a grey-nick quill,
An' that ye'll fin'.

O! a' ye flocks o'er a' the hills,
By mosses, meadows, moors, and fells,
Come, join your counsel and your skills
To cow the lairds,
And get the brutes the powers themsels
To choose their herds;

Then Orthodoxy yet may prance,
And Learning in a woody dance,
And that fell cur ca'd Common Sense,
That bites sae sair,
Be banish'd o'er the sea to France:
Let him bark there.

Then Shaw's and Dalrymple's eloquence,
M'Gill's close nervous excellence,
M'Quhae's pathetic manly sense,
And guid M'Math,
Wi' Smith, wha thro' the heart can glance,
May a' pack aff.

* * * * *




XVII.

HOLY WILLIE'S PRAYER.

"And send the godly in a pet to pray. "

POPE.

[Of this sarcastic and too daring poem many copies in manuscript were
circulated while the poet lived, but though not unknown or unfelt by
Currie, it continued unpublished till printed by Stewart with the
Jolly Beggars, in 1801. Holy Willie was a small farmer, leading elder
to Auld, a name well known to all lovers of Burns; austere in speech,
scrupulous in all outward observances, and, what is known by the name
of a "professing Christian. " He experienced, however, a "sore fall;"
he permitted himself to be "filled fou," and in a moment when "self
got in" made free, it is said, with the money of the poor of the
parish. His name was William Fisher. ]


O thou, wha in the heavens dost dwell,
Wha, as it pleases best thysel',
Sends ane to heaven, and ten to hell,
A' for thy glory,
And no for ony gude or ill
They've done afore thee!

I bless and praise thy matchless might,
Whan thousands thou hast left in night,
That I am here afore thy sight,
For gifts and grace,
A burnin' and a shinin' light
To a' this place.

What was I, or my generation,
That I should get sic exaltation,
I wha deserve sic just damnation,
For broken laws,
Five thousand years 'fore my creation,
Thro' Adam's cause.

When frae my mither's womb I fell,
Thou might hae plunged me in hell,
To gnash my gums, to weep and wail,
In burnin' lake,
Whar damned devils roar and yell,
Chain'd to a stake.

Yet I am here a chosen sample;
To show thy grace is great and ample;
I'm here a pillar in thy temple,
Strong as a rock,
A guide, a buckler, an example,
To a' thy flock.

But yet, O Lord! confess I must,
At times I'm fash'd wi' fleshly lust;
And sometimes, too, wi' warldly trust,
Vile self gets in;
But thou remembers we are dust,
Defil'd in sin.

O Lord! yestreen thou kens, wi' Meg--
Thy pardon I sincerely beg,
O! may't ne'er be a livin' plague
To my dishonour,
An' I'll ne'er lift a lawless leg
Again upon her.

Besides, I farther maun allow,
Wi' Lizzie's lass, three times I trow--
But Lord, that Friday I was fou,
When I came near her,
Or else, thou kens, thy servant true
Wad ne'er hae steer'd her.

Maybe thou lets this fleshly thorn,
Beset thy servant e'en and morn,
Lest he owre high and proud should turn,
'Cause he's sae gifted;
If sae, thy han' maun e'en be borne
Until thou lift it.

Lord, bless thy chosen in this place,
For here thou hast a chosen race:
But God confound their stubborn face,
And blast their name,
Wha bring thy elders to disgrace
And public shame.

Lord, mind Gawn Hamilton's deserts,
He drinks, and swears, and plays at carts,
Yet has sae mony takin' arts,
Wi' grit and sma',
Frae God's ain priests the people's hearts
He steals awa.

An' whan we chasten'd him therefore,
Thou kens how he bred sic a splore,
As set the warld in a roar
O' laughin' at us;--
Curse thou his basket and his store,
Kail and potatoes.

Lord, hear my earnest cry and pray'r,
Against the presbyt'ry of Ayr;
Thy strong right hand, Lord, mak it bare
Upo' their heads,
Lord weigh it down, and dinna spare,
For their misdeeds.

O Lord my God, that glib-tongu'd Aiken,
My very heart and saul are quakin',
To think how we stood groanin', shakin',
And swat wi' dread,
While Auld wi' hingin lips gaed sneakin'
And hung his head.

Lord, in the day of vengeance try him,
Lord, visit them wha did employ him,
And pass not in thy mercy by 'em,
Nor hear their pray'r;
But for thy people's sake destroy 'em,
And dinna spare.

But, Lord, remember me an mine,
Wi' mercies temp'ral and divine,
That I for gear and grace may shine,
Excell'd by nane,
And a' the glory shall be thine,
Amen, Amen!

* * * * *




XVIII.

EPITAPH ON HOLY WILLIE.

[We are informed by Richmond of Mauchline, that when he was clerk in
Gavin Hamilton's office, Burns came in one morning and said, "I have
just composed a poem, John, and if you will write it, I will repeat
it. " He repeated Holy Willie's Prayer and Epitaph; Hamilton came in at
the moment, and having read them with delight, ran laughing with them
in his hand to Robert Aiken. The end of Holy Willie was other than
godly; in one of his visits to Mauchline, he drank more than was
needful, fell into a ditch on his way home, and was found dead in the
morning. ]


Here Holy Willie's sair worn clay
Takes up its last abode;
His saul has ta'en some other way,
I fear the left-hand road.

Stop! there he is, as sure's a gun,
Poor, silly body, see him;
Nae wonder he's as black's the grun,
Observe wha's standing wi' him.

Your brunstane devilship I see,
Has got him there before ye;
But hand your nine-tail cat a wee,
Till ance you've heard my story.

Your pity I will not implore,
For pity ye hae nane;
Justice, alas! has gi'en him o'er,
And mercy's day is gaen.

But hear me, sir, deil as ye are,
Look something to your credit;
A coof like him wad stain your name,
If it were kent ye did it.

* * * * *




XIX.

THE INVENTORY;

IN ANSWER TO A MANDATE BY THE SURVEYOR

OF THE TAXES.

[We have heard of a poor play-actor who, by a humorous inventory of
his effects, so moved the commissioners of the income tax, that they
remitted all claim on him then and forever; we know not that this very
humorous inventory of Burns had any such effect on Mr. Aiken, the
surveyor of the taxes. It is dated "Mossgiel, February 22d, 1786," and
is remarkable for wit and sprightliness, and for the information which
it gives us of the poet's habits, household, and agricultural
implements. ]


Sir, as your mandate did request,
I send you here a faithfu' list,
O' gudes, an' gear, an' a' my graith,
To which I'm clear to gi'e my aith.

_Imprimis_, then, for carriage cattle,
I have four brutes o' gallant mettle,
As ever drew afore a pettle.
My lan' afore's[8] a gude auld has been,
An' wight, an' wilfu' a' his days been.
My lan ahin's[9] a weel gaun fillie,
That aft has borne me hame frae Killie,[10]
An' your auld burro' mony a time,
In days when riding was nae crime--
But ance, whan in my wooing pride,
I like a blockhead boost to ride,
The wilfu' creature sae I pat to,
(L--d pardon a' my sins an' that too! )
I play'd my fillie sic a shavie,
She's a' bedevil'd with the spavie.
My fur ahin's[11] a wordy beast,
As e'er in tug or tow was trac'd.
The fourth's a Highland Donald hastie,
A d--n'd red wud Kilburnie blastie!
Forbye a cowt o' cowt's the wale,
As ever ran afore a tail.
If he be spar'd to be a beast,
He'll draw me fifteen pun' at least. --
Wheel carriages I ha'e but few,
Three carts, an' twa are feckly new;
Ae auld wheelbarrow, mair for token,
Ae leg an' baith the trams are broken;
I made a poker o' the spin'le,
An' my auld mither brunt the trin'le.

For men I've three mischievous boys,
Run de'ils for rantin' an' for noise;
A gaudsman ane, a thrasher t'other.
Wee Davock hauds the nowt in fother.
I rule them as I ought, discreetly,
An' aften labour them completely;
An' ay on Sundays, duly, nightly,
I on the Questions targe them tightly;
Till, faith, wee Davock's turn'd sae gleg,
Tho' scarcely langer than your leg,
He'll screed you aff Effectual calling,
As fast as ony in the dwalling.
I've nane in female servan' station,
(Lord keep me ay frae a' temptation! )
I ha'e nae wife--and that my bliss is,
An' ye have laid nae tax on misses;
An' then, if kirk folks dinna clutch me,
I ken the devils darena touch me.
Wi' weans I'm mair than weel contented,
Heav'n sent me ane mae than I wanted.
My sonsie smirking dear-bought Bess,
She stares the daddy in her face,
Enough of ought ye like but grace;
But her, my bonnie sweet wee lady,
I've paid enough for her already,
An' gin ye tax her or her mither,
B' the L--d! ye'se get them a'thegither.

And now, remember, Mr. Aiken,
Nae kind of license out I'm takin';
Frae this time forth, I do declare
I'se ne'er ride horse nor hizzie mair;
Thro' dirt and dub for life I'll paidle,
Ere I sae dear pay for a saddle;
My travel a' on foot I'll shank it,
I've sturdy bearers, Gude be thankit.
The kirk and you may tak' you that,
It puts but little in your pat;
Sae dinna put me in your buke.
Nor for my ten white shillings luke.

This list wi' my ain hand I wrote it,
the day and date as under noted;
Then know all ye whom it concerns,

_Subscripsi huic_ ROBERT BURNS.

FOOTNOTES:

[Footnote 8: The fore-horse on the left-hand in the plough. ]

[Footnote 9: The hindmost on the left-hand in the plough. ]

[Footnote 10: Kilmarnock. ]

[Footnote 11: The hindmost horse on the right-hand in the plough. ]

* * * * *




XX.

THE HOLY FAIR.

A robe of seeming truth and trust
Did crafty observation;
And secret hung, with poison'd crust,
The dirk of Defamation:
A mask that like the gorget show'd,
Dye-varying on the pigeon;
And for a mantle large and broad,
He wrapt him in Religion.

HYPOCRISY A-LA-MODE.

[The scene of this fine poem is the church-yard of Mauchline, and the
subject handled so cleverly and sharply is the laxity of manners
visible in matters so solemn and terrible as the administration of the
sacrament. "This was indeed," says Lockhart, "an extraordinary
performance: no partisan of any sect could whisper that malice had
formed its principal inspiration, or that its chief attraction lay in
the boldness with which individuals, entitled and accustomed to
respect, were held up to ridicule: it was acknowledged, amidst the
sternest mutterings of wrath, that national manners were once more in
the hands of a national poet. " "It is no doubt," says Hogg, "a
reckless piece of satire, but it is a clever one, and must have cut to
the bone. But much as I admire the poem I must regret that it is
partly borrowed from Ferguson. "]


Upon a simmer Sunday morn,
When Nature's face is fair,
I walked forth to view the corn,
An' snuff the caller air.
The rising sun owre Galston muirs,
Wi' glorious light was glintin';
The hares were hirplin down the furs,
The lav'rocks they were chantin'
Fu' sweet that day.

As lightsomely I glowr'd abroad,
To see a scene sae gay,
Three hizzies, early at the road,
Cam skelpin up the way;
Twa had manteeles o' dolefu' black,
But ane wi' lyart lining;
The third, that gaed a-wee a-back,
Was in the fashion shining
Fu' gay that day.

The twa appear'd like sisters twin,
In feature, form, an' claes;
Their visage, wither'd, lang, an' thin,
An' sour as ony slaes:
The third cam up, hap-step-an'-lowp,
As light as ony lambie,
An' wi' a curchie low did stoop,
As soon as e'er she saw me,
Fu' kind that day.

Wi' bonnet aff, quoth I, "Sweet lass,
I think ye seem to ken me;
I'm sure I've seen that bonnie face,
But yet I canna name ye. "
Quo' she, an' laughin' as she spak,
An' taks me by the hands,
"Ye, for my sake, hae gi'en the feck,
Of a' the ten commands
A screed some day.

"My name is Fun--your cronie dear,
The nearest friend ye hae;
An' this is Superstition here,
An' that's Hypocrisy.
I'm gaun to Mauchline holy fair,
To spend an hour in daffin:
Gin ye'll go there, yon runkl'd pair,
We will get famous laughin'
At them this day. "

Quoth I, "With a' my heart I'll do't;
I'll get my Sunday's sark on,
An' meet you on the holy spot;
Faith, we'se hae fine remarkin'! "
Then I gaed hame at crowdie-time
An' soon I made me ready;
For roads were clad, frae side to side,
Wi' monie a wearie body,
In droves that day.

Here farmers gash, in ridin' graith
Gaed hoddin by their cottars;
There, swankies young, in braw braid-claith,
Are springin' o'er the gutters.
The lasses, skelpin barefit, thrang,
In silks an' scarlets glitter;
Wi' sweet-milk cheese, in monie a whang,
An' farls bak'd wi' butter,
Fu' crump that day.

When by the plate we set our nose,
Weel heaped up wi' ha'pence,
A greedy glowr Black Bonnet throws,
An' we maun draw our tippence.
Then in we go to see the show,
On ev'ry side they're gath'rin',
Some carrying dails, some chairs an' stools,
An' some are busy blethrin'
Right loud that day.

Here stands a shed to fend the show'rs,
An' screen our countra gentry,
There, racer Jess, and twa-three wh-res,
Are blinkin' at the entry.
Here sits a raw of titlin' jades,
Wi' heaving breast and bare neck,
An' there's a batch o' wabster lads,
Blackguarding frae Kilmarnock
For fun this day.

Here some are thinkin' on their sins,
An' some upo' their claes;
Ane curses feet that fyl'd his shins,
Anither sighs an' prays:
On this hand sits a chosen swatch,
Wi' screw'd up grace-proud faces;
On that a set o' chaps at watch,
Thrang winkin' on the lasses
To chairs that day.

O happy is that man an' blest!
Nae wonder that it pride him!
Wha's ain dear lass that he likes best,
Comes clinkin' down beside him;
Wi' arm repos'd on the chair back,
He sweetly does compose him;
Which, by degrees, slips round her neck,
An's loof upon her bosom,
Unkenn'd that day.

Now a' the congregation o'er
Is silent expectation;
For Moodie speeds the holy door,
Wi' tidings o' damnation.
Should Hornie, as in ancient days,
'Mang sons o' God present him,
The vera sight o' Moodie's face,
To's ain het hame had sent him
Wi' fright that day.

Hear how he clears the points o' faith
Wi' ratlin' an' wi' thumpin'!
Now meekly calm, now wild in wrath,
He's stampin an' he's jumpin'!
His lengthen'd chin, his turn'd-up snout,
His eldritch squeel and gestures,
Oh, how they fire the heart devout,
Like cantharidian plasters,
On sic a day.

But hark! the tent has chang'd its voice:
There's peace an' rest nae langer:
For a' the real judges rise,
They canna sit for anger.
Smith opens out his cauld harangues,
On practice and on morals;
An' aff the godly pour in thrangs,
To gie the jars an' barrels
A lift that day.

What signifies his barren shine,
Of moral pow'rs and reason?
His English style, an' gestures fine,
Are a' clean out o' season.
Like Socrates or Antonine,
Or some auld pagan heathen,
The moral man he does define,
But ne'er a word o' faith in
That's right that day.

In guid time comes an antidote
Against sic poison'd nostrum;
For Peebles, frae the water-fit,
Ascends the holy rostrum:
See, up he's got the word o' God,
An' meek an' mim has view'd it,
While Common-Sense has ta'en the road,
An' aff, an' up the Cowgate,[12]
Fast, fast, that day.

Wee Miller, neist the guard relieves,
An' orthodoxy raibles,
Tho' in his heart he weel believes,
An' thinks it auld wives' fables:
But faith! the birkie wants a manse,
So, cannily he hums them;
Altho' his carnal wit an' sense
Like hafflins-ways o'ercomes him
At times that day.

Now but an' ben, the Change-house fills,
Wi' yill-caup commentators:
Here's crying out for bakes and gills,
An' there the pint-stowp clatters;
While thick an' thrang, an' loud an' lang,
Wi' logic, an' wi' scripture,
They raise a din, that, in the end,
Is like to breed a rupture
O' wrath that day.

Leeze me on drink! it gies us mair
Than either school or college:
It kindles wit, it waukens lair,
It pangs us fou' o' knowledge,
Be't whisky gill, or penny wheep,
Or any stronger potion,
It never fails, on drinking deep,
To kittle up our notion
By night or day.

The lads an' lasses, blythely bent
To mind baith saul an' body,
Sit round the table, weel content,
An' steer about the toddy.
On this ane's dress, an' that ane's leuk,
They're making observations;
While some are cozie i' the neuk,
An' formin' assignations
To meet some day.

But now the Lord's ain trumpet touts,
Till a' the hills are rairin',
An' echoes back return the shouts:
Black Russell is na' sparin':
His piercing words, like Highlan' swords,
Divide the joints and marrow;
His talk o' Hell, where devils dwell,
Our vera sauls does harrow[13]
Wi' fright that day.

A vast, unbottom'd boundless pit,
Fill'd fou o' lowin' brunstane,
Wha's ragin' flame, an' scorchin' heat,
Wad melt the hardest whunstane!
The half asleep start up wi' fear,
An' think they hear it roarin',
When presently it does appear,
'Twas but some neibor snorin'
Asleep that day.

'Twad be owre lang a tale to tell
How monie stories past,
An' how they crowded to the yill,
When they were a' dismist:
How drink gaed round, in cogs an' caups,
Amang the furms an' benches:
An' cheese an' bread, frae women's laps,
Was dealt about in lunches,
An' dawds that day.

In comes a gaucie, gash guidwife,
An' sits down by the fire,
Syne draws her kebbuck an' her knife;
The lasses they are shyer.
The auld guidmen, about the grace,
Frae side to side they bother,
Till some ane by his bonnet lays,
An' gi'es them't like a tether,
Fu' lang that day.

Waesucks! for him that gets nae lass,
Or lasses that hae naething;
Sma' need has he to say a grace,
Or melvie his braw claithing!
O wives, be mindfu' ance yoursel
How bonnie lads ye wanted,
An' dinna, for a kebbuck-heel,
Let lasses be affronted
On sic a day!

Now Clinkumbell, wi' ratlin tow,
Begins to jow an' croon;
Some swagger hame, the best they dow,
Some wait the afternoon.
At slaps the billies halt a blink,
Till lasses strip their shoon:
Wi' faith an' hope, an' love an' drink,
They're a' in famous tune
For crack that day.

How monie hearts this day converts
O' sinners and o' lasses!
Their hearts o' stane, gin night, are gane,
As saft as ony flesh is.
There's some are fou o' love divine;
There's some are fou o' brandy;
An' monie jobs that day begin
May end in houghmagandie
Some ither day.

FOOTNOTES:

[Footnote 12: A street so called, which faces the tent in Mauchline. ]

[Footnote 13: Shakespeare's Hamlet. ]

* * * * *




XXI.

THE ORDINATION.

"For sense they little owe to frugal heav'n--
To please the mob they hide the little giv'n. "

[This sarcastic sally was written on the admission of Mr. Mackinlay, as
one of the ministers to the Laigh, or parochial Kirk of Kilmarnock, on
the 6th of April, 1786. That reverend person was an Auld Light
professor, and his ordination incensed all the New Lights, hence the
bitter levity of the poem. These dissensions have long since past away:
Mackinlay, a pious and kind-hearted sincere man, lived down all the
personalities of the satire, and though unwelcome at first, he soon
learned to regard them only as a proof of the powers of the poet.
]


Kilmarnock wabsters fidge an' claw,
An' pour your creeshie nations;
An' ye wha leather rax an' draw,
Of a' denominations,
Swith to the Laigh Kirk, ane an' a',
An' there tak up your stations;
Then aff to Begbie's in a raw,
An' pour divine libations
For joy this day.

Curst Common-Sense, that imp o' hell,
Cam in wi' Maggie Lauder;[14]
But Oliphant aft made her yell,
An' Russell sair misca'd her;
This day Mackinlay taks the flail,
And he's the boy will blaud her!
He'll clap a shangan on her tail,
An' set the bairns to daud her
Wi' dirt this day.

Mak haste an' turn King David owre,
An' lilt wi' holy clangor;
O' double verse come gie us four,
An' skirl up the Bangor:
This day the Kirk kicks up a stoure,
Nae mair the knaves shall wrang her,
For Heresy is in her pow'r,
And gloriously she'll whang her
Wi' pith this day.

Come, let a proper text be read,
An' touch it aff wi' vigour,
How graceless Ham[15] leugh at his dad,
Which made Canaan a niger;
Or Phineas[16] drove the murdering blade,
Wi' wh-re-abhorring rigour;
Or Zipporah,[17] the scauldin' jad,
Was like a bluidy tiger
I' th' inn that day.

There, try his mettle on the creed,
And bind him down wi' caution,
That stipend is a carnal weed
He taks but for the fashion;
And gie him o'er the flock, to feed,
And punish each transgression;
Especial, rams that cross the breed,
Gie them sufficient threshin',
Spare them nae day.

Now, auld Kilmarnock, cock thy tail,
And toss thy horns fu' canty;
Nae mair thou'lt rowte out-owre the dale,
Because thy pasture's scanty;
For lapfu's large o' gospel kail
Shall fill thy crib in plenty,
An' runts o' grace the pick and wale,
No gi'en by way o' dainty,
But ilka day.

Nae mair by Babel's streams we'll weep,
To think upon our Zion;
And hing our fiddles up to sleep,
Like baby-clouts a-dryin':
Come, screw the pegs, wi' tunefu' cheep,
And o'er the thairms be tryin';
Oh, rare! to see our elbucks wheep,
An' a' like lamb-tails flyin'
Fu' fast this day!

Lang Patronage, wi' rod o' airn,
Has shor'd the Kirk's undoin',
As lately Fenwick, sair forfairn,
Has proven to its ruin:
Our patron, honest man! Glencairn,
He saw mischief was brewin';
And like a godly elect bairn
He's wal'd us out a true ane,
And sound this day.

Now, Robinson, harangue nae mair,
But steek your gab for ever.
Or try the wicked town of Ayr,
For there they'll think you clever;
Or, nae reflection on your lear,
Ye may commence a shaver;
Or to the Netherton repair,
And turn a carpet-weaver
Aff-hand this day.

Mutrie and you were just a match
We never had sic twa drones:
Auld Hornie did the Laigh Kirk watch,
Just like a winkin' baudrons:
And ay' he catch'd the tither wretch,
To fry them in his caudrons;
But now his honour maun detach,
Wi' a' his brimstane squadrons,
Fast, fast this day.

See, see auld Orthodoxy's faes
She's swingein' through the city;
Hark, how the nine-tail'd cat she plays!
I vow it's unco pretty:
There, Learning, with his Greekish face,
Grunts out some Latin ditty;
And Common Sense is gaun, she says,
To mak to Jamie Beattie
Her plaint this day.

But there's Morality himsel',
Embracing all opinions;
Hear, how he gies the tither yell,
Between his twa companions;
See, how she peels the skin an' fell.
As ane were peelin' onions!
Now there--they're packed aff to hell,
And banished our dominions,
Henceforth this day.

O, happy day! rejoice, rejoice!
Come bouse about the porter!
Morality's demure decoys
Shall here nae mair find quarter:
Mackinlay, Russell, are the boys,
That Heresy can torture:
They'll gie her on a rape a hoyse,
And cowe her measure shorter
By th' head some day.

Come, bring the tither mutchkin in,
And here's for a conclusion,
To every New Light[18] mother's son,
From this time forth Confusion:
If mair they deave us wi' their din,
Or Patronage intrusion,
We'll light a spunk, and ev'ry skin,
We'll rin them aff in fusion
Like oil, some day.

FOOTNOTES:

[Footnote 14: Alluding to a scoffing ballad which was made on the
admission of the late reverend and worthy Mr. Lindsay to the Laigh
Kirk. ]

[Footnote 15: Genesis, ix. 22. ]

[Footnote 16: Numbers, xxv. 8. ]

[Footnote 17: Exodus, iv. 25. ]

[Footnote 18: "New Light" is a cant phrase in the West of Scotland, for
those religions opinions which Dr. Taylor of Norwich has defended. ]

* * * * *




XXII.

THE CALF.

TO THE REV. MR. JAMES STEVEN.

On his text, MALACHI, iv. 2--"And ye shall go forth, and grow
up as CALVES of the stall. "

[The laugh which this little poem raised against Steven was a loud
one. Burns composed it during the sermon to which it relates and
repeated it to Gavin Hamilton, with whom he happened on that day to
dine. The Calf--for the name it seems stuck--came to London, where the
younger brother of Burns heard him preach in Covent Garden Chapel, in
1796. ]


Right, Sir! your text I'll prove it true,
Though Heretics may laugh;
For instance; there's yoursel' just now,
God knows, an unco Calf!

And should some patron be so kind,
As bless you wi' a kirk,
I doubt na, Sir, but then we'll find,
Ye're still as great a Stirk.

But, if the lover's raptur'd hour
Shall ever be your lot,
Forbid it, ev'ry heavenly power,
You e'er should be a stot!

Tho', when some kind, connubial dear,
Your but-and-ben adorns,
The like has been that you may wear
A noble head of horns.

And in your lug, most reverend James,
To hear you roar and rowte,
Few men o' sense will doubt your claims
To rank among the nowte.

And when ye're number'd wi' the dead,
Below a grassy hillock,
Wi' justice they may mark your head--
"Here lies a famous Bullock! "

* * * * *




XXIII.

TO JAMES SMITH.

"Friendship! mysterious cement of the soul!
Sweet'ner of life and solder of society!
I owe thee much! --"

BLAIR.

[The James Smith, to whom this epistle is addressed, was at that time
a small shop-keeper in Mauchline, and the comrade or rather follower of
the poet in all his merry expeditions with "Yill-caup commentators. "
He was present in Poosie Nansie's when the Jolly Beggars first dawned
on the fancy of Burns: the comrades of the poet's heart were not
generally very successful in life: Smith left Mauchline, and
established a calico-printing manufactory at Avon near Linlithgow,
where his friend found him in all appearance prosperous in 1788; but
this was not to last; he failed in his speculations and went to the
West Indies, and died early. His wit was ready, and his manners lively
and unaffected. ]


Dear Smith, the sleest, paukie thief,
That e'er attempted stealth or rief,
Ye surely hae some warlock-breef
Owre human hearts;
For ne'er a bosom yet was prief
Against your arts.

For me, I swear by sun an' moon,
And ev'ry star that blinks aboon,
Ye've cost me twenty pair o' shoon
Just gaun to see you;
And ev'ry ither pair that's done,
Mair ta'en I'm wi' you.

That auld capricious carlin, Nature,
To mak amends for scrimpit stature,
She's turn'd you aff, a human creature
On her first plan;
And in her freaks, on every feature
She's wrote, the Man.

Just now I've ta'en the fit o' rhyme,
My barmie noddle's working prime,
My fancy yerkit it up sublime
Wi' hasty summon:
Hae ye a leisure-moment's time
To hear what's comin'?

Some rhyme a neighbour's name to lash;
Some rhyme (vain thought! ) for needfu' cash:
Some rhyme to court the countra clash,
An' raise a din;
For me, an aim I never fash;
I rhyme for fun.

The star that rules my luckless lot,
Has fated me the russet coat,
An' damn'd my fortune to the groat;
But in requit,
Has blest me with a random shot
O' countra wit.

This while my notion's ta'en a sklent,
To try my fate in guid black prent;
But still the mair I'm that way bent,
Something cries "Hoolie!
I red you, honest man, tak tent!
Ye'll shaw your folly.

"There's ither poets much your betters,
Far seen in Greek, deep men o' letters,
Hae thought they had ensur'd their debtors,
A' future ages:
Now moths deform in shapeless tatters,
Their unknown pages. "

Then farewell hopes o' laurel-boughs,
To garland my poetic brows!
Henceforth I'll rove where busy ploughs
Are whistling thrang,
An' teach the lanely heights an' howes
My rustic sang.

I'll wander on, with tentless heed
How never-halting moments speed,
Till fate shall snap the brittle thread;
Then, all unknown,
I'll lay me with th' inglorious dead,
Forgot and gone!

But why o' death begin a tale?
Just now we're living sound and hale,
Then top and maintop crowd the sail,
Heave care o'er side!
And large, before enjoyment's gale,
Let's tak the tide.

This life, sae far's I understand,
Is a' enchanted fairy land,
Where pleasure is the magic wand,
That, wielded right,
Maks hours like minutes, hand in hand,
Dance by fu' light.

The magic wand then let us wield;
For, ance that five-an'-forty's speel'd,
See crazy, weary, joyless eild,
Wi' wrinkl'd face,
Comes hostin', hirplin', owre the field,
Wi' creepin' pace.

When ance life's day draws near the gloamin',
Then fareweel vacant careless roamin';
An' fareweel cheerfu' tankards foamin',
An' social noise;
An' fareweel dear, deluding woman!
The joy of joys!

O Life! how pleasant in thy morning,
Young Fancy's rays the hills adorning!
Cold-pausing Caution's lesson scorning,
We frisk away,
Like school-boys, at th' expected warning,
To joy and play.

We wander there, we wander here,
We eye the rose upon the brier,
Unmindful that the thorn is near,
Among the leaves;
And tho' the puny wound appear,
Short while it grieves.

Some, lucky, find a flow'ry spot,
For which they never toil'd nor swat;
They drink the sweet and eat the fat,
But care or pain;
And, haply, eye the barren hut
With high disdain.

With steady aim some Fortune chase;
Keen hope does ev'ry sinew brace;
Thro' fair, thro' foul, they urge the race,
And seize the prey;
Then cannie, in some cozie place,
They close the day.

And others, like your humble servan',
Poor wights! nae rules nor roads observin';
To right or left, eternal swervin',
They zig-zag on;
'Till curst with age, obscure an' starvin',
They aften groan.

Alas! what bitter toil an' straining--
But truce with peevish, poor complaining!
Is fortune's fickle Luna waning?
E'en let her gang!
Beneath what light she has remaining,
Let's sing our sang.

My pen I here fling to the door,
And kneel, "Ye Pow'rs," and warm implore,
"Tho' I should wander terra e'er,
In all her climes,
Grant me but this, I ask no more,
Ay rowth o' rhymes.

"Gie dreeping roasts to countra lairds,
Till icicles hing frae their beards;
Gie fine braw claes to fine life-guards,
And maids of honour!
And yill an' whisky gie to cairds,
Until they sconner.

"A title, Dempster merits it;
A garter gie to Willie Pitt;
Gie wealth to some be-ledger'd cit,
In cent. per cent.
But give me real, sterling wit,
And I'm content.

"While ye are pleas'd to keep me hale,
I'll sit down o'er my scanty meal,
Be't water-brose, or muslin-kail,
Wi' cheerfu' face,
As lang's the muses dinna fail
To say the grace. "

An anxious e'e I never throws
Behint my lug, or by my nose;
I jouk beneath misfortune's blows
As weel's I may;
Sworn foe to sorrow, care, and prose,
I rhyme away.

O ye douce folk, that live by rule,
Grave, tideless-blooded, calm and cool,
Compar'd wi' you--O fool! fool! fool!
How much unlike!
Your hearts are just a standing pool,
Your lives a dyke!

Nae hair-brain'd, sentimental traces,
In your unletter'd nameless faces!
In arioso trills and graces
Ye never stray,
But gravissimo, solemn basses
Ye hum away.

Ye are sae grave, nae doubt ye're wise;
Nae ferly tho' ye do despise
The hairum-scarum, ram-stam boys,
The rattling squad:
I see you upward cast your eyes--
Ye ken the road--

Whilst I--but I shall haud me there--
Wi' you I'll scarce gang ony where--
Then, Jamie, I shall say nae mair,
But quat my sang,
Content wi' you to mak a pair,
Whare'er I gang.

* * * * *




XXIV.

THE VISION.

DUAN FIRST. [19]

[The Vision and the Briggs of Ayr, are said by Jeffrey to be "the only
pieces by Burns which can be classed under the head of pure fiction:"
but Tam O' Shanter and twenty other of his compositions have an equal
right to be classed with works of fiction. The edition of this poem
published at Kilmarnock, differs in some particulars from the edition
which followed in Edinburgh. The maiden whose foot was so handsome as
to match that of Coila, was a Bess at first, but old affection
triumphed, and Jean, for whom the honour was from the first designed,
regained her place. The robe of Coila, too, was expanded, so far
indeed that she got more cloth than she could well carry. ]


The sun had clos'd the winter day,
The curlers quat their roaring play,
An' hunger'd maukin ta'en her way
To kail-yards green,
While faithless snaws ilk step betray
Whare she has been.

The thresher's weary flingin'-tree
The lee-lang day had tired me;
And when the day had closed his e'e
Far i' the west,
Ben i' the spence, right pensivelie,
I gaed to rest.

There, lanely, by the ingle-cheek,
I sat and ey'd the spewing reek,
That fill'd, wi' hoast-provoking smeek,
The auld clay biggin';
An' heard the restless rattons squeak
About the riggin'.

All in this mottie, misty clime,
I backward mused on wastet time,
How I had spent my youthfu' prime,
An' done nae thing,
But stringin' blethers up in rhyme,
For fools to sing.

Had I to guid advice but harkit,
I might, by this hae led a market,
Or strutted in a bank an' clarkit
My cash-account:
While here, half-mad, half-fed, half-sarkit,
Is a' th' amount.

I started, mutt'ring, blockhead! coof!
And heav'd on high my waukit loof,
To swear by a' yon starry roof,
Or some rash aith,
That I, henceforth, would be rhyme-proof
Till my last breath--

When, click! the string the snick did draw:
And, jee! the door gaed to the wa';
An' by my ingle-lowe I saw,
Now bleezin' bright,
A tight outlandish hizzie, braw
Come full in sight.

Ye need na doubt, I held my wisht;
The infant aith, half-form'd, was crusht;
I glowr'd as eerie's I'd been dusht
In some wild glen;
When sweet, like modest worth, she blusht,
And stepped ben.

Green, slender, leaf-clad holly-boughs
Were twisted, gracefu', round her brows,
I took her for some Scottish Muse,
By that same token;
An' come to stop those reckless vows,
Wou'd soon be broken.

A "hair-brain'd, sentimental trace"
Was strongly marked in her face;
A wildly-witty, rustic grace
Shone full upon her:
Her eye, ev'n turn'd on empty space,
Beam'd keen with honour.

Down flow'd her robe, a tartan sheen,
'Till half a leg was scrimply seen:
And such a leg! my bonnie Jean
Could only peer it;
Sae straught, sae taper, tight, and clean,
Nane else came near it.

Her mantle large, of greenish hue,
My gazing wonder chiefly drew;
Deep lights and shades, bold-mingling, threw
A lustre grand;
And seem'd to my astonish'd view,
A well-known land.

Here, rivers in the sea were lost;
There, mountains to the skies were tost:
Here, tumbling billows mark'd the coast,
With surging foam;
There, distant shone Art's lofty boast,
The lordly dome.

Here, Doon pour'd down his far-fetch'd floods;
There, well-fed Irwine stately thuds:
Auld hermit Ayr staw thro' his woods,
On to the shore;
And many a lesser torrent scuds,
With seeming roar.

Low, in a sandy valley spread,
An ancient borough rear'd her head;
Still, as in Scottish story read,
She boasts a race,
To ev'ry nobler virtue bred,
And polish'd grace.

By stately tow'r, or palace fair,
Or ruins pendent in the air,
Bold stems of heroes, here and there,
I could discern;
Some seem'd to muse, some seem'd to dare,
With feature stern.

My heart did glowing transport feel,
To see a race[20] heroic wheel,
And brandish round the deep-dy'd steel
In sturdy blows;
While back-recoiling seem'd to reel
Their southron foes.

His Country's Saviour,[21] mark him well!
Bold Richardton's[22] heroic swell;
The chief on Sark[23] who glorious fell,
In high command;
And He whom ruthless fates expel
His native land.

There, where a sceptr'd Pictish shade[24]
Stalk'd round his ashes lowly laid,
I mark'd a martial race portray'd
In colours strong;
Bold, soldier-featur'd, undismay'd
They strode along.

Thro' many a wild romantic grove,[25]
Near many a hermit-fancy'd cove,
(Fit haunts for friendship or for love,)
In musing mood,
An aged judge, I saw him rove,
Dispensing good.

With deep-struck, reverential awe,[26]
The learned sire and son I saw,
To Nature's God and Nature's law,
They gave their lore,
This, all its source and end to draw;
That, to adore.

Brydone's brave ward[27] I well could spy,
Beneath old Scotia's smiling eye;
Who call'd on Fame, low standing by,
To hand him on,
Where many a Patriot-name on high
And hero shone.

* * * * *

DUAN SECOND

With musing-deep, astonish'd stare,
I view'd the heavenly-seeming fair;
A whisp'ring throb did witness bear
Of kindred sweet,
When with an elder sister's air
She did me greet.

"All hail! My own inspired bard!
In me thy native Muse regard!
Nor longer mourn thy fate is hard,
Thus poorly low!
I come to give thee such reward
As we bestow.

"Know, the great genius of this land,
Has many a light aerial band,
Who, all beneath his high command,
Harmoniously,
As arts or arms they understand,
Their labours ply.

"They Scotia's race among them share;
Some fire the soldier on to dare;
Some rouse the patriot up to bare
Corruption's heart.
Some teach the bard, a darling care,
The tuneful art.

"'Mong swelling floods of reeking gore,
They, ardent, kindling spirits, pour;
Or 'mid the venal senate's roar,
They, sightless, stand,
To mend the honest patriot-lore,
And grace the hand.

"And when the bard, or hoary sage,
Charm or instruct the future age,
They bind the wild, poetic rage
In energy,
Or point the inconclusive page
Full on the eye.

"Hence Fullarton, the brave and young;
Hence Dempster's zeal-inspired tongue;
Hence sweet harmonious Beattie sung
His 'Minstrel' lays;
Or tore, with noble ardour stung,
The sceptic's bays.

"To lower orders are assign'd
The humbler ranks of human-kind,
The rustic bard, the lab'ring hind,
The artisan;
All choose, as various they're inclin'd
The various man.

"When yellow waves the heavy grain,
The threat'ning storm some, strongly, rein;
Some teach to meliorate the plain,
With tillage-skill;
And some instruct the shepherd-train,
Blythe o'er the hill.

"Some hint the lover's harmless wile;
Some grace the maiden's artless smile;
Some soothe the lab'rer's weary toil,
For humble gains,
And make his cottage-scenes beguile
His cares and pains.

"Some, bounded to a district-space,
Explore at large man's infant race,
To mark the embryotic trace
Of rustic bard:
And careful note each op'ning grace,
A guide and guard.

"Of these am I--Coila my name;
And this district as mine I claim,
Where once the Campbells, chiefs of fame,
Held ruling pow'r:
I mark'd thy embryo-tuneful flame,
Thy natal hour.

"With future hope, I oft would gaze,
Fond, on thy little early ways,
Thy rudely carroll'd, chiming phrase,
In uncouth rhymes,
Fir'd at the simple, artless lays
Of other times.

"I saw thee seek the sounding shore,
Delighted with the dashing roar;
Or when the north his fleecy store
Drove through the sky,
I saw grim Nature's visage hoar
Struck thy young eye.

"Or when the deep green-mantled earth
Warm cherish'd ev'ry flow'ret's birth,
And joy and music pouring forth
In ev'ry grove,
I saw thee eye the general mirth
With boundless love.

"When ripen'd fields, and azure skies,
Called forth the reaper's rustling noise,
I saw thee leave their evening joys,
And lonely stalk,
To vent thy bosom's swelling rise
In pensive walk.

"When youthful love, warm-blushing, strong,
Keen-shivering shot thy nerves along,
Those accents, grateful to thy tongue,
Th' adored Name
I taught thee how to pour in song,
To soothe thy flame.

"I saw thy pulse's maddening play,
Wild send thee pleasure's devious way,
Misled by Fancy's meteor-ray,
By passion driven;
But yet the light that led astray
Was light from Heaven.

"I taught thy manners-painting strains,
The loves, the ways of simple swains,
Till now, o'er all my wide domains
Thy fame extends;
And some, the pride of Coila's plains,
Become thy friends.

"Thou canst not learn, nor can I show,
To paint with Thomson's landscape glow;
Or wake the bosom-melting throe,
With Shenstone's art;
Or pour, with Gray, the moving flow,
Warm on the heart.

"Yet, all beneath the unrivall'd rose,
The lowly daisy sweetly blows;
Tho' large the forest's monarch throws
His army shade,
Yet green the juicy hawthorn grows,
Adown the glade.

"Then never murmur nor repine;
Strive in thy humble sphere to shine;
And, trust me, not Potosi's mine,
Nor king's regard,
Can give a bliss o'ermatching thine,
A rustic bard.

"To give my counsels all in one,
Thy tuneful flame still careful fan;
Preserve the dignity of man,
With soul erect;
And trust, the universal plan
Will all protect.

"And wear thou this,"--she solemn said,
And bound the holly round my head:
The polish'd leaves and berries red
Did rustling play;
And like a passing thought, she fled
In light away.

FOOTNOTES:

[Footnote 19: Duan, a term of Ossian's for the different divisions of a
digressive poem. See his "Cath-Loda," vol. ii. of Macpherson's
translation. ]

[Footnote 20: The Wallaces. ]

[Footnote 21: Sir William Wallace. ]

[Footnote 22: Adam Wallace, of Richardton, cousin to the immortal
preserver of Scottish independence. ]

[Footnote 23: Wallace, Laird of Craigie, who was second in command
under Douglas, Earl of Ormond, at the famous battle on the banks of
Sark, fought anno 1448. That glorious victory was principally owing to
the judicious conduct and intrepid valour of the gallant laird of
Craigie, who died of his wounds after the action. ]

[Footnote 24: Coilus, king of the Picts, from whom the district of Kyle
is said to take its name, lies buried, as tradition says, near the
family seat of the Montgomeries of Coilsfield, where his burial-place
is still shown. ]

[Footnote 25: Barskimming, the seat of the late Lord Justice-Clerk (Sir
Thomas Miller of Glenlee, afterwards President of the Court of
Session. )]

[Footnote 26: Catrine, the seat of Professor Dugald Steward. ]

[Footnote 27: Colonel Fullarton. ]

* * * * *




XXV.

HALLOWEEN. [28]

"Yes! let the rich deride, the proud disdain,
The simple pleasures of the lowly train;
To me more dear, congenial to my heart,
One native charm, than all the gloss of art. "

GOLDSMITH.

[This Poem contains a lively and striking picture of some of the
superstitious observances of old Scotland: on Halloween the desire to
look into futurity was once all but universal in the north; and the
charms and spells which Burns describes, form but a portion of those
employed to enable the peasantry to have a peep up the dark vista of
the future. The scene is laid on the romantic shores of Ayr, at a
farmer's fireside, and the actors in the rustic drama are the whole
household, including supernumerary reapers and bandsmen about to be
discharged from the engagements of harvest. "I never can help
regarding this," says James Hogg, "as rather a trivial poem! "]


Upon that night, when fairies light
On Cassilis Downans[29] dance,
Or owre the lays, in splendid blaze,
On sprightly coursers prance;
Or for Colean the rout is ta'en,
Beneath the moon's pale beams;
There, up the Cove,[30] to stray an' rove
Amang the rocks an' streams
To sport that night.

Amang the bonnie winding banks
Where Doon rins, wimplin', clear,
Where Bruce[31] ance rul'd the martial ranks,
An' shook his Carrick spear,
Some merry, friendly, countra folks,
Together did convene,
To burn their nits, an' pou their stocks,
An' haud their Halloween
Fu' blythe that night.

The lasses feat, an' cleanly neat,
Mair braw than when they're fine;
Their faces blythe, fu' sweetly kythe,
Hearts leal, an' warm, an' kin';
The lads sae trig, wi' wooer babs,
Weel knotted on their garten,
Some unco blate, an' some wi' gabs,
Gar lasses' hearts gang startin'
Whiles fast at night.

Then, first and foremost, thro' the kail,
Their stocks[32] maun a' be sought ance;
They steek their een, an' graip an' wale,
For muckle anes an' straught anes.
Poor hav'rel Will fell aff the drift,
An' wander'd through the bow-kail,
An' pou't, for want o' better shift,
A runt was like a sow-tail,
Sae bow't that night.

Then, straught or crooked, yird or nane,
They roar an' cry a' throu'ther;
The vera wee-things, todlin', rin
Wi' stocks out-owre their shouther;
An' gif the custoc's sweet or sour,
Wi' joctelegs they taste them;
Syne coziely, aboon the door,
Wi' cannie care, they've placed them
To lie that night.