No More Learning

གནད་དེ་ལྟ་བུའི་གཞི་བཟུང་ནས་སྐྱབས་འགྲོ་ནས་བརྩམ་སྔོན་འགྲོའི་བསགས་སྦྱངས་མཐར་ཕྱིན་པ་དང་། ཁྱད་པར་སྟོབས་བཞིའི་གནད་དང་ལྡན་པའི་ཡིག་བརྒྱ་ལྟུང་བཤགས། དྲི་མེད་བཤགས་རྒྱུད་སོགས་ལ་ནན་ཏན་འབད། བྱིན་རླབས་ཀྱི་གཞི་བླ་མའི་རྣལ་འབྱོར་ཡིན་པས། རྩ་བའི་བླ་མ་སངས་རྒྱས་སུ་ཐག་བཅད། སྐྱབས་གནས་ཀུན་འདུས་སུ་བསྒོམ། བཀའ་དྲིན་དྲན་ཅིང་གུས་པ་བསྐྱེད། དད་དང་དམ་ཚིག་ལ་ངོས་ལྐོག་མེད་ཅིང་དཀའ་སྤྱད་སྙིང་རུས་ཀྱི་མགོ་བཙུགས་ནས་བླ་མའི་རྣལ་འབྱོར་ལ་བརྩོན་ན་བྱིན་རླབས་འབྱུང་བར་ཐེ་ཚོམ་མེད། དེ་ལྟ་བུའི་སྔོན་འགྲོའི་རིམ་པས་རྒྱུད་སྦྱངས་ནས་ཕྱག་རྫོགས་ཟུང་འཇུག་གི་གཞི་ལམ་འབྲས་གསུམ་གྱི་གནད་མདོར་དྲིལ་ན། རང་གི་སེམས་ཉིད་གདོད་ནས་སྐྱེ་འགགས་གནས་གསུམ་དང་དངོས་པོ་དང་མཚན་མར་མ་གྲུབ་ཡོད་མེད་ཡིན་མིན་ཐམས་ཅད་ལས་འདས་པའི་གཞི་སེམས་ཀྱི་ཆོས་ཉིད་རིག་པ་གསལ་སྟོང་ཟུང་འཇུག་འཁོར་འདས་ཀུན་ཁྱབ་གཟོད་ནས་རྣམ་པར་དག་པ་འདི་ནི་གཉུག་མ་གཞི་ཡི་བཞུགས་ཚུལ་དང་། དེ་ཉིད་བླ་མའི་བྱིན་རླབས་དང་རང་གི་མོས་གུས་འཛོམས་པས་རང་གནས་ཀྱི་ལྟ་བ་དེ་ངོ་འཕྲོད་ཅིང་དུས་གསུམ་གྱི་རྣམ་རྟོག་དང་བྲལ་བའི་ཐ་མལ་གྱི་ཤེས་པ་དེ་ལ་ཡིད་དཔྱོད་བློས་འཛིན་གྱིས་མ་བཅིངས་མ་བཅོས་བཟོ་མེད་གཉུག་མ་རང་བབ་ཀྱི་ངང་དུ་ཆོས་ཉིད་རང་གནས་ཀྱི་དྲན་པས་ཡེངས་མེད་དུ་བསྒོམ་བྱ་སྒོམ་བྱེད་དུ་བྲལ་བར་འཇོག་པ་ན་རླུང་སོ་རིག་པའི་ཡེ་ཤེས་ཀྱི་རྟེན་མེད་གཞི་རྩ་བྲལ་བ་ཡུལ་མེད་རང་གསལ་ཆེན་པོར་ཉམས་སུ་མྱོང་བ་དེ་ཡི་ངོ་བོ་སྨྲ་བསམ་བརྗོད་བྲལ་དུ་འཆར་བ་ནི་ལམ་བསྒོམ་པའི་སྐབས་དང་།           དེའི་ངང་ལས་སྤྱོད་པ་ལ་སྤངས་བླང་མེད་པར་གང་ཤར་གང་སྣང་རིག་པའི་དབྱིངས་སུ་རོ་མཉམ་པའི་སྤང་གཉེན་གཞན་ནས་བཙལ་མ་དགོས་པ་རང་ཤར་རང་གྲོལ་བྱ་ལམ་རྗེས་མེད་དུ་འགྲོ་བ་འདི་ཀ་སྤྱོད་པའི་མཐར་ཐུག དེ་ལྟར་གོམས་པ་ལ་བརྟེན་ནས་རིག་པའི་དབྱིངས་ཀ་དག་སྟོང་ཆེན་དང་། ཡེ་ཤེས་ལྷུན་གྲུབ་གཉིས་གདོད་ནས་འདུ་འབྲལ་མེད་པའི་ཡོན་ཏན་རྒྱ་མཚོ་ལྟ་བུ་རང་ཆས་སུ་བཞུགས་པ་འབྲས་བུ་གཞན་ནས་བཙལ་དུ་མེད་པ་ནང་གི་ཡོན་ཏན་ཕྱི་གསལ་དུ་ཤར་བ་ལ་གྲོལ་བ་མཐར་ཕྱིན་པའམ་འབྲས་བུ་ཞེས་མིང་གི་བརྗོད་པ་ཡིན་ནོ.