THE CARLE OF
KELLYBURN
BRAES.
Robert Forst
* * * * *
CXXIII.
MY COLLIER LADDIE.
Tune--"_The Collier Laddie. _"
[The Collier Laddie was communicated by Burns, and in his handwriting,
to the Museum: it is chiefly his own composition, though coloured by
an older strain. ]
I.
Where live ye, my bonnie lass?
An' tell me what they ca' ye;
My name, she says, is Mistress Jean,
And I follow the Collier Laddie.
My name she says, is Mistress Jean,
And I follow the Collier Laddie.
II.
See you not yon hills and dales,
The sun shines on sae brawlie!
They a' are mine, and they shall be thine,
Gin ye'll leave your Collier Laddie.
They a' are mine, and they shall be thine,
Gin ye'll leave your Collier Laddie.
III.
Ye shall gang in gay attire,
Weel buskit up sae gaudy;
And ane to wait on every hand,
Gin ye'll leave your Collier Laddie.
And ane to wait on every hand,
Gin ye'll leave your Collier Laddie.
IV.
Tho' ye had a' the sun shines on,
And the earth conceals sae lowly;
I wad turn my back on you and it a',
And embrace my Collier Laddie.
I wad turn my back on you and it a',
And embrace my Collier Laddie.
V.
I can win my five pennies a day,
And spen't at night fu' brawlie;
And make my bed in the Collier's neuk,
And lie down wi' my Collier Laddie.
And make my bed in the Collier's neuk,
And lie down wi' my Collier Laddie.
VI.
Luve for luve is the bargain for me,
Tho' the wee cot-house should haud me;
And the world before me to win my bread,
And fair fa' my Collier Laddie.
And the world before me to win my bread,
And fair fa' my Collier Laddie.
* * * * *
CXXIV.
NITHSDALE'S WELCOME HAME.
[These verses were written by Burns for the Museum: the Maxwells of
Terreagles are the lineal descendants of the Earls of Nithsdale. ]
I.
The noble Maxwells and their powers
Are coming o'er the border,
And they'll gae bigg Terreagle's towers,
An' set them a' in order.
And they declare Terreagles fair,
For their abode they chuse it;
There's no a heart in a' the land,
But's lighter at the news o't.
II.
Tho' stars in skies may disappear,
And angry tempests gather;
The happy hour may soon be near
That brings us pleasant weather:
The weary night o' care and grief
May hae a joyful morrow;
So dawning day has brought relief--
Fareweel our night o' sorrow!
* * * * *
CXXV.
AS I WAS A-WAND'RING.
Tune--"_Rinn Meudial mo Mhealladh. _"
[The original song in the Gaelic language was translated for Burns by
an Inverness-shire lady; he turned it into verse, and sent it to the
Museum. ]
I.
As I was a-wand'ring ae midsummer e'enin',
The pipers and youngsters were making their game;
Amang them I spied my faithless fause lover,
Which bled a' the wound o' my dolour again.
Weel, since he has left me, may pleasure gae wi' him;
I may be distress'd, but I winna complain;
I flatter my fancy I may get anither,
My heart it shall never be broken for ane.
II.
I could na get sleeping till dawin for greetin',
The tears trickled down like the hail and the rain:
Had I na got greetin', my heart wad a broken,
For, oh! luve forsaken's a tormenting pain.
III.
Although he has left me for greed o' the siller,
I dinna envy him the gains he can win;
I rather wad bear a' the lade o' my sorrow
Than ever hae acted sae faithless to him.
Weel, since he has left me, may pleasure gae wi' him,
I may be distress'd, but I winna complain;
I flatter my fancy I may get anither,
My heart it shall never be broken for ane.
* * * * *
CXXVI.
BESS AND HER SPINNING-WHEEL.
Tune--"_The sweet lass that lo'es me. _"
[There are several variations of this song, but they neither affect
the sentiment, nor afford matter for quotation. ]
I.
O leeze me on my spinning-wheel,
O leeze me on the rock and reel;
Frae tap to tae that cleeds me bien,
And haps me fiel and warm at e'en!
I'll set me down and sing and spin,
While laigh descends the simmer sun,
Blest wi' content, and milk and meal--
O leeze me on my spinning-wheel!
II.
On ilka hand the burnies trot,
And meet below my theekit cot;
The scented birk and hawthorn white,
Across the pool their arms unite,
Alike to screen the birdie's nest,
And little fishes' caller rest:
The sun blinks kindly in the biel',
Where blithe I turn my spinning-wheel.
III.
On lofty aiks the cushats wail,
And Echo cons the doolfu' tale;
The lintwhites in the hazel braes,
Delighted, rival ither's lays:
The craik amang the clover hay,
The paitrick whirrin o'er the ley,
The swallow jinkin round my shiel,
Amuse me at my spinning-wheel.
IV.
Wi' sma' to sell, and less to buy,
Aboon distress, below envy,
O wha wad leave this humble state,
For a' the pride of a' the great?
Amid their flaring, idle toys,
Amid their cumbrous, dinsome joys,
Can they the peace and pleasure feel
Of Bessy at her spinning-wheel?
* * * * *
CXXVII.
O LUVE WILL VENTURE IN.
Tune--"_The Posie. _"
["The Posie is my composition," says Burns, in a letter to Thomson.
"The air was taken down from Mrs. Burns's voice. " It was first printed
in the Museum. ]
I.
O luve will venture in
Where it daurna weel be seen;
O luve will venture in
Where wisdom ance has been.
But I will down yon river rove,
Among the wood sae green--
And a' to pu' a posie
To my ain dear May.
II.
The primrose I will pu',
The firstling o' the year,
And I will pu' the pink,
The emblem o' my dear,
For she's the pink o' womankind,
And blooms without a peer--
And a' to be a posie
To my ain dear May.
III.
I'll pu' the budding rose,
When Phoebus peeps in view,
For it's like a baumy kiss
O' her sweet bonnie mou';
The hyacinth's for constancy,
Wi' its unchanging blue--
And a' to be a posie
To my ain dear May.
IV.
The lily it is pure,
And the lily it is fair,
And in her lovely bosom
I'll place the lily there;
The daisy's for simplicity,
And unaffected air--
And a' to be a posie
To my ain dear May.
V.
The hawthorn I will pu'
Wi' its locks o' siller gray,
Where, like an aged man,
It stands at break of day.
But the songster's nest within the bush
I winna tak away--
And a' to be a posie
To my ain dear May.
VI.
The woodbine I will pu'
When the e'ening star is near,
And the diamond drops o' dew
Shall be her e'en sae clear;
The violet's for modesty,
Which weel she fa's to wear,
And a' to be a posie
To my ain dear May.
VII.
I'll tie the posie round,
Wi' the silken band o' luve,
And I'll place it in her breast,
And I'll swear by a' above,
That to my latest draught of life
The band shall ne'er remove,
And this will be a posie
To my ain dear May.
* * * * *
CXXVIII.
COUNTRY LASSIE.
Tune--"_The Country Lass. _"
[A manuscript copy before me, in the poet's handwriting, presents two
or three immaterial variations of this dramatic song. ]
I.
In simmer, when the hay was mawn,
And corn wav'd green in ilka field,
While claver blooms white o'er the lea,
And roses blaw in ilka bield;
Blithe Bessie in the milking shiel,
Says--I'll be wed, come o't what will;
Out spak a dame in wrinkled eild--
O' guid advisement comes nae ill.
II.
It's ye hae wooers mony ane,
And, lassie, ye're but young ye ken;
Then wait a wee, and cannie wale,
A routhie butt, a routhie ben:
There's Johnie o' the Buskie-glen,
Fu' is his burn, fu' is his byre;
Tak this frae me, my bonnie hen,
It's plenty beets the luver's fire.
III.
For Johnie o' the Buskie-glen,
I dinna care a single flie;
He lo'es sae weel his craps and kye,
He has nae luve to spare for me:
But blithe's the blink o' Robie's e'e,
And weel I wat he lo'es me dear:
Ae blink o' him I wad nae gie
For Buskie-glen and a' his gear.
IV.
O thoughtless lassie, life's a faught;
The canniest gate, the strife is sair;
But ay fu' han't is fechtin best,
An hungry care's an unco care:
But some will spend, and some will spare,
An' wilfu' folk maun hae their will;
Syne as ye brew, my maiden fair,
Keep mind that ye maun drink the yill.
V.
O, gear will buy me rigs o' land,
And gear will buy me sheep and kye;
But the tender heart o' leesome luve,
The gowd and siller canna buy;
We may be poor--Robie and I,
Light is the burden luve lays on;
Content and luve brings peace and joy--
What mair hae queens upon a throne?
* * * * *
CXXIX.
FAIR ELIZA.
_A Gaelic Air. _
[The name of the heroine of this song was at first Rabina: but
Johnson, the publisher, alarmed at admitting something new into verse,
caused Eliza to be substituted; which was a positive fraud; for Rabina
was a real lady, and a lovely one, and Eliza one of air. ]
I.
Turn again, thou fair Eliza,
Ae kind blink before we part,
Rue on thy despairing lover!
Canst thou break his faithfu' heart?
Turn again, thou fair Eliza;
If to love thy heart denies,
For pity hide the cruel sentence
Under friendship's kind disguise!
II.
Thee, dear maid, hae I offended?
The offence is loving thee:
Canst thou wreck his peace for ever,
Wha for time wad gladly die?
While the life beats in my bosom,
Thou shalt mix in ilka throe;
Turn again, thou lovely maiden.
Ae sweet smile on me bestow.
III.
Not the bee upon the blossom,
In the pride o' sunny noon;
Not the little sporting fairy,
All beneath the simmer moon;
Not the poet, in the moment
Fancy lightens in his e'e,
Kens the pleasure, feels the rapture,
That thy presence gies to me.
* * * * *
CXXX.
YE JACOBITES BY NAME.
Tune--"_Ye Jacobites by name. _"
["Ye Jacobites by name," appeared for the first time in the Museum: it
was sent in the handwriting of Burns. ]
I.
Ye Jacobites by name, give and ear, give an ear;
Ye Jacobites by name, give an ear;
Ye Jacobites by name,
Your fautes I will proclaim,
Your doctrines I maun blame--
You shall hear.
II.
What is right, and what is wrang, by the law, by the law?
What is right and what is wrang, by the law?
What is right and what is wrang?
A short sword, and a lang,
A weak arm, and a strang
For to draw.
III.
What makes heroic strife, fam'd afar, fam'd afar?
What makes heroic strife, fam'd afar?
What makes heroic strife?
To whet th' assassin's knife,
Or hunt a parent's life
Wi' bluidie war.
IV.
Then let your schemes alone, in the state, in the state;
Then let your schemes alone in the state;
Then let your schemes alone,
Adore the rising sun,
And leave a man undone
To his fate.
* * * * *
CXXXI.
THE BANKS OF DOON.
[FIRST VERSION. ]
[An Ayrshire legend says the heroine of this affecting song was Miss
Kennedy, of Dalgarrock, a young creature, beautiful and accomplished,
who fell a victim to her love for her kinsman, McDoual, of Logan. ]
I.
Ye flowery banks o' bonnie Doon,
How can ye bloom sae fair;
How can ye chant, ye little birds,
And I sae fu' o' care!
II.
Thou'll break my heart, thou bonnie bird,
That sings upon the bough;
Thou minds me o' the happy days
When my fause love was true.
III.
Thou'll break my heart, thou bonnie bird,
That sings beside thy mate;
For sae I sat, and sae I sang,
And wist na o' my fate.
IV.
Aft hae I rov'd by bonnie Doon,
To see the woodbine twine,
And ilka bird sang o' its love;
And sae did I o' mine.
V.
Wi' lightsome heart I pu'd a rose,
Frae aff its thorny tree:
And my fause luver staw the rose,
But left the thorn wi' me.
* * * * *
CXXXII.
THE BANKS O' DOON.
[SECOND VERSION. ]
Tune--"_Caledonian Hunt's Delight. _"
[Burns injured somewhat the simplicity of the song by adapting it to a
new air, accidentally composed by an amateur who was directed, if he
desired to create a Scottish air, to keep his fingers to the black
keys of the harpsichord and preserve rhythm. ]
I.
Ye banks and braes o' bonnie Doon,
How can ye bloom sae fresh and fair;
How can ye chant, ye little birds,
And I sae weary, fu' o' care!
Thou'lt break my heart, thou warbling bird,
That wantons thro' the flowering thorn:
Thou minds me o' departed joys,
Departed--never to return!
II.
Aft hae I rov'd by bonnie Doon,
To see the rose and woodbine twine;
And ilka bird sang o' its luve,
And fondly sae did I o' mine.
Wi' lightsome heart I pu'd a rose,
Fu' sweet upon its thorny tree;
And my fause luver stole my rose,
But, ah! he left the thorn wi' me.
* * * * *
CXXXIII.
WILLIE WASTLE.
Tune--"_The eight men of Moidart. _"
[The person who is raised to the disagreeable elevation of heroine of
this song, was, it is said, a farmer's wife of the old school of
domestic care and uncleanness, who lived nigh the poet, at Ellisland. ]
I.
Willie Wastle dwalt on Tweed,
The spot they call'd it Linkum-doddie.
Willie was a wabster guid,
Cou'd stown a clue wi' onie bodie;
He had a wife was dour and din,
O Tinkler Madgie was her mither;
Sic a wife as Willie had,
I wad nae gie a button for her.
II.
She has an e'e--she has but ane,
The cat has twa the very colour;
Five rusty teeth, forbye a stump,
A clapper-tongue wad deave a miller:
A whiskin' beard about her mou',
Her nose and chin they threaten ither--
Sic a wife as Willie had,
I wad nae gie a button for her.
III.
She's bow hough'd, she's hem shinn'd,
A limpin' leg, a hand-breed shorter;
She's twisted right, she's twisted left,
To balance fair in ilka quarter:
She has a hump upon her breast,
The twin o' that upon her shouther--
Sic a wife as Willie had,
I wad nae gie a button for her.
IV.
Auld baudrans by the ingle sits,
An' wi' her loof her face a-washin';
But Willie's wife is nae sae trig,
She dights her grunzie wi' a hushion.
Her walie nieves like midden-creels,
Her face wad fyle the Logan-Water--
Sic a wife as Willie had,
I wad nae gie a button for her.
* * * * *
CXXXIV.
LADY MARY ANN.
Tune--"_Craigtown's growing. _"
[The poet sent this song to the Museum, in his own handwriting: yet
part of it is believed to be old; how much cannot be well known, with
such skill has he made his interpolations and changes. ]
I.
O, Lady Mary Ann
Looks o'er the castle wa',
She saw three bonnie boys
Playing at the ba';
The youngest he was
The flower amang them a'--
My bonnie laddie's young,
But he's growin' yet.
II.
O father! O father!
An' ye think it fit,
We'll send him a year
To the college yet:
We'll sew a green ribbon
Round about his hat,
And that will let them ken
He's to marry yet.
III.
Lady Mary Ann
Was a flower i' the dew,
Sweet was its smell,
And bonnie was its hue;
And the langer it blossom'd
The sweeter it grew;
For the lily in the bud
Will be bonnier yet.
IV.
Young Charlie Cochran
Was the sprout of an aik;
Bonnie and bloomin'
And straught was its make:
The sun took delight
To shine for its sake,
And it will be the brag
O' the forest yet.
V.
The simmer is gane,
When the leaves they were green,
And the days are awa,
That we hae seen;
But far better days
I trust will come again,
For my bonnie laddie's young,
But he's growin' yet.
* * * * *
CXXXV.
SUCH A PARCEL OF ROGUES IN A NATION.
Tune. --"_A parcel of rogues in a nation. _"
[This song was written by Burns in a moment of honest indignation at
the northern scoundrels who sold to those of the south the
independence of Scotland, at the time of the Union. ]
I.
Fareweel to a' our Scottish fame,
Fareweel our ancient glory,
Fareweel even to the Scottish name,
Sae fam'd in martial story.
Now Sark rins o'er the Solway sands,
And Tweed rins to the ocean,
To mark where England's province stands--
Such a parcel of rogues in a nation.
II.
What force or guile could not subdue,
Thro' many warlike ages,
Is wrought now by a coward few
For hireling traitor's wages.
The English steel we could disdain;
Secure in valour's station;
But English gold has been our bane--
Such a parcel of rogues in a nation.
III.
O would, or I had seen the day
That treason thus could sell us,
My auld gray head had lien in clay,
Wi' Bruce and loyal Wallace!
But pith and power, till my last hour,
I'll mak' this declaration;
We've bought and sold for English gold--
Such a parcel of rogues in a nation.
* * * * *
CXXXVI.
THE CARLE OF KELLYBURN BRAES.
Tune--"_Kellyburn Braes. _"
[Of this song Mrs. Burns said to Cromek, when running her finger over
the long list of lyrics which her husband had written or amended for
the Museum, "Robert gae this one a terrible brushing. " A considerable
portion of the old still remains. ]
I.
There lived a carle on Kellyburn braes,
(Hey, and the rue grows bonnie wi' thyme),
And he had a wife was the plague o' his days;
And the thyme it is wither'd, and rue is in prime.
II.
Ae day as the carle gaed up the lang glen,
(Hey, and the rue grows bonnie wi' thyme),
He met wi' the devil; says, "How do yow fen? "
And the thyme it is wither'd, and rue is in prime.
III.
"I've got a bad wife, sir; that's a' my complaint;
(Hey, and the rue grows bonnie wi' thyme),
For, saving your presence, to her ye're a saint;
And the thyme it is wither'd, and rue is in prime. "
IV.
"It's neither your stot nor your staig I shall crave,
(Hey, and the rue grows bonnie wi' thyme),
But gie me your wife, man, for her I must have,
And the thyme it is wither'd, and rue is in prime. "
V.
"O welcome, most kindly," the blythe carle said,
(Hey, and the rue grows bonnie wi' thyme),
"But if ye can match her, ye're waur nor ye're ca'd,
And the thyme it is wither'd, and rue is in prime. "
VI.
The devil has got the auld wife on his back;
(Hey, and the rue grows bonnie wi' thyme),
And, like a poor pedlar, he's carried his pack;
And the thyme it is wither'd, and rue is in prime.
VII.
He's carried her hame to his ain hallan-door;
(Hey, and the rue grows bonnie wi' thyme).
Syne bade her gae in, for a b--h and a w--e,
And the thyme it is wither'd, and rue is in prime.
VIII.
Then straight he makes fifty, the pick o' his band,
(Hey, and the rue grows bonnie wi' thyme),
Turn out on her guard in the clap of a hand;
And the thyme it is wither'd, and rue is in prime.
IX.
The carlin gaed thro' them like ony wud bear,
(Hey, and the rue grows bonnie wi' thyme),
Whate'er she gat hands on cam near her nae mair;
And the thyme it is wither'd, and rue is in prime.
X.
A reekit wee devil looks over the wa';
(Hey, and the rue grows bonnie wi' thyme),
"O, help, master, help, or she'll ruin us a',
And the thyme it is wither'd, and rue is in prime. "
XI.
The devil he swore by the edge o' his knife,
(Hey, and the rue grows bonnie wi' thyme),
He pitied the man that was tied to a wife;
And the thyme it is wither'd, and rue is in prime.
XII.
The devil he swore by the kirk and the bell,
(Hey, and the rue grows bonnie wi' thyme),
He was not in wedlock, thank heav'n, but in hell;
And the thyme it is wither'd, and rue is in prime.
XIII.
Then Satan has travelled again wi' his pack;
(Hey, and the rue grows bonnie wi' thyme),
And to her auld husband he's carried her back:
And the thyme it is wither'd, and rue is in prime.
XIV.
"I hae been a devil the feck o' my life;
(Hey, and the rue grows bonnie wi' thyme),
But ne'er was in hell, till I met wi' a wife;
And the thyme it is wither'd, and rue is in prime. "
* * * * *
CXXXVII.
JOCKEY'S TA'EN THE PARTING KISS.
Tune--"_Jockey's ta'en the parting kiss. _"
[Burns, when he sent this song to the Museum, said nothing of its
origin: and he is silent about it in his memoranda. ]
I.
Jockey's ta'en the parting kiss,
O'er the mountains he is gane;
And with him is a' my bliss,
Nought but griefs with me remain.
Spare my luve, ye winds that blaw,
Plashy sleets and beating rain!
Spare my luve, thou feathery snaw,
Drifting o'er the frozen plain.
II.
When the shades of evening creep
O'er the day's fair, gladsome e'e,
Sound and safely may he sleep,
Sweetly blithe his waukening be!
He will think on her he loves,
Fondly he'll repeat her name;
For where'er he distant roves,
Jockey's heart is still at hame.
* * * * *
CXXXVIII.
LADY ONLIE.
Tune--"_The Ruffian's Rant. _"
[Communicated to the Museum in the handwriting of Burns: part, but not
much, is believed to be old. ]
I.
A' the lads o' Thornie-bank,
When they gae to the shore o' Bucky,
They'll step in an' tak' a pint
Wi' Lady Onlie, honest Lucky!
Lady Onlie, honest Lucky!
Brews good ale at shore o' Bucky;
I wish her sale for her gude ale,
The best on a' the shore o' Bucky.
II.
Her house sae bien, her curch sae clean,
I wat she is a dainty chucky;
And cheerlie blinks the ingle-gleed
Of Lady Onlie, honest Lucky!
Lady Onlie, honest Lucky,
Brews good ale at shore o' Bucky
I wish her sale for her gude ale,
The best on a' the shore o' Bucky.
* * * * *
CXXXIX.
THE CHEVALIER'S LAMENT.
Tune--"_Captain O'Kean. _"
["Composed," says Burns to M'Murdo, "at the desire of a friend who had
an equal enthusiasm for the air and subject. " The friend alluded to is
supposed to be Robert Cleghorn: he loved the air much, and he was much
of a Jacobite. ]
I.
The small birds rejoice in the green leaves returning,
The murmuring streamlet winds clear thro' the vale;
The hawthorn trees blow in the dew of the morning,
And wild scatter'd cowslips bedeck the green dale:
But what can give pleasure, or what can seem fair,
While the lingering moments are number'd by care?
No flow'rs gaily springing, nor birds sweetly singing,
Can soothe the sad bosom of joyless despair.
II.
The deed that I dared, could it merit their malice,
A king and a father to place on his throne?
His right are these hills, and his right are these valleys,
Where the wild beasts find shelter, but I can find none;
But 'tis not my sufferings thus wretched, forlorn:
My brave gallant friends! 'tis your ruin I mourn;
Your deeds proved so loyal in hot-bloody trial--
Alas! I can make you no sweeter return!
* * * * *
CXL.
SONG OF DEATH.
Air--"_Oran an Aoig. _"
["I have just finished the following song," says Burns to Mrs. Dunlop,
"which to a lady, the descendant of Wallace, and herself the mother of
several soldiers, needs neither preface nor apology. "]
_Scene_--A field of battle. Time of the day, evening. The wounded and
dying of the victorious army are supposed to join in the following
song:
I.
Farewell, thou fair day, thou green earth, and ye skies,
Now gay with the bright setting sun;
Farewell loves and friendships, ye dear tender ties--
Our race of existence is run!
II.
Thou grim king of terrors, thou life's gloomy foe!
Go frighten the coward and slave;
Go, teach them to tremble, fell tyrant! but know,
No terrors hast thou to the brave!
III.
Thou strik'st the dull peasant--he sinks in the dark,
Nor saves e'en the wreck of a name;
Thou strik'st the young hero--a glorious mark!
He falls in the blaze of his fame!
IV.
In the field of proud honour--our swords in our hands,
Our king and our country to save--
While victory shines on life's last ebbing sands,
Oh! who would not die with the brave!
* * * * *
CXLI.
FLOW GENTLY, SWEET AFTON.
Tune--"_Afton Water. _"
[The scenes on Afton Water are beautiful, and the poet felt them, as
well as the generous kindness of his earliest patroness, Mrs. General
Stewart, of Afton-lodge, when he wrote this sweet pastoral. ]
I.
Flow gently, sweet Afton! among thy green braes,
Flow gently, I'll sing thee a song in thy praise;
My Mary's asleep by thy murmuring stream--
Flow gently, sweet Afton, disturb not her dream.
II.
Thou stock-dove, whose echo resounds thro' the glen;
Ye wild whistling blackbirds in yon thorny den;
Thou green-crested lapwing, thy screaming forbear--
I charge you disturb not my slumbering fair.
III.
How lofty, sweet Afton! thy neighbouring hills,
Far mark'd with the courses of clear, winding rills;
There daily I wander as noon rises high,
My flocks and my Mary's sweet cot in my eye.
IV.
How pleasant thy banks and green valleys below,
Where wild in the woodlands the primroses blow!
There, oft as mild evening weeps over the lea,
The sweet-scented birk shades my Mary and me.
V.
Thy crystal stream, Afton, how lovely it glides,
And winds by the cot where my Mary resides;
How wanton thy waters her snowy feet lave,
As gathering sweet flow'rets she stems thy clear wave.
VI.
Flow gently, sweet Afton! among thy green braes,
Flow gently, sweet river, the theme of my lays!
My Mary's asleep by thy murmuring stream--
Flow gently, sweet Afton! disturb not her dream.
* * * * *
CXLII.
THE SMILING SPRING.
Tune--"_The Bonnie Bell. _"
["Bonnie Bell," was first printed in the Museum: who the heroine was
the poet has neglected to tell us, and it is a pity. ]
I.
The smiling Spring comes in rejoicing,
And surly Winter grimly flies;
Now crystal clear are the falling waters,
And bonnie blue are the sunny skies;
Fresh o'er the mountains breaks forth the morning,
The ev'ning gilds the ocean's swell;
All creatures joy in the sun's returning,
And I rejoice in my bonnie Bell.
II.
The flowery Spring leads sunny Summer,
And yellow Autumn presses near,
Then in his turn comes gloomy Winter,
Till smiling Spring again appear.
Thus Seasons dancing, life advancing,
Old Time and Nature their changes tell,
But never ranging, still unchanging,
I adore my bonnie Bell.
* * * * *
CXLIII.
THE CARLES OF DYSART.
Tune--"_Hey ca' thro'. _"
[Communicated to the Museum by Burns in his own handwriting: part of
it is his composition, and some believe the whole. ]
I.
Up wi' the carles o' Dysart,
And the lads o' Buckhaven,
And the kimmers o' Largo,
And the lasses o' Leven.
Hey, ca' thro', ca' thro',
For we hae mickle ado;
Hey, ca' thro', ca' thro',
For we hae mickle ado.
II.
We hae tales to tell,
And we hae sangs to sing;
We hae pennies to spend,
And we hae pints to bring.
III.
We'll live a' our days,
And them that come behin',
Let them do the like,
And spend the gear they win.
Hey, ca' thro', ca' thro',
For we hae mickle ado,
Hey, ca' thro', ca' thro',
For we hae mickle ado.
* * * * *
CXLIV.
THE GALLANT WEAVER.
Tune--"_The Weavers' March. _"
[Sent by the poet to the Museum. Neither tradition nor criticism has
noticed it, but the song is popular among the looms, in the west of
Scotland. ]
I.
Where Cart rins rowin to the sea,
By mony a flow'r and spreading tree,
There lives a lad, the lad for me,
He is a gallant weaver.
Oh, I had wooers aught or nine,
They gied me rings and ribbons fine;
And I was fear'd my heart would tine,
And I gied it to the weaver.
II.
My daddie sign'd my tocher-band,
To gie the lad that has the land;
But to my heart I'll add my hand,
And gie it to the weaver.
While birds rejoice in leafy bowers;
While bees delight in op'ning flowers;
While corn grows green in simmer showers,
I'll love my gallant weaver.
* * * * *
CXLV.
THE BAIRNS GAT OUT.
Tune--"_The deuks dang o'er my daddie. _"
[Burns found some of the sentiments and a few of the words of this
song in a strain, rather rough and home-spun, of Scotland's elder day.
He communicated it to the Museum. ]
I.
The bairns gat out wi' an unco shout,
The deuks dang o'er my daddie, O!
The fien'-ma-care, quo' the feirrie auld wife,
He was but a paidlin body, O!
He paidles out, an' he paidles in,
An' he paidles late an' early, O!
This seven lang years I hae lien by his side,
An' he is but a fusionless carlie, O!
II.
O, hand your tongue, my feirrie auld wife,
O, haud your tongue, now Nansie, O!
I've seen the day, and sae hae ye,
Ye wadna been sae donsie, O!
I've seen the day ye butter'd my brose,
And cuddled me late and early, O!
But downa do's come o'er me now,
And, oh! I feel it sairly, O!
* * * * *
CXLVI.
SHE'S FAIR AND FAUSE.
Tune--"_She's fair and fause. _"
[One of the happiest as well as the most sarcastic of the songs of the
North: the air is almost as happy as the words. ]
I.
She's fair and fause that causes my smart,
I lo'ed her meikle and lang;
She's broken her vow, she's broken my heart,
And I may e'en gae hang.
A coof cam in wi' routh o' gear,
And I hae tint my dearest dear;
But woman is but warld's gear,
Sae let the bonnie lass gang.
II.
Whae'er ye be that woman love,
To this be never blind,
Nae ferlie 'tis tho' fickle she prove,
A woman has't by kind.
O woman, lovely woman fair!
An angel form's fa'n to thy share,
'Twad been o'er meikle to gien thee mair--
I mean an angel mind.
* * * * *
CXLVII.
THE EXCISEMAN.
Tune--"_The Deil cam' fiddling through the town. _"
[Composed and sung by the poet at a festive meeting of the excisemen
of the Dumfries district. ]
I.
The deil cam' fiddling through the town,
And danced awa wi' the Exciseman,
And ilka wife cries--"Auld Mahoun,
I wish you luck o' the prize, man! "
The deil's awa, the deil's awa,
The deil's awa wi' the Exciseman;
He's danc'd awa, he's danc'd awa,
He's danc'd awa wi' the Exciseman!
II.
We'll mak our maut, we'll brew our drink,
We'll dance, and sing, and rejoice, man;
And mony braw thanks to the meikle black deil
That danc'd awa wi' the Exciseman.
III.
There's threesome reels, there's foursome reels,
There's hornpipes and strathspeys, man;
But the ae best dance e'er cam to the land
Was--the deil's awa wi' the Exciseman.
The deil's awa, the deil's awa,
The deil's awa wi' the Exciseman:
He's danc'd awa, he's danc'd awa,
He's danc'd awa wi' the Exciseman.
* * * * *
CXLVIII.
THE LOVELY LASS OF INVERNESS.
Tune--"_Lass of Inverness. _"
[As Burns passed slowly over the moor of Culloden, in one of his
Highland tours, the lament of the Lass of Inverness, it is said, rose
on his fancy: the first four lines are partly old. ]
I.
The lovely lass o' Inverness,
Nae joy nor pleasure can she see;
For e'en and morn, she cries, alas!
And ay the saut tear blin's her e'e:
Drumossie moor--Drumossie day--
A waefu' day it was to me!
For there I lost my father dear,
My father dear, and brethren three.
II.
Their winding sheet the bluidy clay,
Their graves are growing green to see:
And by them lies the dearest lad
That ever blest a woman's e'e!
Now wae to thee, thou cruel lord,
A bluidy man I trow thou be;
For mony a heart thou host made sair,
That ne'er did wrong to thine or thee.
* * * * *
CXLIX.
A RED, RED ROSE.
Tune--"_Graham's Strathspey. _"
[Some editors have pleased themselves with tracing the sentiments of
this song in certain street ballads: it resembles them as much as a
sour sloe resembles a drop-ripe damson. ]
I.
O, my luve's like a red, red rose,
That's newly sprung in June:
O, my luve's like the melodie,
That's sweetly play'd in tune.
II.
