No More Learning

If it be wikke, a wonder thinketh me,
Whenne every torment and adversitee
That cometh of him, may to me savory thinke; 405
For ay thurst I, the more that I it drinke.

`And if that at myn owene lust I brenne,
Fro whennes cometh my wailing and my pleynte?
If harme agree me, wher-to pleyne I thenne?
I noot, ne why unwery that I feynte. 410
O quike deeth, O swete harm so queynte,
How may of thee in me swich quantitee,
But-if that I consente that it be?

`And if that I consente, I wrongfully
Compleyne, y-wis; thus possed to and fro, 415
Al sterelees with inne a boot am I
A-mid the see, by-twixen windes two,
That in contrarie stonden ever-mo.
Allas! what is this wonder maladye?
For hete of cold, for cold of hete, I deye. ' 420

And to the god of love thus seyde he
With pitous voys, `O lord, now youres is
My spirit, which that oughte youres be.
Yow thanke I, lord, that han me brought to this;
But whether goddesse or womman, y-wis, 425
She be, I noot, which that ye do me serve;
But as hir man I wole ay live and sterve.

`Ye stonden in hire eyen mightily,
As in a place un-to youre vertu digne;
Wherfore, lord, if my servyse or I 430
May lyke yow, so beth to me benigne;
For myn estat royal here I resigne
In-to hir hond, and with ful humble chere
Bicome hir man, as to my lady dere. '

In him ne deyned sparen blood royal 435
The fyr of love, wher-fro god me blesse,
Ne him forbar in no degree, for al
His vertu or his excellent prowesse;
But held him as his thral lowe in distresse,
And brende him so in sondry wyse ay newe, 440
That sixty tyme a day he loste his hewe.

So muche, day by day, his owene thought,
For lust to hir, gan quiken and encrese,
That every other charge he sette at nought;
For-thy ful ofte, his hote fyr to cese, 445
To seen hir goodly look he gan to prese;
For ther-by to ben esed wel he wende,
And ay the ner he was, the more he brende.

For ay the ner the fyr, the hotter is,
This, trowe I, knoweth al this companye. 450
But were he fer or neer, I dar seye this,
By night or day, for wisdom or folye,
His herte, which that is his brestes ye,
Was ay on hir, that fairer was to sene
Than ever were Eleyne or Polixene. 455

Eek of the day ther passed nought an houre
That to him-self a thousand tyme he seyde,
`Good goodly, to whom serve I and laboure,
As I best can, now wolde god, Criseyde,
Ye wolden on me rewe er that I deyde! 460
My dere herte, allas! myn hele and hewe
And lyf is lost, but ye wole on me rewe. '

Alle othere dredes weren from him fledde,
Both of the assege and his savacioun;
Ne in him desyr noon othere fownes bredde 465
But argumentes to his conclusioun,
That she on him wolde han compassioun,
And he to be hir man, whyl he may dure;
Lo, here his lyf, and from the deeth his cure!

The sharpe shoures felle of armes preve, 470
That Ector or his othere bretheren diden,
Ne made him only ther-fore ones meve;
And yet was he, wher-so men wente or riden,
Founde oon the beste, and lengest tyme abiden
Ther peril was, and dide eek such travayle 475
In armes, that to thenke it was mervayle.

But for non hate he to the Grekes hadde,
Ne also for the rescous of the toun,
Ne made him thus in armes for to madde,
But only, lo, for this conclusioun, 480
To lyken hir the bet for his renoun;
Fro day to day in armes so he spedde,
That alle the Grekes as the deeth him dredde.

And fro this forth tho refte him love his sleep,
And made his mete his foo; and eek his sorwe 485
Gan multiplye, that, who-so toke keep,
It shewed in his hewe, bothe eve and morwe;
Therfor a title he gan him for to borwe
Of other syknesse, lest of him men wende
That the hote fyr of love him brende, 490

And seyde, he hadde a fever and ferde amis;
But how it was, certayn, can I not seye,
If that his lady understood not this,
Or feyned hir she niste, oon of the tweye;
But wel I rede that, by no maner weye, 495
Ne semed it as that she of him roughte,
Nor of his peyne, or what-so-ever he thoughte.

But than fel to this Troylus such wo,
That he was wel neigh wood; for ay his drede
Was this, that she som wight had loved so, 500
That never of him she wolde have taken hede;
For whiche him thoughte he felte his herte blede.
Ne of his wo ne dorste he not biginne
To tellen it, for al this world to winne.

But whanne he hadde a space fro his care, 505
Thus to him-self ful ofte he gan to pleyne;
He sayde, `O fool, now art thou in the snare,
That whilom Iapedest at loves peyne;
Now artow hent, now gnaw thyn owene cheyne;
Thou were ay wont eche lovere reprehende 510
Of thing fro which thou canst thee nat defende.

`What wol now every lover seyn of thee,
If this be wist, but ever in thyn absence
Laughen in scorn, and seyn, `Lo, ther gooth he,
That is the man of so gret sapience, 515
That held us lovers leest in reverence!
Now, thonked be god, he may goon in the daunce
Of hem that Love list febly for to avaunce! '

`But, O thou woful Troilus, god wolde,
Sin thou most loven thurgh thi destinee, 520
That thow beset were on swich oon that sholde
Knowe al thy wo, al lakkede hir pitee:
But al so cold in love, towardes thee,
Thy lady is, as frost in winter mone,
And thou fordoon, as snow in fyr is sone. ' 525

`God wolde I were aryved in the port
Of deth, to which my sorwe wil me lede!
A, lord, to me it were a gret comfort;
Than were I quit of languisshing in drede.
For by myn hidde sorwe y-blowe on brede 530
I shal bi-Iaped been a thousand tyme
More than that fool of whos folye men ryme.

`But now help god, and ye, swete, for whom
I pleyne, y-caught, ye, never wight so faste!
O mercy, dere herte, and help me from 535
The deeth, for I, whyl that my lyf may laste,
More than my-self wol love yow to my laste.
And with som freendly look gladeth me, swete,
Though never more thing ye me bi-hete! '

This wordes and ful manye an-other to 540
He spak, and called ever in his compleynte
Hir name, for to tellen hir his wo,
Til neigh that he in salte teres dreynte.
Al was for nought, she herde nought his pleynte;
And whan that he bithoughte on that folye, 545
A thousand fold his wo gan multiplye.

Bi-wayling in his chambre thus allone,
A freend of his, that called was Pandare,
Com ones in unwar, and herde him grone,
And say his freend in swich distresse and care:
`Allas! ' quod he, `who causeth al this fare? 551
O mercy, god! What unhap may this mene?
Han now thus sone Grekes maad yow lene?

`Or hastow som remors of conscience,
And art now falle in som devocioun, 555
And waylest for thy sinne and thyn offence,
And hast for ferde caught attricioun?
God save hem that bi-seged han our toun,
And so can leye our Iolyte on presse,
And bring our lusty folk to holinesse! ' 560

These wordes seyde he for the nones alle,
That with swich thing he mighte him angry maken,
And with an angre don his sorwe falle,
As for the tyme, and his corage awaken;
But wel he wist, as fer as tonges spaken, 565
Ther nas a man of gretter hardinesse
Than he, ne more desired worthinesse.

`What cas,' quod Troilus, `or what aventure
Hath gyded thee to see my languisshinge,
That am refus of euery creature? 570
But for the love of god, at my preyinge,
Go henne a-way, for certes, my deyinge
Wol thee disese, and I mot nedes deye;
Ther-for go wey, ther is no more to seye.

`But if thou wene I be thus sik for drede, 575
It is not so, and ther-for scorne nought;
Ther is a-nother thing I take of hede
Wel more than ought the Grekes han y-wrought,
Which cause is of my deeth, for sorwe and thought.
But though that I now telle thee it ne leste, 580
Be thou nought wrooth; I hyde it for the beste. '

This Pandare, that neigh malt for wo and routhe,
Ful often seyde, `Allas! what may this be?
Now freend,' quod he, `if ever love or trouthe
Hath been, or is, bi-twixen thee and me, 585
Ne do thou never swiche a crueltee
To hyde fro thy freend so greet a care;
Wostow nought wel that it am I, Pandare?

`I wole parten with thee al thy peyne,
If it be so I do thee no comfort, 590
As it is freendes right, sooth for to seyne,
To entreparten wo, as glad desport.
I have, and shal, for trewe or fals report,
In wrong and right y-loved thee al my lyve;
Hyd not thy wo fro me, but telle it blyve. ' 595

Than gan this sorwful Troilus to syke,
And seyde him thus, "God leve it be my beste
To telle it thee; for sith it may thee lyke,
Yet wole I telle it, though myn herte breste;
And wel wot I thou mayst do me no reste. 600
But lest thow deme I truste not to thee,
Now herkne, freend, for thus it stant with me.

`Love, a-yeins the which who-so defendeth
Him-selven most, him alder-lest avayleth,
With disespeir so sorwfully me offendeth, 605
That streyght un-to the deeth myn herte sayleth.
Ther-to desyr so brenningly me assaylleth,
That to ben slayn it were a gretter Ioye
To me than king of Grece been and Troye!

`Suffiseth this, my fulle freend Pandare, 610
That I have seyd, for now wostow my wo;
And for the love of god, my colde care
So hyd it wel, I telle it never to mo;
For harmes mighte folwen, mo than two,
If it were wist; but be thou in gladnesse, 615
And lat me sterve, unknowe, of my distresse. '

`How hastow thus unkindely and longe
Hid this fro me, thou fool? ' quod Pandarus;
`Paraunter thou might after swich oon longe,
That myn avys anoon may helpen us. ' 620
`This were a wonder thing,' quod Troylus,
`Thou coudest never in love thy-selven wisse;
How devel maystow bringen me to blisse? '

`Ye, Troilus, now herke,' quod Pandare,
`Though I be nyce; it happeth ofte so, 625
That oon that exces doth ful yvele fare,
By good counseyl can kepe his freend ther-fro.
I have my-self eek seyn a blind man go
Ther-as he fel that coude loke wyde;
A fool may eek a wys man ofte gyde. 630

`A whetston is no kerving instrument,
And yet it maketh sharpe kerving-tolis.
And ther thou woost that I have ought miswent,
Eschewe thou that, for swich thing to thee scole is;
Thus ofte wyse men ben war by folis. 635
If thou do so, thy wit is wel biwared;
By his contrarie is every thing declared.

`For how might ever sweetnesse have be knowe
To him that never tasted bitternesse?
Ne no man may be inly glad, I trowe, 640
That never was in sorwe or som distresse;
Eek whyt by blak, by shame eek worthinesse,
Ech set by other, more for other semeth;
As men may see; and so the wyse it demeth.

`Sith thus of two contraries is a lore, 645
I, that have in love so ofte assayed
Grevaunces, oughte conne, and wel the more
Counsayllen thee of that thou art amayed.
Eek thee ne oughte nat ben yvel apayed,
Though I desyre with thee for to bere 650
Thyn hevy charge; it shal the lasse dere.

`I woot wel that it fareth thus by me
As to thy brother Parys an herdesse,
Which that y-cleped was Oenone,
Wrot in a compleynte of hir hevinesse: 655
Ye say the lettre that she wroot, y gesse? '
`Nay, never yet, y-wis,' quod Troilus.
`Now,' quod Pandare, `herkneth, it was thus. --

"Phebus, that first fond art of medicyne,'
Quod she, `and coude in every wightes care 660
Remede and reed, by herbes he knew fyne,
Yet to him-self his conning was ful bare;
For love hadde him so bounden in a snare,
Al for the doughter of the kinge Admete,
That al his craft ne coude his sorwe bete. " -- 665

`Right so fare I, unhappily for me;
I love oon best, and that me smerteth sore;
And yet, paraunter, can I rede thee,
And not my-self; repreve me no more.
I have no cause, I woot wel, for to sore 670
As doth an hauk that listeth for to pleye,
But to thyn help yet somwhat can I seye.

`And of o thing right siker maystow be,
That certayn, for to deyen in the peyne,
That I shal never-mo discoveren thee; 675
Ne, by my trouthe, I kepe nat restreyne
Thee fro thy love, thogh that it were Eleyne,
That is thy brotheres wif, if ich it wiste;
Be what she be, and love hir as thee liste.

`Therfore, as freend fullich in me assure, 680
And tel me plat what is thyn enchesoun,
And final cause of wo that ye endure;
For douteth no-thing, myn entencioun
Nis nought to yow of reprehencioun,
To speke as now, for no wight may bireve 685
A man to love, til that him list to leve.

`And witeth wel, that bothe two ben vyces,
Mistrusten alle, or elles alle leve;
But wel I woot, the mene of it no vyce is,
For to trusten sum wight is a preve 690
Of trouthe, and for-thy wolde I fayn remeve
Thy wrong conseyte, and do thee som wight triste,
Thy wo to telle; and tel me, if thee liste.

`The wyse seyth, "Wo him that is allone,
For, and he falle, he hath noon help to ryse;" 695
And sith thou hast a felawe, tel thy mone;
For this nis not, certeyn, the nexte wyse
To winnen love, as techen us the wyse,
To walwe and wepe as Niobe the quene,
Whos teres yet in marbel been y-sene. 700

`Lat be thy weping and thi drerinesse,
And lat us lissen wo with other speche;
So may thy woful tyme seme lesse.
Delyte not in wo thy wo to seche,
As doon thise foles that hir sorwes eche 705
With sorwe, whan they han misaventure,
And listen nought to seche hem other cure.

`Men seyn, "To wrecche is consolacioun
To have an-other felawe in his peyne;"
That oughte wel ben our opinioun, 710
For, bothe thou and I, of love we pleyne;
So ful of sorwe am I, soth for to seyne,
That certeynly no more harde grace
May sitte on me, for-why ther is no space.

`If god wole thou art not agast of me, 715
Lest I wolde of thy lady thee bigyle,
Thow wost thy-self whom that I love, pardee,
As I best can, gon sithen longe whyle.
And sith thou wost I do it for no wyle,
And sith I am he that thou tristest most, 720
Tel me sumwhat, sin al my wo thou wost. '

Yet Troilus, for al this, no word seyde,
But longe he ley as stille as he ded were;
And after this with sykinge he abreyde,
And to Pandarus voys he lente his ere, 725
And up his eyen caste he, that in fere
Was Pandarus, lest that in frenesye
He sholde falle, or elles sone dye;

And cryde `A-wake' ful wonderly and sharpe;
`What? Slombrestow as in a lytargye? 730
Or artow lyk an asse to the harpe,
That hereth soun, whan men the strenges plye,
But in his minde of that no melodye
May sinken, him to glade, for that he
So dul is of his bestialitee? ' 735

And with that, Pandare of his wordes stente;
And Troilus yet him no word answerde,
For-why to telle nas not his entente
To never no man, for whom that he so ferde.
For it is seyd, `Man maketh ofte a yerde 740
With which the maker is him-self y-beten
In sondry maner,' as thise wyse treten,

And namely, in his counseyl tellinge
That toucheth love that oughte be secree;
For of him-self it wolde y-nough out-springe, 745
But-if that it the bet governed be.
Eek som-tyme it is craft to seme flee
Fro thing which in effect men hunte faste;
Al this gan Troilus in his herte caste.

But nathelees, whan he had herd him crye 750
`Awake! ' he gan to syke wonder sore,
And seyde, `Freend, though that I stille lye,
I am not deef; now pees, and cry no more;
For I have herd thy wordes and thy lore;
But suffre me my mischef to biwayle, 755
For thy proverbes may me nought avayle.

`Nor other cure canstow noon for me.
Eek I nil not be cured, I wol deye;
What knowe I of the quene Niobe?
Lat be thyne olde ensaumples, I thee preye. ' 760
`No,' quod tho Pandarus, `therfore I seye,
Swich is delyt of foles to biwepe
Hir wo, but seken bote they ne kepe.

`Now knowe I that ther reson in the fayleth.
But tel me, if I wiste what she were 765
For whom that thee al this misaunter ayleth?
Dorstestow that I tolde hir in hir ere
Thy wo, sith thou darst not thy-self for fere,
And hir bisoughte on thee to han som routhe? '
`Why, nay,' quod he, `by god and by my trouthe! ' 770

`What, Not as bisily,' quod Pandarus,
`As though myn owene lyf lay on this nede? '
`No, certes, brother,' quod this Troilus,
`And why? ' -- `For that thou sholdest never spede. '
`Wostow that wel? ' -- `Ye, that is out of drede,' 775
Quod Troilus, `for al that ever ye conne,
She nil to noon swich wrecche as I be wonne. '

Quod Pandarus, `Allas! What may this be,
That thou dispeyred art thus causelees?
What? Liveth not thy lady? Benedicite! 780
How wostow so that thou art gracelees?
Swich yvel is nat alwey botelees.
Why, put not impossible thus thy cure,
Sin thing to come is ofte in aventure.

`I graunte wel that thou endurest wo 785
As sharp as doth he, Ticius, in helle,
Whos stomak foules tyren ever-mo
That highte volturis, as bokes telle.
But I may not endure that thou dwelle
In so unskilful an opinioun 790
That of thy wo is no curacioun.

`But ones niltow, for thy coward herte,
And for thyn ire and folish wilfulnesse,
For wantrust, tellen of thy sorwes smerte,
Ne to thyn owene help do bisinesse 795
As muche as speke a resoun more or lesse,
But lyest as he that list of no-thing recche.
What womman coude love swich a wrecche?

`What may she demen other of thy deeth,
If thou thus deye, and she not why it is, 800
But that for fere is yolden up thy breeth,
For Grekes han biseged us, y-wis?
Lord, which a thank than shaltow han of this!
Thus wol she seyn, and al the toun at ones,
"The wrecche is deed, the devel have his bones! " 805

`Thou mayst allone here wepe and crye and knele;
But, love a woman that she woot it nought,
And she wol quyte that thou shalt not fele;
Unknowe, unkist, and lost that is un-sought.
What! Many a man hath love ful dere y-bought 810
Twenty winter that his lady wiste,
That never yet his lady mouth he kiste.

`What? Shulde be therfor fallen in despeyr,
Or be recreaunt for his owene tene,
Or sleen him-self, al be his lady fayr? 815
Nay, nay, but ever in oon be fresh and grene
To serve and love his dere hertes quene,
And thenke it is a guerdoun hir to serve
A thousand-fold more than he can deserve. '

Of that word took hede Troilus, 820
And thoughte anoon what folye he was inne,
And how that sooth him seyde Pandarus,
That for to sleen him-self mighte he not winne,
But bothe doon unmanhod and a sinne,
And of his deeth his lady nought to wyte; 825
For of his wo, god woot, she knew ful lyte.

And with that thought he gan ful sore syke,
And seyde, `Allas! What is me best to do? '
To whom Pandare answered, `If thee lyke,
The best is that thou telle me thy wo; 830
And have my trouthe, but thou it finde so,
I be thy bote, or that it be ful longe,
To peces do me drawe, and sithen honge! '

`Ye, so thou seyst,' quod Troilus tho, `allas!
But, god wot, it is not the rather so; 835
Ful hard were it to helpen in this cas,
For wel finde I that Fortune is my fo,
Ne alle the men that ryden conne or go
May of hir cruel wheel the harm withstonde;
For, as hir list, she pleyeth with free and bonde. ' 840

Quod Pandarus, `Than blamestow Fortune
For thou art wrooth, ye, now at erst I see;
Wostow nat wel that Fortune is commune
To every maner wight in som degree?
And yet thou hast this comfort, lo, pardee! 845
That, as hir Ioyes moten over-goon,
So mote hir sorwes passen everichoon.

`For if hir wheel stinte any-thing to torne,
Than cessed she Fortune anoon to be:
Now, sith hir wheel by no wey may soiorne, 850
What wostow if hir mutabilitee
Right as thy-selven list, wol doon by thee,
Or that she be not fer fro thyn helpinge?
Paraunter, thou hast cause for to singe!

`And therfor wostow what I thee beseche? 855
Lat be thy wo and turning to the grounde;
For who-so list have helping of his leche,
To him bihoveth first unwrye his wounde.
To Cerberus in helle ay be I bounde,
Were it for my suster, al thy sorwe, 860
By my wil, she sholde al be thyn to-morwe.
`Loke up, I seye, and tel me what she is
Anoon, that I may goon aboute thy nede;
Knowe ich hir ought? For my love, tel me this;
Than wolde I hopen rather for to spede. ' 865
Tho gan the veyne of Troilus to blede,
For he was hit, and wex al reed for shame;
`A ha! ' quod Pandare, `Here biginneth game! '

And with that word he gan him for to shake,
And seyde, `Theef, thou shalt hir name telle. ' 870
But tho gan sely Troilus for to quake
As though men sholde han led him in-to helle,
And seyde, `Allas! Of al my wo the welle,
Than is my swete fo called Criseyde! '
And wel nigh with the word for fere he deyde. 875

And whan that Pandare herde hir name nevene,
Lord, he was glad, and seyde, `Freend so dere,
Now fare a-right, for Ioves name in hevene,
Love hath biset the wel, be of good chere;
For of good name and wysdom and manere 880
She hath y-nough, and eek of gentilesse;
If she be fayr, thou wost thy-self, I gesse,

`Ne I never saw a more bountevous
Of hir estat, ne a gladder, ne of speche
A freendlier, ne a more gracious 885
For to do wel, ne lasse hadde nede to seche
What for to doon; and al this bet to eche,
In honour, to as fer as she may strecche,
A kinges herte semeth by hirs a wrecche.

`And for-thy loke of good comfort thou be; 890
For certeinly, the firste poynt is this
Of noble corage and wel ordeyne,
A man to have pees with him-self, y-wis;
So oughtest thou, for nought but good it is
To loven wel, and in a worthy place; 895
Thee oghte not to clepe it hap, but grace.

`And also thenk, and ther-with glade thee,
That sith thy lady vertuous is al,
So folweth it that ther is som pitee
Amonges alle thise othere in general; 900
And for-thy see that thou, in special,
Requere nought that is ayein hir name;
For vertue streccheth not him-self to shame.

`But wel is me that ever that I was born,
That thou biset art in so good a place; 905
For by my trouthe, in love I dorste have sworn,
Thee sholde never han tid thus fayr a grace;
And wostow why? For thou were wont to chace
At Love in scorn, and for despyt him calle
"Seynt Idiot, lord of thise foles alle. " 910

`How often hastow maad thy nyce Iapes,
And seyd, that loves servants everichone
Of nycetee been verray goddes apes;
And some wolde monche hir mete alone,
Ligging a-bedde, and make hem for to grone; 915
And som, thou seydest, hadde a blaunche fevere,
And preydest god he sholde never kevere.

`And som of hem tok on hem, for the colde,
More than y-nough, so seydestow ful ofte;
And som han feyned ofte tyme, and tolde 920
How that they wake, whan they slepen softe;
And thus they wolde han brought hem-self a-lofte,
And nathelees were under at the laste;
Thus seydestow, and Iapedest ful faste.

`Yet seydestow, that, for the more part, 925
These loveres wolden speke in general,
And thoughten that it was a siker art,
For fayling, for to assayen over-al.
Now may I iape of thee, if that I shal!
But nathelees, though that I sholde deye, 930
That thou art noon of tho, that dorste I seye.

`Now beet thy brest, and sey to god of love,
"Thy grace, lord! For now I me repente
If I mis spak, for now my-self I love:"
Thus sey with al thyn herte in good entente. ' 935
Quod Troilus, `A! Lord! I me consente,
And prey to thee my Iapes thou foryive,
And I shal never-more whyl I live. '

`Thou seyst wel,' quod Pandare, `and now I hope
That thou the goddes wraththe hast al apesed; 940
And sithen thou hast wepen many a drope,
And seyd swich thing wher-with thy god is plesed,
Now wolde never god but thou were esed;
And think wel, she of whom rist al thy wo
Here-after may thy comfort been al-so. 945

`For thilke ground, that bereth the wedes wikke,
Bereth eek thise holsom herbes, as ful ofte
Next the foule netle, rough and thikke,
The rose waxeth swote and smothe and softe;
And next the valey is the hil a-lofte; 950
And next the derke night the glade morwe;
And also Ioye is next the fyn of sorwe.

`Now loke that atempre be thy brydel,
And, for the beste, ay suffre to the tyde,
Or elles al our labour is on ydel; 955
He hasteth wel that wysly can abyde;
Be diligent, and trewe, and ay wel hyde.
Be lusty, free, persevere in thy servyse,
And al is wel, if thou werke in this wyse.

`But he that parted is in every place 960
Is no-wher hool, as writen clerkes wyse;
What wonder is, though swich oon have no grace?
Eek wostow how it fareth of som servyse?
As plaunte a tre or herbe, in sondry wyse,
And on the morwe pulle it up as blyve, 965
No wonder is, though it may never thryve.

`And sith that god of love hath thee bistowed
In place digne un-to thy worthinesse,
Stond faste, for to good port hastow rowed;
And of thy-self, for any hevinesse, 970
Hope alwey wel; for, but-if drerinesse
Or over-haste our bothe labour shende,
I hope of this to maken a good ende.

`And wostow why I am the lasse a-fered
Of this matere with my nece trete? 975
For this have I herd seyd of wyse y-lered,
"Was never man ne woman yet bigete
That was unapt to suffren loves hete,
Celestial, or elles love of kinde;"
For-thy som grace I hope in hir to finde. 980

`And for to speke of hir in special,
Hir beautee to bithinken and hir youthe,
It sit hir nought to be celestial
As yet, though that hir liste bothe and couthe;
But trewely, it sete hir wel right nouthe 985
A worthy knight to loven and cheryce,
And but she do, I holde it for a vyce.

`Wherfore I am, and wol be, ay redy
To peyne me to do yow this servyse;
For bothe yow to plese thus hope I 990
Her-afterward; for ye beth bothe wyse,
And conne it counseyl kepe in swich a wyse
That no man shal the wyser of it be;
And so we may be gladed alle three.

`And, by my trouthe, I have right now of thee 995
A good conceyt in my wit, as I gesse,
And what it is, I wol now that thou see.
I thenke, sith that love, of his goodnesse,
Hath thee converted out of wikkednesse,
That thou shalt be the beste post, I leve, 1000
Of al his lay, and most his foos to-greve.

`Ensample why, see now these wyse clerkes,
That erren aldermost a-yein a lawe,
And ben converted from hir wikked werkes
Thorugh grace of god, that list hem to him drawe, 1005
Than arn they folk that han most god in awe,
And strengest-feythed been, I understonde,
And conne an errour alder-best withstonde. '

Whan Troilus had herd Pandare assented
To been his help in loving of Criseyde, 1010
Wex of his wo, as who seyth, untormented,
But hotter wex his love, and thus he seyde,
With sobre chere, al-though his herte pleyde,
`Now blisful Venus helpe, er that I sterve,
Of thee, Pandare, I may som thank deserve. 1015

`But, dere frend, how shal myn wo ben lesse
Til this be doon? And goode, eek tel me this,
How wiltow seyn of me and my destresse?
Lest she be wrooth, this drede I most, y-wys,
Or nil not here or trowen how it is. 1020
Al this drede I, and eek for the manere
Of thee, hir eem, she nil no swich thing here. '

Quod Pandarus, `Thou hast a ful gret care
Lest that the cherl may falle out of the mone!
Why, lord! I hate of the thy nyce fare! 1025
Why, entremete of that thou hast to done!
For goddes love, I bidde thee a bone,
So lat me alone, and it shal be thy beste. ' --
`Why, freend,' quod he, `now do right as the leste.

`But herke, Pandare, o word, for I nolde 1030
That thou in me wendest so greet folye,
That to my lady I desiren sholde
That toucheth harm or any vilenye;
For dredelees, me were lever dye
Than she of me ought elles understode 1035
But that, that mighte sounen in-to gode. '

Tho lough this Pandare, and anoon answerde,
`And I thy borw? Fy! No wight dooth but so;
I roughte nought though that she stode and herde
How that thou seyst; but fare-wel, I wol go. 1040
A-dieu! Be glad! God spede us bothe two!
Yif me this labour and this besinesse,
And of my speed be thyn al that swetnesse. '

Tho Troilus gan doun on knees to falle,
And Pandare in his armes hente faste, 1045
And seyde, `Now, fy on the Grekes alle!
Yet, pardee, god shal helpe us at the laste;
And dredelees, if that my lyf may laste,
And god to-forn, lo, som of hem shal smerte;
And yet me athinketh that this avaunt me asterte! 1050

`Now, Pandare, I can no more seye,
But thou wys, thou wost, thou mayst, thou art al!
My lyf, my deeth, hool in thyn bonde I leye;
Help now,' Quod he, `Yis, by my trouthe, I shal. '
`God yelde thee, freend, and this in special,' 1055
Quod Troilus, `that thou me recomaunde
To hir that to the deeth me may comaunde. '

This Pandarus tho, desirous to serve
His fulle freend, than seyde in this manere, 1059
`Far-wel, and thenk I wol thy thank deserve;
Have here my trouthe, and that thou shalt wel here. ' --
And wente his wey, thenking on this matere,
And how he best mighte hir beseche of grace,
And finde a tyme ther-to, and a place.

For every wight that hath an hous to founde 1065
Ne renneth nought the werk for to biginne
With rakel hond, but he wol byde a stounde,
And sende his hertes lyne out fro with-inne
Alderfirst his purpos for to winne.
Al this Pandare in his herte thoughte, 1070
And caste his werk ful wysly, or he wroughte.

But Troilus lay tho no lenger doun,
But up anoon up-on his stede bay,
And in the feld he pleyde tho leoun;
Wo was that Greek that with him mette that day. 1075
And in the toun his maner tho forth ay
So goodly was, and gat him so in grace,
That ech him lovede that loked on his face.

For he bicom the frendlyeste wight,
The gentileste, and eek the moste free, 1080
The thriftieste and oon the beste knight,
That in his tyme was, or mighte be.
Dede were his Iapes and his crueltee,
His heighe port and his manere estraunge,
And ech of tho gan for a vertu chaunge. 1085

Now lat us stinte of Troilus a stounde,
That fareth lyk a man that hurt is sore,
And is somdel of akinge of his wounde
Y-lissed wel, but heled no del more:
And, as an esy pacient, the lore 1090
Abit of him that gooth aboute his cure;
And thus he dryveth forth his aventure.

Explicit Liber Primus




BOOK II. Incipit Prohemium Secundi Libri.

Out of these blake wawes for to sayle,
O wind, O wind, the weder ginneth clere;
For in this see the boot hath swich travayle,
Of my conning, that unnethe I it stere:
This see clepe I the tempestous matere 5
Of desespeyr that Troilus was inne:
But now of hope the calendes biginne.

O lady myn, that called art Cleo,
Thou be my speed fro this forth, and my muse,
To ryme wel this book, til I have do; 10
Me nedeth here noon other art to use.
For-why to every lovere I me excuse,
That of no sentement I this endyte,
But out of Latin in my tonge it wryte.

Wherfore I nil have neither thank ne blame 15
Of al this werk, but prey yow mekely,
Disblameth me if any word be lame,
For as myn auctor seyde, so seye I.
Eek though I speke of love unfelingly,
No wondre is, for it no-thing of newe is; 20
A blind man can nat Iuggen wel in hewis.

Ye knowe eek, that in forme of speche is chaunge
With-inne a thousand yeer, and wordes tho
That hadden prys, now wonder nyce and straunge
Us thinketh hem; and yet they spake hem so, 25
And spedde as wel in love as men now do;
Eek for to winne love in sondry ages,
In sondry londes, sondry ben usages.

And for-thy if it happe in any wyse,
That here be any lovere in this place 30
That herkneth, as the storie wol devyse,
How Troilus com to his lady grace,
And thenketh, so nolde I nat love purchace,
Or wondreth on his speche or his doinge,
I noot; but it is me no wonderinge; 35

For every wight which that to Rome went,
Halt nat o path, or alwey o manere;
Eek in som lond were al the gamen shent,
If that they ferde in love as men don here,
As thus, in open doing or in chere, 40
In visitinge, in forme, or seyde hire sawes;
For-thy men seyn, ech contree hath his lawes.

Eek scarsly been ther in this place three
That han in love seid lyk and doon in al;
For to thy purpos this may lyken thee, 45
And thee right nought, yet al is seyd or shal;
Eek som men grave in tree, som in stoon wal,
As it bitit; but sin I have begonne,
Myn auctor shal I folwen, if I conne.

Exclipit prohemium Secundi Libri.


Incipit Liber Secundus.

In May, that moder is of monthes glade, 50
That fresshe floures, blewe, and whyte, and rede,
Ben quike agayn, that winter dede made,
And ful of bawme is fleting every mede;
Whan Phebus doth his brighte bemes sprede
Right in the whyte Bole, it so bitidde 55
As I shal singe, on Mayes day the thridde,

That Pandarus, for al his wyse speche,
Felt eek his part of loves shottes kene,
That, coude he never so wel of loving preche,
It made his hewe a-day ful ofte grene; 60
So shoop it, that hym fil that day a tene
In love, for which in wo to bedde he wente,
And made, er it was day, ful many a wente.

The swalwe Proigne, with a sorwful lay,
Whan morwe com, gan make hir waymentinge, 65
Why she forshapen was; and ever lay
Pandare a-bedde, half in a slomeringe,
Til she so neigh him made hir chiteringe
How Tereus gan forth hir suster take,
That with the noyse of hir he gan a-wake; 70

And gan to calle, and dresse him up to ryse,
Remembringe him his erand was to done
From Troilus, and eek his greet empryse;
And caste and knew in good plyt was the mone
To doon viage, and took his wey ful sone 75
Un-to his neces paleys ther bi-syde;
Now Ianus, god of entree, thou him gyde!

Whan he was come un-to his neces place,
`Wher is my lady? ' to hir folk seyde he;
And they him tolde; and he forth in gan pace, 80
And fond, two othere ladyes sete and she,
With-inne a paved parlour; and they three
Herden a mayden reden hem the geste
Of the Sege of Thebes, whyl hem leste.

Quod Pandarus, `Ma dame, god yow see, 85
With al your book and al the companye! '
`Ey, uncle myn, welcome y-wis,' quod she,
And up she roos, and by the hond in hye
She took him faste, and seyde, `This night thrye,
To goode mote it turne, of yow I mette! ' 90
And with that word she doun on bench him sette.

`Ye, nece, ye shal fare wel the bet,
If god wole, al this yeer,' quod Pandarus;
`But I am sory that I have yow let
To herknen of your book ye preysen thus; 95
For goddes love, what seith it? tel it us.
Is it of love? O, som good ye me lere! '
`Uncle,' quod she, `your maistresse is not here! '

With that they gonnen laughe, and tho she seyde,
`This romaunce is of Thebes, that we rede; 100
And we han herd how that king Laius deyde
Thurgh Edippus his sone, and al that dede;
And here we stenten at these lettres rede,
How the bisshop, as the book can telle,
Amphiorax, fil thurgh the ground to helle. ' 105

Quod Pandarus, `Al this knowe I my-selve,
And al the assege of Thebes and the care;
For her-of been ther maked bokes twelve: --
But lat be this, and tel me how ye fare;
Do wey your barbe, and shew your face bare; 110
Do wey your book, rys up, and lat us daunce,
And lat us don to May som observaunce. '

`A! God forbede! ' quod she. `Be ye mad?
Is that a widewes lyf, so god you save?
By god, ye maken me right sore a-drad, 115
Ye ben so wilde, it semeth as ye rave!
It sete me wel bet ay in a cave
To bidde, and rede on holy seyntes lyves;
Lat maydens gon to daunce, and yonge wyves. '

`As ever thryve I,' quod this Pandarus, 120
`Yet coude I telle a thing to doon you pleye. '
`Now, uncle dere,' quod she, `tel it us
For goddes love; is than the assege aweye?
I am of Grekes so ferd that I deye. '
`Nay, nay,' quod he, `as ever mote I thryve! 125
It is a thing wel bet than swiche fyve. '

`Ye, holy god,' quod she, `what thing is that?
What! Bet than swiche fyve? Ey, nay, y-wis!
For al this world ne can I reden what
It sholde been; som Iape, I trowe, is this; 130
And but your-selven telle us what it is,
My wit is for to arede it al to lene;
As help me god, I noot nat what ye meene. '

`And I your borow, ne never shal, for me,
This thing be told to yow, as mote I thryve! ' 135
`And why so, uncle myn? Why so? ' quod she.
`By god,' quod he, `that wole I telle as blyve;
For prouder womman were ther noon on-lyve,
And ye it wiste, in al the toun of Troye;
I iape nought, as ever have I Ioye! ' 140

Tho gan she wondren more than biforn
A thousand fold, and doun hir eyen caste;
For never, sith the tyme that she was born,
To knowe thing desired she so faste;
And with a syk she seyde him at the laste, 145
`Now, uncle myn, I nil yow nought displese,
Nor axen more, that may do yow disese. '

So after this, with many wordes glade,
And freendly tales, and with mery chere,
Of this and that they pleyde, and gunnen wade 150
In many an unkouth glad and deep matere,
As freendes doon, whan they ben met y-fere;
Til she gan axen him how Ector ferde,
That was the tounes wal and Grekes yerde.

`Ful wel, I thanke it god,' quod Pandarus, 155
`Save in his arm he hath a litel wounde;
And eek his fresshe brother Troilus,
The wyse worthy Ector the secounde,
In whom that ever vertu list abounde,
As alle trouthe and alle gentillesse, 160
Wysdom, honour, fredom, and worthinesse. '

`In good feith, eem,' quod she, `that lyketh me;
They faren wel, god save hem bothe two!
For trewely I holde it greet deyntee
A kinges sone in armes wel to do, 165
And been of good condiciouns ther-to;
For greet power and moral vertu here
Is selde y-seye in o persone y-fere. '

`In good feith, that is sooth,' quod Pandarus;
`But, by my trouthe, the king hath sones tweye, 170
That is to mene, Ector and Troilus,
That certainly, though that I sholde deye,
They been as voyde of vyces, dar I seye,
As any men that liveth under the sonne,
Hir might is wyde y-knowe, and what they conne. 175

`Of Ector nedeth it nought for to telle:
In al this world ther nis a bettre knight
Than he, that is of worthinesse welle;
And he wel more vertu hath than might.
This knoweth many a wys and worthy wight. 180
The same prys of Troilus I seye,
God help me so, I knowe not swiche tweye. '

`By god,' quod she, `of Ector that is sooth;
Of Troilus the same thing trowe I;
For, dredelees, men tellen that he dooth 185
In armes day by day so worthily,
And bereth him here at hoom so gentilly
To every wight, that al the prys hath he
Of hem that me were levest preysed be. '

`Ye sey right sooth, y-wis,' quod Pandarus; 190
`For yesterday, who-so hadde with him been,
He might have wondred up-on Troilus;
For never yet so thikke a swarm of been
Ne fleigh, as Grekes fro him gonne fleen;
And thorugh the feld, in everi wightes ere, 195
Ther nas no cry but "Troilus is there! "

`Now here, now there, he hunted hem so faste,
Ther nas but Grekes blood; and Troilus,
Now hem he hurte, and hem alle doun he caste;
Ay where he wente, it was arayed thus: 200
He was hir deeth, and sheld and lyf for us;
That as that day ther dorste noon with-stonde,
Whyl that he held his blody swerd in honde.

`Therto he is the freendlieste man
Of grete estat, that ever I saw my lyve; 205
And wher him list, best felawshipe can
To suche as him thinketh able for to thryve. '
And with that word tho Pandarus, as blyve,
He took his leve, and seyde, `I wol go henne. '
`Nay, blame have I, myn uncle,' quod she thenne. 210

`What eyleth yow to be thus wery sone,
And namelich of wommen? Wol ye so?
Nay, sitteth down; by god, I have to done
With yow, to speke of wisdom er ye go. '
And every wight that was a-boute hem tho, 215
That herde that, gan fer a-wey to stonde,
Whyl they two hadde al that hem liste in honde.

Whan that hir tale al brought was to an ende,
Of hire estat and of hir governaunce,
Quod Pandarus, `Now is it tyme I wende; 220
But yet, I seye, aryseth, lat us daunce,
And cast your widwes habit to mischaunce:
What list yow thus your-self to disfigure,
Sith yow is tid thus fair an aventure? '

`A! Wel bithought! For love of god,' quod she, 225
`Shal I not witen what ye mene of this? '
`No, this thing axeth layser,' tho quod he,
`And eek me wolde muche greve, y-wis,
If I it tolde, and ye it toke amis.
Yet were it bet my tonge for to stille 230
Than seye a sooth that were ayeins your wille.

`For, nece, by the goddesse Minerve,
And Iuppiter, that maketh the thonder ringe,
And by the blisful Venus that I serve,
Ye been the womman in this world livinge, 235
With-oute paramours, to my wittinge,
That I best love, and lothest am to greve,
And that ye witen wel your-self, I leve. '

`Y-wis, myn uncle,' quod she, `grant mercy;
Your freendship have I founden ever yit; 240
I am to no man holden trewely,
So muche as yow, and have so litel quit;
And, with the grace of god, emforth my wit,
As in my gilt I shal you never offende;
And if I have er this, I wol amende. 245

`But, for the love of god, I yow beseche,
As ye ben he that I love most and triste,
Lat be to me your fremde manere speche,
And sey to me, your nece, what yow liste:'
And with that word hir uncle anoon hir kiste, 250
And seyde, `Gladly, leve nece dere,
Tak it for good that I shal seye yow here. '

With that she gan hir eiyen doun to caste,
And Pandarus to coghe gan a lyte,
And seyde, `Nece, alwey, lo! To the laste, 255
How-so it be that som men hem delyte
With subtil art hir tales for to endyte,
Yet for al that, in hir entencioun
Hir tale is al for som conclusioun.

`And sithen thende is every tales strengthe, 260
And this matere is so bihovely,
What sholde I peynte or drawen it on lengthe
To yow, that been my freend so feithfully? '
And with that word he gan right inwardly
Biholden hir, and loken on hir face, 265
And seyde, `On suche a mirour goode grace! '

Than thoughte he thus: `If I my tale endyte
Ought hard, or make a proces any whyle,
She shal no savour han ther-in but lyte,
And trowe I wolde hir in my wil bigyle. 270
For tendre wittes wenen al be wyle
Ther-as they can nat pleynly understonde;
For-thy hir wit to serven wol I fonde --'

And loked on hir in a besy wyse,
And she was war that he byheld hir so, 275
And seyde, `Lord! So faste ye me avyse!
Sey ye me never er now? What sey ye, no? '
`Yes, yes,' quod he, `and bet wole er I go;
But, by my trouthe, I thoughte now if ye
Be fortunat, for now men shal it see. 280

`For to every wight som goodly aventure
Som tyme is shape, if he it can receyven;
And if that he wol take of it no cure,
Whan that it commeth, but wilfully it weyven,
Lo, neither cas nor fortune him deceyven, 285
But right his verray slouthe and wrecchednesse;
And swich a wight is for to blame, I gesse.

`Good aventure, O bele nece, have ye
Ful lightly founden, and ye conne it take;
And, for the love of god, and eek of me, 290
Cacche it anoon, lest aventure slake.
What sholde I lenger proces of it make?
Yif me your hond, for in this world is noon,
If that yow list, a wight so wel begoon.

`And sith I speke of good entencioun, 295
As I to yow have told wel here-biforn,
And love as wel your honour and renoun
As creature in al this world y-born;
By alle the othes that I have yow sworn,
And ye be wrooth therfore, or wene I lye, 300
Ne shal I never seen yow eft with ye.

`Beth nought agast, ne quaketh nat; wher-to?
Ne chaungeth nat for fere so your hewe;
For hardely the werste of this is do;
And though my tale as now be to yow newe, 305
Yet trist alwey, ye shal me finde trewe;
And were it thing that me thoughte unsittinge,
To yow nolde I no swiche tales bringe. '

`Now, my good eem, for goddes love, I preye,'
Quod she, `com of, and tel me what it is; 310
For bothe I am agast what ye wol seye,
And eek me longeth it to wite, y-wis.
For whether it be wel or be amis,
Say on, lat me not in this fere dwelle:'
`So wol I doon; now herkneth, I shal telle: 315

`Now, nece myn, the kinges dere sone,
The goode, wyse, worthy, fresshe, and free,
Which alwey for to do wel is his wone,
The noble Troilus, so loveth thee,
That, bot ye helpe, it wol his bane be. 320
Lo, here is al, what sholde I more seye?
Doth what yow list, to make him live or deye.

`But if ye lete him deye, I wol sterve;
Have her my trouthe, nece, I nil not lyen;
Al sholde I with this knyf my throte kerve --' 325
With that the teres braste out of his yen,
And seyde, `If that ye doon us bothe dyen,
Thus giltelees, than have ye fisshed faire;
What mende ye, though that we bothe apeyre?

`Allas! He which that is my lord so dere, 330
That trewe man, that noble gentil knight,
That nought desireth but your freendly chere,
I see him deye, ther he goth up-right,
And hasteth him, with al his fulle might,
For to be slayn, if fortune wol assente; 335
Allas! That god yow swich a beautee sente!

`If it be so that ye so cruel be,
That of his deeth yow liste nought to recche,
That is so trewe and worthy, as ye see,
No more than of a Iapere or a wrecche, 340
If ye be swich, your beautee may not strecche
To make amendes of so cruel a dede;
Avysement is good bifore the nede.

`Wo worth the faire gemme vertulees!
Wo worth that herbe also that dooth no bote! 345
Wo worth that beautee that is routhelees!
Wo worth that wight that tret ech under fote!
And ye, that been of beautee crop and rote,
If therwith-al in you ther be no routhe,
Than is it harm ye liven, by my trouthe! 350

`And also thenk wel that this is no gaude;
For me were lever, thou and I and he
Were hanged, than I sholde been his baude,
As heyghe, as men mighte on us alle y-see:
I am thyn eem, the shame were to me, 355
As wel as thee, if that I sholde assente,
Thorugh myn abet, that he thyn honour shente.

`Now understond, for I yow nought requere,
To binde yow to him thorugh no beheste,
But only that ye make him bettre chere 360
Than ye han doon er this, and more feste,
So that his lyf be saved, at the leste;
This al and som, and playnly our entente;
God help me so, I never other mente.

`Lo, this request is not but skile, y-wis, 365
Ne doute of reson, pardee, is ther noon.
I sette the worste that ye dredden this,
Men wolden wondren seen him come or goon:
Ther-ayeins answere I thus a-noon,
That every wight, but he be fool of kinde, 370
Wol deme it love of freendship in his minde.

`What? Who wol deme, though he see a man
To temple go, that he the images eteth?
Thenk eek how wel and wysly that he can
Governe him-self, that he no-thing foryeteth, 375
That, wher he cometh, he prys and thank him geteth;
And eek ther-to, he shal come here so selde,
What fors were it though al the toun behelde?

`Swich love of freendes regneth al this toun;
And wrye yow in that mantel ever-mo; 380
And god so wis be my savacioun,
As I have seyd, your beste is to do so.
But alwey, goode nece, to stinte his wo,
So lat your daunger sucred ben a lyte,
That of his deeth ye be nought for to wyte. ' 385

Criseyde, which that herde him in this wyse,
Thoughte, `I shal fele what he meneth, y-wis. '
`Now, eem,' quod she, `what wolde ye devyse?
What is your reed I sholde doon of this? '
`That is wel seyd,' quod be. `certayn, best is 390
That ye him love ayein for his lovinge,
As love for love is skilful guerdoninge.

`Thenk eek, how elde wasteth every houre
In eche of yow a party of beautee;
And therfore, er that age thee devoure, 395
Go love, for, olde, ther wol no wight of thee.
Lat this proverbe a lore un-to yow be;
"To late y-war, quod Beautee, whan it paste;"
And elde daunteth daunger at the laste.

`The kinges fool is woned to cryen loude, 400
Whan that him thinketh a womman bereth hir hye,
"So longe mote ye live, and alle proude,
Til crowes feet be growe under your ye,
And sende yow thanne a mirour in to prye
In whiche that ye may see your face a-morwe! " 405
Nece, I bidde wisshe yow no more sorwe. '

With this he stente, and caste adoun the heed,
And she bigan to breste a-wepe anoon,
And seyde, `Allas, for wo! Why nere I deed?
For of this world the feith is al agoon! 410
Allas! What sholden straunge to me doon,
Whan he, that for my beste freend I wende,
Ret me to love, and sholde it me defende?

`Allas! I wolde han trusted, doutelees,
That if that I, thurgh my disaventure, 415
Had loved other him or Achilles,
Ector, or any mannes creature,
Ye nolde han had no mercy ne mesure
On me, but alwey had me in repreve;
This false world, allas! Who may it leve? 420

`What? Is this al the Ioye and al the feste?
Is this your reed, is this my blisful cas?
Is this the verray mede of your beheste?
Is al this peynted proces seyd, allas!
Right for this fyn? O lady myn, Pallas! 425
Thou in this dredful cas for me purveye;
For so astonied am I that I deye! '

With that she gan ful sorwfully to syke;
`A! May it be no bet? ' quod Pandarus;
`By god, I shal no-more come here this wyke, 430
And god to-forn, that am mistrusted thus;
I see ful wel that ye sette lyte of us,
Or of our deeth! Allas! I woful wrecche!
Mighte he yet live, of me is nought to recche.

`O cruel god, O dispitouse Marte, 435
O Furies three of helle, on yow I crye!
So lat me never out of this hous departe,
If that I mente harm or vilanye!
But sith I see my lord mot nedes dye,
And I with him, here I me shryve, and seye 440
That wikkedly ye doon us bothe deye.

`But sith it lyketh yow that I be deed,
By Neptunus, that god is of the see,
Fro this forth shal I never eten breed
Til I myn owene herte blood may see; 445
For certayn, I wole deye as sone as he --'
And up he sterte, and on his wey he raughte,
Til she agayn him by the lappe caughte.

Criseyde, which that wel neigh starf for fere,
So as she was the ferfulleste wight 450
That mighte be, and herde eek with hir ere,
And saw the sorwful ernest of the knight,
And in his preyere eek saw noon unright,
And for the harm that mighte eek fallen more,
She gan to rewe and dredde hir wonder sore; 455

And thoughte thus, `Unhappes fallen thikke
Alday for love, and in swich maner cas,
As men ben cruel in hem-self and wikke;
And if this man slee here him-self, allas!
In my presence, it wol be no solas. 460
What men wolde of hit deme I can nat seye;
It nedeth me ful sleyly for to pleye. '

And with a sorwful syk she seyde thrye,
`A! Lord! What me is tid a sory chaunce!
For myn estat lyth in Iupartye, 465
And eek myn emes lyf lyth in balaunce;
But nathelees, with goddes governaunce,
I shal so doon, myn honour shal I kepe,
And eek his lyf;' and stinte for to wepe.

`Of harmes two, the lesse is for to chese; 470
Yet have I lever maken him good chere
In honour, than myn emes lyf to lese;
Ye seyn, ye no-thing elles me requere? '
`No, wis,' quod he, `myn owene nece dere. '
`Now wel,' quod she, `and I wol doon my peyne; 475
I shal myn herte ayeins my lust constreyne.

`But that I nil not holden him in honde,
Ne love a man, ne can I not, ne may
Ayeins my wil; but elles wol I fonde,
Myn honour sauf, plese him fro day to day; 480
Ther-to nolde I nought ones have seyd nay,
But that I dredde, as in my fantasye;
But cesse cause, ay cesseth maladye.

`And here I make a protestacioun,
That in this proces if ye depper go, 485
That certaynly, for no savacioun
Of yow, though that ye sterve bothe two,
Though al the world on o day be my fo,
Ne shal I never on him han other routhe. --'
`I graunte wel,' quod Pandare, `by my trouthe. 490

`But may I truste wel ther-to,' quod he,
`That of this thing that ye han hight me here,
Ye wol it holden trewly un-to me? '
`Ye, doutelees,' quod she, `myn uncle dere. '
`Ne that I shal han cause in this matere,' 495
Quod he, `to pleyne, or after yow to preche? '
`Why, no, parde; what nedeth more speche? '

Tho fillen they in othere tales glade,
Til at the laste, `O good eem,' quod she tho,
`For love of god, which that us bothe made, 500
Tel me how first ye wisten of his wo:
Wot noon of hit but ye? ' He seyde, `No. '
`Can he wel speke of love? ' quod she, `I preye,
Tel me, for I the bet me shal purveye. '

Tho Pandarus a litel gan to smyle, 505
And seyde, `By my trouthe, I shal yow telle.
This other day, nought gon ful longe whyle,
In-with the paleys-gardyn, by a welle,
Gan he and I wel half a day to dwelle,
Right for to speken of an ordenaunce, 510
How we the Grekes myghte disavaunce.

`Sone after that bigonne we to lepe,
And casten with our dartes to and fro,
Til at the laste he seyde he wolde slepe,
And on the gres a-doun he leyde him tho; 515
And I after gan rome to and fro
Til that I herde, as that I welk allone,
How he bigan ful wofully to grone.

`Tho gan I stalke him softely bihinde,
And sikerly, the sothe for to seyne, 520
As I can clepe ayein now to my minde,
Right thus to Love he gan him for to pleyne;
He seyde, "Lord! Have routhe up-on my peyne,
Al have I been rebel in myn entente;
Now, MEA CULPA, lord! I me repente. 525

`"O god, that at thy disposicioun
Ledest the fyn by Iuste purveyaunce,
Of every wight, my lowe confessioun
Accepte in gree, and send me swich penaunce
As lyketh thee, but from desesperaunce, 530
That may my goost departe awey fro thee,
Thou be my sheld, for thy benignitee.

`"For certes, lord, so soore hath she me wounded,
That stod in blak, with loking of hir yen,
That to myn hertes botme it is y-sounded, 535
Thorugh which I woot that I mot nedes dyen;
This is the worste, I dar me not bi-wryen;
And wel the hotter been the gledes rede,
That men hem wryen with asshen pale and dede. "

`With that he smoot his heed adoun anoon, 540
And gan to motre, I noot what, trewely.
And I with that gan stille awey to goon,
And leet ther-of as no-thing wist hadde I,
And come ayein anoon and stood him by,
And seyde, "A-wake, ye slepen al to longe; 545
It semeth nat that love dooth yow longe,

`"That slepen so that no man may yow wake.
Who sey ever or this so dul a man? "
"Ye, freend," quod he, "do ye your hedes ake
For love, and lat me liven as I can. " 550
But though that he for wo was pale and wan,
Yet made he tho as freshe a countenaunce
As though he shulde have led the newe daunce.

`This passed forth, til now, this other day,
It fel that I com roming al allone 555
Into his chaumbre, and fond how that he lay
Up-on his bed; but man so sore grone
Ne herde I never, and what that was his mone,
Ne wist I nought; for, as I was cominge,
Al sodeynly he lefte his compleyninge. 560

`Of which I took somwat suspecioun,
And neer I com, and fond he wepte sore;
And god so wis be my savacioun,
As never of thing hadde I no routhe more.
For neither with engyn, ne with no lore, 565
Unethes mighte I fro the deeth him kepe;
That yet fele I myn herte for him wepe.