]
[Footnote 100: A wine merchant in Dumfries.
[Footnote 100: A wine merchant in Dumfries.
Robert Burns-
II.
Doctor Mac, Doctor Mac,
Ye should stretch on a rack,
And strike evil doers wi' terror;
To join faith and sense,
Upon any pretence,
Was heretic damnable error,
Doctor Mac,
Was heretic damnable error.
III.
Town of Ayr, town of Ayr,
It was rash I declare,
To meddle wi' mischief a-brewing;
Provost John is still deaf,
To the church's relief,
And orator Bob is its ruin,
Town Of Ayr,
And orator Bob is its ruin.
IV.
D'rymple mild, D'rymple mild,
Tho' your heart's like a child,
And your life like the new-driven snaw,
Yet that winna save ye,
Old Satan must have ye
For preaching that three's are an' twa,
D'rymple mild,
For preaching that three's are an' twa.
V.
Calvin's sons, Calvin's sons,
Seize your spiritual guns,
Ammunition ye never can need;
Your hearts are the stuff,
Will be powder enough,
And your skulls are a storehouse of lead,
Calvin's sons,
And your skulls are a storehouse of lead.
VI.
Rumble John, Rumble John,
Mount the steps with a groan,
Cry the book is with heresy cramm'd;
Then lug out your ladle,
Deal brimstone like aidle,
And roar every note o' the damn'd,
Rumble John,
And roar every note o' the damn'd.
VII.
Simper James, Simper James,
Leave the fair Killie dames,
There's a holier chase in your view;
I'll lay on your head,
That the pack ye'll soon lead,
For puppies like you there's but few,
Simper James,
For puppies like you there's but few.
VIII.
Singet Sawnie, Singet Sawnie,
Are ye herding the penny,
Unconscious what danger awaits?
With a jump, yell, and howl,
Alarm every soul,
For Hannibal's just at your gates,
Singet Sawnie,
For Hannibal's just at your gates.
IX.
Andrew Gowk, Andrew Gowk,
Ye may slander the book,
And the book nought the waur--let me tell you;
Tho' ye're rich and look big,
Yet lay by hat and wig,
And ye'll hae a calf's-head o' sma' value,
Andrew Gowk,
And ye'll hae a calf's-head o' sma' value.
X.
Poet Willie, Poet Willie,
Gie the doctor a volley,
Wi' your "liberty's chain" and your wit;
O'er Pegasus' side,
Ye ne'er laid a stride
Ye only stood by when he ----,
Poet Willie,
Ye only stood by when he ----.
XI.
Barr Steenie, Barr Steenie,
What mean ye? what mean ye?
If ye'll meddle nae mair wi' the matter,
Ye may hae some pretence, man,
To havins and sense, man,
Wi' people that ken ye nae better,
Barr Steenie,
Wi' people that ken ye nae better.
XII.
Jamie Goose, Jamie Goose,
Ye hae made but toom roose,
O' hunting the wicked lieutenant;
But the doctor's your mark,
For the L--d's holy ark,
He has cooper'd and ca'd a wrong pin in't,
Jamie Goose,
He has cooper'd and ca'd a wrong pin in't.
XIII.
Davie Bluster, Davie Bluster,
For a saunt if ye muster,
It's a sign they're no nice o' recruits,
Yet to worth let's be just,
Royal blood ye might boast,
If the ass were the king o' the brutes,
Davie Bluster,
If the ass were the king o' the brutes.
XIV.
Muirland George, Muirland George,
Whom the Lord made a scourge,
To claw common sense for her sins;
If ill manners were wit,
There's no mortal so fit,
To confound the poor doctor at ance,
Muirland George,
To confound the poor doctor at ance.
XV.
Cessnockside, Cessnockside,
Wi' your turkey-cock pride,
O' manhood but sma' is your share;
Ye've the figure, it's true,
Even our faes maun allow,
And your friends daurna say ye hae mair,
Cessnockside,
And your friends daurna say ye hae mair.
XVI.
Daddie Auld, Daddie Auld,
There's a tod i' the fauld
A tod meikle waur than the clerk;[93]
Tho' ye downa do skaith,
Ye'll be in at the death,
And if ye canna bite ye can bark,
Daddie Auld,
And if ye canna bite ye can bark.
XVII.
Poet Burns, Poet Burns,
Wi' your priest-skelping turns,
Why desert ye your auld native shire?
Tho' your Muse is a gipsy,
Yet were she even tipsy,
She could ca' us nae waur than we are,
Poet Burns,
She could ca' us nae waur than we are.
* * * * *
POSTSCRIPT.
Afton's Laird, Afton's Laird,
When your pen can be spar'd,
A copy o' this I bequeath,
On the same sicker score
I mentioned before,
To that trusty auld worthy Clackleith,
Afton's Laird,
To that trusty auld worthy Clackleith.
FOOTNOTES:
[Footnote 93: Gavin Hamilton. ]
* * * * *
CXI.
PEG NICHOLSON.
[These hasty verses are to be found in a letter addressed to Nicol, of
the High School of Edinburgh, by the poet, giving him on account of
the unlooked-for death of his mare, Peg Nicholson, the successor of
Jenny Geddes. She had suffered both in the employ of the joyous priest
and the thoughtless poet. She acquired her name from that frantic
virago who attempted to murder George the Third. ]
Peg Nicholson was a good bay mare,
As ever trode on airn;
But now she's floating down the Nith,
And past the mouth o' Cairn.
Peg Nicholson was a good bay mare,
And rode thro' thick an' thin;
But now she's floating down the Nith,
And wanting even the skin.
Peg Nicholson was a good bay mare,
And ance she bore a priest;
But now she's flouting down the Nith,
For Solway fish a feast.
Peg Nicholson was a good bay mare,
And the priest he rode her sair;
And much oppress'd and bruis'd she was;
As priest-rid cattle are, &c. &c.
* * * * *
CXII.
ON
CAPTAIN MATTHEW HENDERSON,
A GENTLEMAN WHO HELD THE PATENT FOR HIS HONOURS
IMMEDIATELY FROM ALMIGHTY GOD.
"Should the poor be flattered? "
SHAKSPEARE.
But now his radiant course is run,
For Matthew's course was bright;
His soul was like the glorious sun,
A matchless heav'nly light!
[Captain Matthew Henderson, a gentleman of very agreeable manners and
great propriety of character, usually lived in Edinburgh, dined
constantly at Fortune's Tavern, and was a member of the Capillaire
Club, which was composed of all who desired to be thought witty or
joyous: he died in 1789: Burns, in a note to the Poem, says, "I loved
the man much, and have not flattered his memory. " Henderson seems
indeed to have been universally liked. "In our travelling party," says
Sir James Campbell, of Ardkinglass, "was Matthew Henderson, then
(1759) and afterwards well known and much esteemed in the town of
Edinburgh; at that time an officer in the twenty-fifth regiment of
foot, and like myself on his way to join the army; and I may say with
truth, that in the course of a long life I have never known a more
estimable character, than Matthew Henderson. " _Memoirs of Campbell, of
Ardkinglass_, p. 17. ]
O death! thou tyrant fell and bloody!
The meikle devil wi' a woodie
Haurl thee hame to his black smiddie,
O'er hurcheon hides,
And like stock-fish come o'er his studdie
Wi' thy auld sides!
He's gane! he's gane! he's frae us torn,
The ae best fellow e'er was born!
Thee, Matthew, Nature's sel' shall mourn
By wood and wild,
Where, haply, pity strays forlorn,
Frae man exil'd!
Ye hills! near neebors o' the starns,
That proudly cock your cresting cairns!
Ye cliffs, the haunts of sailing yearns,
Where echo slumbers!
Come join, ye Nature's sturdiest bairns,
My wailing numbers!
Mourn, ilka grove the cushat kens!
Ye haz'lly shaws and briery dens!
Ye burnies, wimplin' down your glens,
Wi' toddlin' din,
Or foaming strang, wi' hasty stens,
Frae lin to lin!
Mourn, little harebells o'er the lea;
Ye stately foxgloves fair to see;
Ye woodbines, hanging bonnilie,
In scented bow'rs;
Ye roses on your thorny tree,
The first o' flow'rs.
At dawn, when ev'ry grassy blade
Droops with a diamond at its head,
At ev'n, when beans their fragrance shed
I' th' rustling gale,
Ye maukins whiddin thro' the glade,
Come join my wail.
Mourn, ye wee songsters o' the wood;
Ye grouse that crap the heather bud;
Ye curlews calling thro' a clud;
Ye whistling plover;
An' mourn, ye whirring paitrick brood! --
He's gane for ever!
Mourn, sooty coots, and speckled teals;
Ye fisher herons, watching eels:
Ye duck and drake, wi' airy wheels
Circling the lake;
Ye bitterns, till the quagmire reels,
Rair for his sake.
Mourn, clam'ring craiks, at close o' day,
'Mang fields o' flowering clover gay;
And when ye wing your annual way
Frae our cauld shore,
Tell thae far warlds, wha lies in clay,
Wham we deplore.
Ye houlets, frae your ivy bow'r,
In some auld tree, or eldritch tow'r,
What time the moon, wi' silent glow'r,
Sets up her horn,
Wail thro' the dreary midnight hour
'Till waukrife morn!
O rivers, forests, hills, and plains!
Oft have ye heard my canty strains:
But now, what else for me remains
But tales of woe?
And frae my een the drapping rains
Maun ever flow.
Mourn, spring, thou darling of the year!
Ilk cowslip cup shall kep a tear:
Thou, simmer, while each corny spear
Shoots up its head,
The gay, green, flow'ry tresses shear
For him that's dead!
Thou, autumn, wi' thy yellow hair,
In grief thy sallow mantle tear:
Thou, winter, hurling thro' the air
The roaring blast,
Wide, o'er the naked world declare
The worth we've lost!
Mourn him, thou sun, great source of light!
Mourn, empress of the silent night!
And you, ye twinkling starnies bright,
My Matthew mourn!
For through your orbs he's ta'en his flight,
Ne'er to return.
O, Henderson! the man--the brother!
And art thou gone, and gone for ever?
And hast thou crost that unknown river
Life's dreary bound?
Like thee, where shall I find another,
The world around?
Go to your sculptur'd tombs, ye great,
In a' the tinsel trash o' state!
But by thy honest turf I'll wait,
Thou man of worth!
And weep the ae best fellow's fate
E'er lay in earth.
THE EPITAPH.
Stop, passenger! --my story's brief,
And truth I shall relate, man;
I tell nae common tale o' grief--
For Matthew was a great man.
If thou uncommon merit hast,
Yet spurn'd at fortune's door, man,
A look of pity hither cast--
For Matthew was a poor man.
If thou a noble sodger art,
That passest by this grave, man,
There moulders here a gallant heart--
For Matthew was a brave man.
If thou on men, their works and ways,
Canst throw uncommon light, man,
Here lies wha weel had won thy praise--
For Matthew was a bright man.
If thou at friendship's sacred ca'
Wad life itself resign, man,
Thy sympathetic tear maun fa'--
For Matthew was a kind man!
If thou art staunch without a stain,
Like the unchanging blue, man,
This was a kinsman o' thy ain--
For Matthew was a true man.
If thou hast wit, and fun, and fire,
And ne'er guid wine did fear, man,
This was thy billie, dam and sire--
For Matthew was a queer man.
If ony whiggish whingin sot,
To blame poor Matthew dare, man,
May dool and sorrow be his lot!
For Matthew was a rare man.
* * * * *
CXIII.
THE FIVE CARLINS.
A SCOTS BALLAD.
Tune--_Chevy Chase. _
[This is a local and political Poem composed on the contest between
Miller, the younger, of Dalswinton, and Johnstone, of Westerhall, for
the representation of the Dumfries and Galloway district of Boroughs.
Each town or borough speaks and acts in character: Maggy personates
Dumfries; Marjory, Lochmaben; Bess of Solway-side, Annan; Whiskey Jean,
Kirkcudbright; and Black Joan, Sanquhar. On the part of Miller, all
the Whig interest of the Duke of Queensberry was exerted, and all the
Tory interest on the side of the Johnstone: the poet's heart was with
the latter. Annan and Lochmaben stood staunch by old names and old
affections: after a contest, bitterer than anything of the kind
remembered, the Whig interest prevailed. ]
There were five carlins in the south,
They fell upon a scheme,
To send a lad to London town,
To bring them tidings hame.
Not only bring them tidings hame,
But do their errands there;
And aiblins gowd and honour baith
Might be that laddie's share.
There was Maggy by the banks o' Nith,
A dame wi' pride eneugh;
And Marjory o' the mony lochs,
A carlin auld and teugh.
And blinkin' Bess of Annandale,
That dwelt near Solway-side;
And whiskey Jean, that took her gill
In Galloway sae wide.
And black Joan, frae Crighton-peel,
O' gipsey kith an' kin;--
Five wighter carlins were na found
The south countrie within.
To send a lad to London town,
They met upon a day;
And mony a knight, and mony a laird,
This errand fain wad gae.
O mony a knight, and mony a laird,
This errand fain wad gae;
But nae ane could their fancy please,
O ne'er a ane but twae.
The first ane was a belted knight,
Bred of a border band;
And he wad gae to London town,
Might nae man him withstand.
And he wad do their errands weel,
And meikle he wad say;
And ilka ane about the court
Wad bid to him gude-day.
The neist cam in a sodger youth,
And spak wi' modest grace,
And he wad gae to London town,
If sae their pleasure was.
He wad na hecht them courtly gifts,
Nor meikle speech pretend;
But he wad hecht an honest heart,
Wad ne'er desert his friend.
Then wham to chuse, and wham refuse,
At strife thir carlins fell;
For some had gentlefolks to please,
And some wad please themsel'.
Then out spak mim-mou'd Meg o' Nith,
And she spak up wi' pride,
And she wad send the sodger youth,
Whatever might betide.
For the auld gudeman o' London court
She didna care a pin;
But she wad send the sodger youth
To greet his eldest son.
Then slow raise Marjory o' the Lochs
And wrinkled was her brow;
Her ancient weed was russet gray,
Her auld Scotch heart was true.
"The London court set light by me--
I set as light by them;
And I wilt send the sodger lad
To shaw that court the same. "
Then up sprang Bess of Annandale,
And swore a deadly aith,
Says, "I will send the border-knight
Spite o' you carlins baith.
"For far-off fowls hae feathers fair,
And fools o' change are fain;
But I hae try'd this border-knight,
I'll try him yet again. "
Then whiskey Jean spak o'er her drink,
"Ye weel ken, kimmersa',
The auld gudeman o' London court,
His back's been at the wa'.
"And mony a friend that kiss'd his caup,
Is now a fremit wight;
But it's ne'er be sae wi' whiskey Jean,--
We'll send the border-knight. "
Says black Joan o' Crighton-peel,
A carlin stoor and grim,--
"The auld gudeman, or the young gudeman,
For me may sink or swim.
"For fools will prate o' right and wrang,
While knaves laugh in their sleeve;
But wha blaws best the horn shall win,
I'll spier nae courtier's leave. "
So how this mighty plea may end
There's naebody can tell:
God grant the king, and ilka man,
May look weel to himsel'!
* * * * *
CXIV.
THE LADDIES BY THE BANKS O' NITH.
[This short Poem was first published by Robert Chambers. It intimates
pretty strongly, how much the poet disapproved of the change which
came over the Duke of Queensberry's opinions, when he supported the
right of the Prince of Wales to assume the government, without consent
of Parliament, during the king's alarming illness, in 1788. ]
The laddies by the banks o' Nith,
Wad trust his Grace wi' a', Jamie,
But he'll sair them, as he sair'd the King,
Turn tail and rin awa', Jamie.
Up and waur them a', Jamie,
Up and waur them a';
The Johnstones hae the guidin' o't,
Ye turncoat Whigs awa'.
The day he stude his country's friend,
Or gied her faes a claw, Jamie:
Or frae puir man a blessin' wan,
That day the Duke ne'er saw, Jamie.
But wha is he, his country's boast?
Like him there is na twa, Jamie,
There's no a callant tents the kye,
But kens o' Westerha', Jamie.
To end the wark here's Whistlebirk,[94]
Lang may his whistle blaw, Jamie;
And Maxwell true o' sterling blue:
And we'll be Johnstones a', Jamie.
FOOTNOTES:
[Footnote 94: Birkwhistle: a Galloway laird, and elector. ]
* * * * *
CXV.
EPISTLE TO ROBERT GRAHAM, ESQ.
OF FINTRAY:
ON THE CLOSE OF THE DISPUTED ELECTION BETWEEN
SIR JAMES JOHNSTONE AND CAPTAIN MILLER, FOR
THE DUMFRIES DISTRICT OF BOROUGHS.
["I am too little a man," said Burns, in the note to Fintray, which
accompanied this poem, "to have any political attachment: I am deeply
indebted to, and have the warmest veneration for individuals of both
parties: but a man who has it in his power to be the father of a
country, and who acts like his Grace of Queensberry, is a character
that one cannot speak of with patience. " This Epistle was first
printed in my edition of Burns in 1834: I had the use of the Macmurdo
and the Afton manuscripts for that purpose: to both families the poet
was much indebted for many acts of courtesy and kindness. ]
Fintray, my stay in worldly strife,
Friend o' my muse, friend o' my life,
Are ye as idle's I am?
Come then, wi' uncouth, kintra fleg,
O'er Pegasus I'll fling my leg,
And ye shall see me try him.
I'll sing the zeal Drumlanrig bears,
Who left the all-important cares
Of princes and their darlings;
And, bent on winning borough towns,
Came shaking hands wi' wabster lowns,
And kissing barefit carlins.
Combustion thro' our boroughs rode,
Whistling his roaring pack abroad
Of mad unmuzzled lions;
As Queensberry buff and blue unfurl'd,
And Westerha' and Hopeton hurl'd
To every Whig defiance.
But cautious Queensberry left the war,
Th' unmanner'd dust might soil his star;
Besides, he hated bleeding:
But left behind him heroes bright,
Heroes in Caesarean fight,
Or Ciceronian pleading.
O! for a throat like huge Mons-meg,
To muster o'er each ardent Whig
Beneath Drumlanrig's banner;
Heroes and heroines commix,
All in the field of politics,
To win immortal honour.
M'Murdo[95] and his lovely spouse,
(Th' enamour'd laurels kiss her brows! )
Led on the loves and graces:
She won each gaping burgess' heart,
While he, all-conquering, play'd his part
Among their wives and lasses.
Craigdarroch[96] led a light-arm'd corps,
Tropes, metaphors and figures pour,
Like Hecla streaming thunder:
Glenriddel,[97] skill'd in rusty coins,
Blew up each Tory's dark designs,
And bar'd the treason under.
In either wing two champions fought,
Redoubted Staig[98] who set at nought
The wildest savage Tory:
And Welsh,[99] who ne'er yet flinch'd his ground,
High-wav'd his magnum-bonum round
With Cyclopeian fury.
Miller brought up th' artillery ranks,
The many-pounders of the Banks,
Resistless desolation!
While Maxwelton, that baron bold,
'Mid Lawson's[100] port intrench'd his hold,
And threaten'd worse damnation.
To these what Tory hosts oppos'd,
With these what Tory warriors clos'd.
Surpasses my descriving:
Squadrons extended long and large,
With furious speed rush to the charge,
Like raging devils driving.
What verse can sing, what prose narrate,
The butcher deeds of bloody fate
Amid this mighty tulzie!
Grim Horror grinn'd--pale Terror roar'd,
As Murther at his thrapple shor'd,
And hell mix'd in the brulzie.
As highland craigs by thunder cleft,
When lightnings fire the stormy lift,
Hurl down with crashing rattle:
As flames among a hundred woods;
As headlong foam a hundred floods;
Such is the rage of battle!
The stubborn Tories dare to die;
As soon the rooted oaks would fly
Before the approaching fellers:
The Whigs come on like Ocean's roar,
When all his wintry billows pour
Against the Buchan Bullers.
Lo, from the shades of Death's deep night,
Departed Whigs enjoy the fight,
And think on former daring:
The muffled murtherer[101] of Charles
The Magna Charter flag unfurls,
All deadly gules it's bearing.
Nor wanting ghosts of Tory fame.
Bold Scrimgeour[102] follows gallant Graham,[103]
Auld Covenanters shiver.
(Forgive, forgive, much-wrong'd Montrose!
Now death and hell engulph thy foes,
Thou liv'st on high for ever! )
Still o'er the field the combat burns,
The Tories, Whigs, give way by turns;
But fate the word has spoken:
For woman's wit and strength o' man,
Alas! can do but what they can!
The Tory ranks are broken.
O that my een were flowing burns,
My voice a lioness that mourns
Her darling cubs' undoing!
That I might greet, that I might cry,
While Tories fall, while Tories fly,
And furious Whigs pursuing!
What Whig but melts for good Sir James!
Dear to his country by the names
Friend, patron, benefactor!
Not Pulteney's wealth can Pulteney save!
And Hopeton falls, the generous brave!
And Stewart,[104] bold as Hector.
Thou, Pitt, shalt rue this overthrow;
And Thurlow growl a curse of woe;
And Melville melt in wailing!
How Fox and Sheridan rejoice!
And Burke shall sing, O Prince, arise,
Thy power is all prevailing!
For your poor friend, the Bard, afar
He only hears and sees the war,
A cool spectator purely;
So, when the storm the forests rends,
The robin in the hedge descends,
And sober chirps securely.
FOOTNOTES:
[Footnote 95: John M'Murdo, Esq. , of Drumlanrig. ]
[Footnote 96: Fergusson of Craigdarroch. ]
[Footnote 97: Riddel of Friars-Carse. ]
[Footnote 98: Provost Staig of Dumfries. ]
[Footnote 99: Sheriff Welsh.
]
[Footnote 100: A wine merchant in Dumfries. ]
[Footnote 101: The executioner of Charles I. was masked. ]
[Footnote 102: Scrimgeour, Lord Dundee. ]
[Footnote 103: Graham, Marquis of Montrose. ]
[Footnote 104: Stewart of Hillside. ]
* * * * *
CXVI.
ON
CAPTAIN GROSE'S
PEREGRINATIONS THROUGH SCOTLAND,
COLLECTING THE
ANTIQUITIES OF THAT KINGDOM.
[This "fine, fat, fodgel wight" was a clever man, a skilful antiquary,
and fond of wit and wine. He was well acquainted with heraldry, and
was conversant with the weapons and the armor of his own and other
countries. He found his way to Friars-Carse, in the Vale of Nith, and
there, at the social "board of Glenriddel," for the first time saw
Burns. The Englishman heard, it is said, with wonder, the sarcastic
sallies and eloquent bursts of the inspired Scot, who, in his turn,
surveyed with wonder the remarkable corpulence, and listened with
pleasure to the independent sentiments and humourous turns of
conversation in the joyous Englishman. This Poem was the fruit of the
interview, and it is said that Grose regarded some passages as rather
personal. ]
Hear, Land o' Cakes and brither Scots,
Frae Maidenkirk to Johnny Groat's;
If there's a hole in a' your coats,
I rede you tent it:
A chiel's amang you taking notes,
And, faith, he'll prent it!
If in your bounds ye chance to light
Upon a fine, fat, fodgel wight,
O' stature short, but genius bright,
That's he, mark weel--
And wow! he has an unco slight
O' cauk and keel.
By some auld, houlet-haunted biggin,
Or kirk deserted by its riggin,
It's ten to one ye'll find him snug in
Some eldritch part,
Wi' deils, they say, L--d save's! colleaguin'
At some black art.
Ilk ghaist that haunts auld ha' or chaumer,
Ye gipsey-gang that deal in glamour,
And you deep read in hell's black grammar,
Warlocks and witches;
Ye'll quake at his conjuring hammer,
Ye midnight b----s!
It's tauld he was a sodger bred,
And ane wad rather fa'n than fled;
But now he's quat the spurtle-blade,
And dog-skin wallet,
And ta'en the--Antiquarian trade,
I think they call it.
He has a fouth o' auld nick-nackets:
Rusty airn caps and jinglin' jackets,
Wad haud the Lothians three in tackets,
A towmont guid;
And parritch-pats, and auld saut-backets,
Afore the flood.
Of Eve's first fire he has a cinder;
Auld Tubal-Cain's fire-shool and fender;
That which distinguished the gender
O' Balaam's ass;
A broom-stick o' the witch o' Endor,
Weel shod wi' brass.
Forbye, he'll shape you aff, fu' gleg,
The cut of Adam's philibeg:
The knife that nicket Abel's craig
He'll prove you fully,
It was a faulding jocteleg,
Or lang-kail gully. --
But wad ye see him in his glee,
For meikle glee and fun has he,
Then set him down, and twa or three
Guid fellows wi' him;
And port, O port! shine thou a wee,
And then ye'll see him!
Now, by the pow'rs o' verse and prose!
Thou art a dainty chiel, O Grose! --
Whae'er o' thee shall ill suppose,
They sair misca' thee;
I'd take the rascal by the nose,
Wad say, Shame fa' thee!
* * * * *
CXVII.
WRITTEN IN A WRAPPER,
ENCLOSING
A LETTER TO CAPTAIN GROSE.
[Burns wrote out some antiquarian and legendary memoranda, respecting
certain ruins in Kyle, and enclosed them in a sheet of a paper to
Cardonnel, a northern antiquary. As his mind teemed with poetry he
could not, as he afterwards said, let the opportunity, pass of sending
a rhyming inquiry after his fat friend, and Cardonnel spread the
condoling inquiry over the North--
"Is he slain by Highlan' bodies?
And eaten like a wether-haggis? "]
Ken ye ought o' Captain Grose?
Igo and ago,
If he's amang his friends or foes?
Iram, coram, dago.
Is he south or is he north?
Igo and ago,
Or drowned in the river Forth?
Iram, coram, dago.
Is he slain by Highlan' bodies?
Igo and ago,
And eaten like a wether-haggis?
Iram, coram, dago.
Is he to Abram's bosom gane?
Igo and ago,
Or haudin' Sarah by the wame?
Iram, coram, dago.
Where'er he be, the L--d be near him!
Igo and ago,
As for the deil, he daur na steer him!
Iram, coram, dago.
But please transmit the enclosed letter,
Igo and ago,
Which will oblige your humble debtor,
Iram, coram, dago.
So may he hae auld stanes in store,
Igo and ago,
The very stanes that Adam bore,
Iram, coram, dago.
So may ye get in glad possession,
Igo and ago,
The coins o' Satan's coronation!
Iram, coram, dago.
* * * * *
CXVIII.
TAM O' SHANTER.
A TALE.
"Of brownys and of bogilis full is this buke. "
GAWIN DOUGLAS
[This is a West-country legend, embellished by genius. No other Poem
in our language displays such variety of power, in the same number of
lines. It was written as an inducement to Grose to admit Alloway-Kirk
into his work on the Antiquities of Scotland; and written with such
ecstasy, that the poet shed tears in the moments of composition. The
walk in which it was conceived, on the braes of Ellisland, is held in
remembrance in the vale, and pointed out to poetic inquirers: while
the scene where the poem is laid--the crumbling ruins--the place where
the chapman perished in the snow--the tree on which the poor mother of
Mungo ended her sorrows--the cairn where the murdered child was found
by the hunters--and the old bridge over which Maggie bore her
astonished master when all hell was in pursuit, are first-rate objects
of inspection and inquiry in the "Land of Burns. " "In the inimitable
tale of Tam o' Shanter," says Scott "Burns has left us sufficient
evidence of his ability to combine the ludicrous with the awful, and
even the horrible. No poet, with the exception of Shakspeare, ever
possessed the power of exciting the most varied and discordant
emotions with such rapid transitions. "]
When chapman billies leave the street,
And drouthy neebors neebors meet,
As market-days are wearing late,
An' folk begin to tak' the gate;
While we sit bousing at the nappy,
An' gettin' fou and unco happy,
We think na on the lang Scots miles,
The mosses, waters, slaps, and stiles,
That lie between us and our hame,
Where sits our sulky sullen dame,
Gathering her brows like gathering storm,
Nursing her wrath to keep it warm.
This truth fand honest Tam O' Shanter,
As he frae Ayr ae night did canter,
(Auld Ayr, wham ne'er a town surpasses,
For honest men and bonny lasses. )
O Tam! hadst thou but been sae wise,
As ta'en thy ain wife Kate's advice!
She tauld thee weel thou was a skellum,
A blethering, blustering, drunken blellum;
That frae November till October,
Ae market-day thou wasna sober;
That ilka melder, wi' the miller,
Thou sat as lang as thou had siller;
That ev'ry naig was ca'd a shoe on,
The smith and thee gat roaring fou on;
That at the Lord's house, ev'n on Sunday,
Thou drank wi' Kirton Jean till Monday.
She prophesy'd, that late or soon,
Thou would be found deep drown'd in Doon;
Or catch'd wi' warlocks in the mirk,
By Alloway's auld haunted kirk.
Ah, gentle dames! it gars me greet,
To think how mony counsels sweet,
How mony lengthen'd sage advices,
The husband frae the wife despises!
But to our tale:--Ae market night,
Tam had got planted unco right;
Fast by an ingle bleezing finely,
Wi' reaming swats, that drank divinely;
And at his elbow, Souter Johnny,
His ancient, trusty, drouthy crony;
Tam lo'ed him like a vera brither;
They had been fou' for weeks thegither!
The night drave on wi' sangs an' clatter;
And ay the ale was growing better:
The landlady and Tam grew gracious;
Wi' favors secret, sweet, and precious;
The Souter tauld his queerest stories;
The landlord's laugh was ready chorus:[105]
The storm without might rair and rustle--
Tam did na mind the storm a whistle.
Care, mad to see a man sae happy,
E'en drown'd himself amang the nappy!
As bees flee hame wi' lades o' treasure,
The minutes wing'd their way wi' pleasure:
Kings may be blest, but Tam was glorious,
O'er a' the ills o' life victorious.
But pleasures are like poppies spread,
You seize the flow'r, its bloom is shed;
Or like the snow falls in the river,
A moment white--then melts for ever;
Or like the borealis race,
That flit ere you can point their place;
Or like the rainbow's lovely form
Evanishing amid the storm.
Nae man can tether time or tide;
The hour approaches Tam maun ride;
That hour, o' night's black arch the key-stane,
That dreary hour he mounts his beast in;
And sic a night he taks the road in
As ne'er poor sinner was abroad in.
The wind blew as 'twad blawn its last;
The rattling show'rs rose on the blast;
The speedy gleams the darkness swallow'd;
Loud, deep, and lang the thunder bellow'd:
That night, a child might understand,
The de'il had business on his hand.
Weel mounted on his gray mare, Meg,
A better never lifted leg,
Tam skelpit on thro' dub and mire,
Despising wind, and rain, and fire;
Whiles holding fast his guid blue bonnet;
Whiles crooning o'er some auld Scots sonnet;
Whiles glow'ring round wi' prudent cares,
Lest bogles catch him unawares;
Kirk-Alloway was drawing nigh,
Whare ghaists and houlets nightly cry. --
By this time he was cross the foord,
Whare in the snaw the chapman smoor'd;
And past the birks and meikle stane,
Where drunken Charlie brak's neck-bane;
And thro' the whins, and by the cairn,
Where hunters fand the murder'd bairn;
And near the thorn, aboon the well,
Where Mungo's mither hang'd hersel'.
Before him Doon pours all his floods;
The doubling storm roars thro' the woods;
The lightnings flash from pole to pole;
Near and more the thunders roll;
When, glimmering thro' the groaning trees,
Kirk-Alloway seem'd in a bleeze;
Thro' ilka bore the beams were glancing;
And loud resounded mirth and dancing.
Inspiring, bold John Barleycorn!
What dangers thou canst make us scorn!
Wi' tippenny, we fear nae evil;
Wi' usquabae we'll face the devil!
The swats sae ream'd in Tammie's noddle,
Fair play, he car'd nae deils a boddle.
But Maggie stood right sair astonish'd,
'Till, by the heel and hand admonish'd,
She ventur'd forward on the light;
And wow! Tam saw an unco sight!
Warlocks and witches in a dance;
Nae cotillion brent new frae France,
But hornpipes, jigs, strathspeys, and reels,
Put life and mettle in their heels:
A winnock-bunker in the east,
There sat auld Nick, in shape o' beast;
A towzie tyke, black, grim, and large,
To gie them music was his charge;
He screw'd the pipes and gart them skirl,
Till roof and rafters a' did dirl. --
Coffins stood round, like open presses;
That shaw'd the dead in their last dresses;
And by some devilish cantrip slight
Each in its cauld hand held a light--
By which heroic Tam was able
To note upon the haly table,
A murderer's banes in gibbet airns;
Twa span-lang, wee, unchristen'd bairns;
A thief, new-cutted frae a rape,
Wi' his last gasp his gab did gape;
Five tomahawks, wi' bluid red-rusted;
Five scimitars, wi' murder crusted;
A garter, which a babe had strangled;
A knife, a father's throat had mangled,
Whom his ain son o' life bereft,
The gray hairs yet stack to the heft:[106]
Wi' mair o' horrible and awfu',
Which ev'n to name would be unlawfu'.
As Tammie glowr'd, amaz'd, and curious,
The mirth and fun grew fast and furious:
The piper loud and louder blew;
The dancers quick and quicker flew;
They reel'd, they set, they cross'd, they cleekit,
'Till ilka carlin swat and reekit,
And coost her duddies to the wark,
And linket at it in her sark!
Now Tam, O Tam! had thae been queans
A' plump and strapping, in their teens;
Their sarks, instead o' creeshie flannen,
Been snaw-white seventeen hunder linen,
Thir breeks o' mine, my only pair,
That ance were plush, o' guid blue hair,
I wad hae gi'en them off my hurdies,
For ae blink o' the bonnie burdies!
But wither'd beldams, auld and droll,
Rigwoodie hags, wad spean a foal,
Lowping an' flinging on a cummock,
I wonder didna turn thy stomach.
But Tam kenn'd what was what fu' brawlie,
There was a winsome wench and walie,
That night enlisted in the core,
(Lang after kenn'd on Carrick shore;
For mony a beast to dead she shot,
And perish'd mony a bonnie boat,
And shook baith meikle corn and bear,
And kept the country-side in fear. )
Her cutty sark, o' Paisley harn,
That, while a lassie, she had worn,
In longitude tho' sorely scanty,
It was her best, and she was vauntie--
Ah! little kenn'd the reverend grannie,
That sark she coft for her wee Nannie,
Wi' twa pund Scots ('twas a' her riches),
Wad ever grac'd a dance of witches!
But here my muse her wing maun cour;
Sic flights are far beyond her pow'r;
To sing how Nannie lap and flang,
(A souple jade she was and strung,)
And how Tam stood, like ane bewitch'd;
And thought his very een enrich'd;
Even Satan glowr'd, and fidg'd fu' fain,
And hotch'd and blew wi' might and main:
'Till first ae caper, syne anither,
Tam tint his reason a' thegither,
And roars out, "Weel done, Cutty-sark! "
And in an instant all was dark:
And scarcely had he Maggie rallied,
When out the hellish legion sallied.
As bees bizz out wi' angry fyke,
When plundering herds assail their byke;
As open pussie's mortal foes,
When, pop! she starts before their nose;
As eager runs the market-crowd,
When "Catch the thief! " resounds aloud;
So Maggie runs, the witches follow,
Wi' mony an eldritch screech and hollow.
Ah, Tam! Ah, Tam! thou'll get thy fairin'!
In hell they'll roast thee like a herrin'!
In vain thy Kate awaits thy comin'!
Kate soon will be a woefu' woman!
Now do thy speedy utmost, Meg,
And win the key-stane[107] of the brig;
There at them thou thy tail may toss,
A running stream they darena cross!
But ere the key-stane she could make,
The fient a tail she had to shake!
For Nannie, far before the rest,
Hard upon noble Maggie prest,
And flew at Tam wi' furious ettle;
But little wist she Maggie's mettle--
Ae spring brought off her master hale,
But left behind her ain gray tail:
The carlin claught her by the rump,
And left poor Maggie scarce a stump.
Now, wha this tale o' truth shall read,
Ilk man and mother's son, take heed:
Whene'er to drink you are inclin'd,
Or cutty-sarks run in your mind,
Think! ye may buy the joys o'er dear--
Remember Tam O' Shanter's mare.
FOOTNOTES:
[Footnote 105: VARIATION.
The cricket raised its cheering cry,
The kitten chas'd its tail in joy. ]
[Footnote 106: VARIATION.
Three lawyers' tongues turn'd inside out,
Wi' lies seem'd like a beggar's clout;
And priests' hearts rotten black as muck,
Lay stinking vile, in every neuk. ]
[Footnote 107: It is a well-known fact that witches, or any evil
spirits, have no power to follow a poor wight any further than the
middle of the next running stream. It may be proper likewise to
mention to the benighted traveller, that when he falls in with
_bogles_, whatever danger there may be in his going forward, there is
much more hazard in turning back. ]
* * * * *
CXIX.
ADDRESS OF BEELZEBUB
TO THE
PRESIDENT OF THE HIGHLAND SOCIETY.
[This Poem made its first appearance, as I was assured by my friend
the late Thomas Pringle, in the Scots Magazine, for February, 1818,
and was printed from the original in the handwriting of Burns. It was
headed thus, "To the Right honorable the Earl of Brendalbyne,
President of the Right Honourable and Honourable the Highland Society,
which met on the 23d of May last, at the Shakspeare, Covent Garden, to
concert ways and means to frustrate the designs of four hundred
Highlanders, who, as the Society were informed by Mr. M. ----, of A----s,
were so audacious as to attempt an escape from their lawful lairds
and masters, whose property they were, by emigrating from the lands of
Mr. Macdonald, of Glengarry, to the wilds of Canada, in search of that
fantastic thing--LIBERTY. " The Poem was communicated by Burns
to his friend Rankine of Adam Hill, in Ayrshire. ]
Long life, my Lord, an' health be yours,
Unskaith'd by hunger'd Highland boors;
Lord grant mae duddie desperate beggar,
Wi' dirk, claymore, or rusty trigger,
May twin auld Scotland o' a life
She likes--as lambkins like a knife.
Faith, you and A----s were right
To keep the Highland hounds in sight;
I doubt na! they wad bid nae better
Than let them ance out owre the water;
Then up among the lakes and seas
They'll mak' what rules and laws they please;
Some daring Hancock, or a Franklin';
May set their Highland bluid a ranklin';
Some Washington again may head them,
Or some Montgomery fearless lead them,
Till God knows what may be effected
When by such heads and hearts directed--
Poor dunghill sons of dirt and mire
May to Patrician rights aspire!
Nae sage North, now, nor sager Sackville,
To watch and premier o'er the pack vile,
An' whare will ye get Howes and Clintons
To bring them to a right repentance,
To cowe the rebel generation,
An' save the honour o' the nation?
They an' be d----d! what right hae they
To meat or sleep, or light o' day?
Far less to riches, pow'r, or freedom,
But what your lordship likes to gie them?
But hear, my lord! Glengarry, hear!
Your hand's owre light on them, I fear;
Your factors, grieves, trustees, and bailies,
I canna' say but they do gaylies;
They lay aside a' tender mercies,
An' tirl the hallions to the birses;
Yet while they're only poind't and herriet,
They'll keep their stubborn Highland spirit;
But smash them! crash them a' to spails!
An' rot the dyvors i' the jails!
The young dogs, swinge them to the labour;
Let wark an' hunger mak' them sober!
The hizzies, if they're aughtlins fawsont,
Let them in Drury-lane be lesson'd!
An' if the wives an' dirty brats
E'en thigger at your doors an' yetts,
Flaffan wi' duds an' grey wi' beas',
Frightin' awa your deuks an' geese,
Get out a horsewhip or a jowler,
The langest thong, the fiercest growler,
An' gar the tattered gypsies pack
Wi' a' their bastards on their back!
Go on, my Lord! I lang to meet you,
An' in my house at hame to greet you;
Wi' common lords ye shanna mingle,
The benmost neuk beside the ingle,
At my right han' assigned your seat
'Tween Herod's hip an Polycrate,--
Or if you on your station tarrow,
Between Almagro and Pizarro,
A seat I'm sure ye're weel deservin't;
An' till ye come--Your humble rervant,
BEELZEBUB.
_June 1st, Anno Mundi 5790. _
* * * * *
CXX.
TO
JOHN TAYLOR.
[Burns, it appears, was, in one of his excursions in revenue matters,
likely to be detained at Wanlockhead: the roads were slippery with
ice, his mare kept her feet with difficulty, and all the blacksmiths
of the village were pre-engaged. To Mr. Taylor, a person of influence
in the place, the poet, in despair, addressed this little Poem,
begging his interference: Taylor spoke to a smith; the smith flew to
his tools, sharpened or frosted the shoes, and it is said lived for
thirty years to boast that he had "never been well paid but ance, and
that was by a poet, who paid him in money, paid him in drink, and paid
him in verse. "]
With Pegasus upon a day,
Apollo weary flying,
Through frosty hills the journey lay,
On foot the way was plying,
Poor slip-shod giddy Pegasus
Was but a sorry walker;
To Vulcan then Apollo goes,
To get a frosty calker.
Obliging Vulcan fell to work,
Threw by his coat and bonnet,
And did Sol's business in a crack;
Sol paid him with a sonnet.
Ye Vulcan's sons of Wanlockhead,
Pity my sad disaster;
My Pegasus is poorly shod--
I'll pay you like my master.
ROBERT BURNS.
_Ramages_, _3 o'clock_, (_no date. _)
* * * * *
CXXI.
LAMENT
OF
MARY, QUEEN OF SCOTS,
ON THE APPROACH OF SPRING.
[The poet communicated this "Lament" to his friend, Dr. Moore, in
February, 1791, but it was composed about the close of the preceding
year, at the request of Lady Winifred Maxwell Constable, of
Terreagles, the last in direct descent of the noble and ancient house
of Maxwell, of Nithsdale. Burns expressed himself more than commonly
pleased with this composition; nor was he unrewarded, for Lady
Winifred gave him a valuable snuff-box, with the portrait of the
unfortunate Mary on the lid. The bed still keeps its place in
Terreagles, on which the queen slept as she was on her way to take
refuge with her cruel and treacherous cousin, Elizabeth; and a letter
from her no less unfortunate grandson, Charles the First, calling the
Maxwells to arm in his cause, is preserved in the family archives. ]
I.
Now Nature hangs her mantle green
On every blooming tree,
And spreads her sheets o' daisies white
Out o'er the grassy lea:
Now Phoebus cheers the crystal streams,
And glads the azure skies;
But nought can glad the weary wight
That fast in durance lies.
II.
Now lav'rocks wake the merry morn,
Aloft on dewy wing;
The merle, in his noontide bow'r,
Makes woodland echoes ring;
The mavis wild wi' mony a note,
Sings drowsy day to rest:
In love and freedom they rejoice,
Wi' care nor thrall opprest.
III.
Now blooms the lily by the bank,
The primrose down the brae;
The hawthorn's budding in the glen,
And milk-white is the slae;
The meanest hind in fair Scotland
May rove their sweets amang;
But I, the Queen of a' Scotland,
Maun lie in prison strang!
IV.
I was the Queen o' bonnie France,
Where happy I hae been;
Fu' lightly rase I in the morn,
As blythe lay down at e'en:
And I'm the sov'reign o' Scotland,
And mony a traitor there;
Yet here I lie in foreign bands
And never-ending care.
V.
But as for thee, thou false woman!
My sister and my fae,
Grim vengeance yet shall whet a sword
That thro' thy soul shall gae!
The weeping blood in woman's breast
Was never known to thee;
Nor th' balm that draps on wounds of woe
Frae woman's pitying e'e.
VI.
My son! my son! may kinder stars
Upon thy fortune shine;
And may those pleasures gild thy reign,
That ne'er wad blink on mine!
God keep thee frae thy mother's faes,
Or turn their hearts to thee:
And where thou meet'st thy mother's friend
Remember him for me!
VII.
O! soon, to me, may summer suns
Nae mair light up the morn!
Nae mair, to me, the autumn winds
Wave o'er the yellow corn!
And in the narrow house o' death
Let winter round me rave;
And the next flow'rs that deck the spring
Bloom on my peaceful grave!
* * * * *
CXXII.
THE WHISTLE.
["As the authentic prose history," says Burns, "of the 'Whistle' is
curious, I shall here give it. In the train of Anne of Denmark, when
she came to Scotland with our James the Sixth, there came over also a
Danish gentleman of gigantic stature and great prowess, and a
matchless champion of Bacchus. He had a little ebony whistle, which at
the commencement of the orgies, he laid on the table, and whoever was
the last able to blow it, everybody else being disabled by the potency
of the bottle, was to carry off the whistle as a trophy of victory.
The Dane produced credentials of his victories, without a single
defeat, at the courts of Copenhagen, Stockholm, Moscow, Warsaw, and
several of the petty courts in Germany; and challenged the Scotch
Bacchanalians to the alternative of trying his prowess, or else of
acknowledging their inferiority. After man overthrows on the part of
the Scots, the Dane was encountered by Sir Robert Lawrie, of
Maxwelton, ancestor of the present worthy baronet of that name; who,
after three days and three nights' hard contest, left the Scandinavian
under the table,
'And blew on the whistle his requiem shrill. '
"Sir Walter, son to Sir Robert before mentioned, afterwards lost the
whistle to Walter Riddel, of Glenriddel, who had married a sister of
Sir Walter's. --On Friday, the 16th of October, 1790, at Friars-Carse,
the whistle was once more contended for, as related in the ballad, by
the present Sir Robert of Maxwelton; Robert Riddel, Esq. , of
Glenriddel, lineal descendant and representative of Walter Riddel, who
won the whistle, and in whose family it had continued; and Alexander
Fergusson, Esq. , of Craigdarroch, likewise descended of the great Sir
Robert; which last gentleman carried off the hard-won honours of the
field. "
The jovial contest took place in the dining-room of Friars-Carse, in
the presence of the Bard, who drank bottle and bottle about with them,
and seemed quite disposed to take up the conqueror when the day
dawned. ]
I sing of a whistle, a whistle of worth,
I sing of a whistle, the pride of the North,
Was brought to the court of our good Scottish king,
And long with this whistle all Scotland shall ring.
Old Loda,[108] still rueing the arm of Fingal,
The god of the bottle sends down from his hall--
"This whistle's your challenge--to Scotland get o'er,
And drink them to hell, Sir! or ne'er see me more! "
Old poets have sung, and old chronicles tell,
What champions ventur'd, what champions fell;
The son of great Loda was conqueror still,
And blew on his whistle his requiem shrill.
Till Robert, the Lord of the Cairn and the Scaur,
Unmatch'd at the bottle, unconquer'd in war,
He drank his poor godship as deep as the sea,
No tide of the Baltic e'er drunker than he.
Thus Robert, victorious, the trophy has gain'd;
Which now in his house has for ages remain'd;
Till three noble chieftains, and all of his blood,
The jovial contest again have renew'd.
Three joyous good fellows, with hearts clear of flaw;
Craigdarroch, so famous for wit, worth, and law;
And trusty Glenriddel, so skill'd in old coins;
And gallant Sir Robert, deep-read in old wines.
Craigdarroch began, with a tongue smooth as oil,
Desiring Glenriddel to yield up the spoil;
Or else he would muster the heads of the clan,
And once more, in claret, try which was the man.
