No More Learning

While Highlandmen hate tools an' taxes;
While moorlan's herds like guid, fat braxies;
While terra firma, on her axis,
Diurnal turns;
Count on a friend, in faith an' practice,
In Robert Burns.




Postcript

My memory's no worth a preen;
I had amaist forgotten clean,
Ye bade me write you what they mean
By this "new-light,"
'Bout which our herds sae aft hae been
Maist like to fight.

In days when mankind were but callans
At grammar, logic, an' sic talents,
They took nae pains their speech to balance,
Or rules to gie;
But spak their thoughts in plain, braid lallans,
Like you or me.

In thae auld times, they thought the moon,
Just like a sark, or pair o' shoon,
Wore by degrees, till her last roon
Gaed past their viewin;
An' shortly after she was done
They gat a new ane.

This passed for certain, undisputed;
It ne'er cam i' their heads to doubt it,
Till chiels gat up an' wad confute it,
An' ca'd it wrang;
An' muckle din there was about it,
Baith loud an' lang.

Some herds, weel learn'd upo' the beuk,
Wad threap auld folk the thing misteuk;
For 'twas the auld moon turn'd a neuk
An' out of' sight,
An' backlins-comin to the leuk
She grew mair bright.

This was deny'd, it was affirm'd;
The herds and hissels were alarm'd
The rev'rend gray-beards rav'd an' storm'd,
That beardless laddies
Should think they better wer inform'd,
Than their auld daddies.

Frae less to mair, it gaed to sticks;
Frae words an' aiths to clours an' nicks;
An monie a fallow gat his licks,
Wi' hearty crunt;
An' some, to learn them for their tricks,
Were hang'd an' brunt.

This game was play'd in mony lands,
An' auld-light caddies bure sic hands,
That faith, the youngsters took the sands
Wi' nimble shanks;
Till lairds forbad, by strict commands,
Sic bluidy pranks.

But new-light herds gat sic a cowe,
Folk thought them ruin'd stick-an-stowe;
Till now, amaist on ev'ry knowe
Ye'll find ane plac'd;
An' some their new-light fair avow,
Just quite barefac'd.

Nae doubt the auld-light flocks are bleatin;
Their zealous herds are vex'd an' sweatin;
Mysel', I've even seen them greetin
Wi' girnin spite,
To hear the moon sae sadly lied on
By word an' write.

But shortly they will cowe the louns!
Some auld-light herds in neebor touns
Are mind't, in things they ca' balloons,
To tak a flight;
An' stay ae month amang the moons
An' see them right.

Guid observation they will gie them;
An' when the auld moon's gaun to lea'e them,
The hindmaist shaird, they'll fetch it wi' them
Just i' their pouch;
An' when the new-light billies see them,
I think they'll crouch!

Sae, ye observe that a' this clatter
Is naething but a "moonshine matter";
But tho' dull prose-folk Latin splatter
In logic tulyie,
I hope we bardies ken some better
Than mind sic brulyie.




One Night As I Did Wander

Tune--"John Anderson, my jo. "


One night as I did wander,
When corn begins to shoot,
I sat me down to ponder
Upon an auld tree root;
Auld Ayr ran by before me,
And bicker'd to the seas;
A cushat crooded o'er me,
That echoed through the braes
. . . . . . .




Tho' Cruel Fate Should Bid Us Part

Tune--"The Northern Lass. "


Tho' cruel fate should bid us part,
Far as the pole and line,
Her dear idea round my heart,
Should tenderly entwine.
Tho' mountains, rise, and deserts howl,
And oceans roar between;
Yet, dearer than my deathless soul,
I still would love my Jean.
. . . . . . .




Song--Rantin', Rovin' Robin^1

[Footnote 1: Not published by Burns. ]

Tune--"Daintie Davie. "


There was a lad was born in Kyle,
But whatna day o' whatna style,
I doubt it's hardly worth the while
To be sae nice wi' Robin.

Chor. --Robin was a rovin' boy,
Rantin', rovin', rantin', rovin',
Robin was a rovin' boy,
Rantin', rovin', Robin!

Our monarch's hindmost year but ane
Was five-and-twenty days begun^2,
'Twas then a blast o' Janwar' win'
Blew hansel in on Robin.
Robin was, &c.

[Footnote 2: January 25, 1759, the date of my
bardship's vital existence. --R. B. ]

The gossip keekit in his loof,
Quo' scho, "Wha lives will see the proof,
This waly boy will be nae coof:
I think we'll ca' him Robin. "
Robin was, &c.

"He'll hae misfortunes great an' sma',
But aye a heart aboon them a',
He'll be a credit till us a'--
We'll a' be proud o' Robin. "
Robin was, &c.

"But sure as three times three mak nine,
I see by ilka score and line,
This chap will dearly like our kin',
So leeze me on thee! Robin. "
Robin was, &c.

"Guid faith," quo', scho, "I doubt you gar
The bonie lasses lie aspar;
But twenty fauts ye may hae waur
So blessins on thee! Robin. "
Robin was, &c.




Elegy On The Death Of Robert Ruisseaux^1

Now Robin lies in his last lair,
He'll gabble rhyme, nor sing nae mair;
Cauld poverty, wi' hungry stare,
Nae mair shall fear him;
Nor anxious fear, nor cankert care,
E'er mair come near him.

To tell the truth, they seldom fash'd him,
Except the moment that they crush'd him;
For sune as chance or fate had hush'd 'em
Tho' e'er sae short.
Then wi' a rhyme or sang he lash'd 'em,
And thought it sport.

[Footnote 1: Ruisseaux is French for rivulets
or "burns," a translation of his name. ]

Tho'he was bred to kintra-wark,
And counted was baith wight and stark,
Yet that was never Robin's mark
To mak a man;
But tell him, he was learn'd and clark,
Ye roos'd him then!




Epistle To John Goldie, In Kilmarnock

Author Of The Gospel Recovered. --August, 1785

O Gowdie, terror o' the whigs,
Dread o' blackcoats and rev'rend wigs!
Sour Bigotry, on her last legs,
Girns an' looks back,
Wishing the ten Egyptian plagues
May seize you quick.

Poor gapin', glowrin' Superstition!
Wae's me, she's in a sad condition:
Fye: bring Black Jock,^1 her state physician,
To see her water;
Alas, there's ground for great suspicion
She'll ne'er get better.

Enthusiasm's past redemption,
Gane in a gallopin' consumption:
Not a' her quacks, wi' a' their gumption,
Can ever mend her;
Her feeble pulse gies strong presumption,
She'll soon surrender.

Auld Orthodoxy lang did grapple,
For every hole to get a stapple;
But now she fetches at the thrapple,
An' fights for breath;
Haste, gie her name up in the chapel,^2
Near unto death.

It's you an' Taylor^3 are the chief
To blame for a' this black mischief;

[Footnote 1: The Rev. J. Russell, Kilmarnock. --R. B. ]

[Footnote 2: Mr. Russell's Kirk. --R. B. ]

[Footnote 3: Dr. Taylor of Norwich. --R. B. ]

But, could the Lord's ain folk get leave,
A toom tar barrel
An' twa red peats wad bring relief,
And end the quarrel.

For me, my skill's but very sma',
An' skill in prose I've nane ava';
But quietlins-wise, between us twa,
Weel may you speed!
And tho' they sud your sair misca',
Ne'er fash your head.

E'en swinge the dogs, and thresh them sicker!
The mair they squeel aye chap the thicker;
And still 'mang hands a hearty bicker
O' something stout;
It gars an owthor's pulse beat quicker,
And helps his wit.

There's naething like the honest nappy;
Whare'll ye e'er see men sae happy,
Or women sonsie, saft an' sappy,
'Tween morn and morn,
As them wha like to taste the drappie,
In glass or horn?

I've seen me dazed upon a time,
I scarce could wink or see a styme;
Just ae half-mutchkin does me prime,--
Ought less is little--
Then back I rattle on the rhyme,
As gleg's a whittle.




The Holy Fair^1

A robe of seeming truth and trust
Hid crafty Observation;
And secret hung, with poison'd crust,
The dirk of Defamation:

[Footnote 1: "Holy Fair" is a common phrase in the west of Scotland
for a sacramental occasion. --R. B. ]

A mask that like the gorget show'd,
Dye-varying on the pigeon;
And for a mantle large and broad,
He wrapt him in Religion.
Hypocrisy A-La-Mode

Upon a simmer Sunday morn
When Nature's face is fair,
I walked forth to view the corn,
An' snuff the caller air.
The rising sun owre Galston muirs
Wi' glorious light was glintin;
The hares were hirplin down the furrs,
The lav'rocks they were chantin
Fu' sweet that day.

As lightsomely I glowr'd abroad,
To see a scene sae gay,
Three hizzies, early at the road,
Cam skelpin up the way.
Twa had manteeles o' dolefu' black,
But ane wi' lyart lining;
The third, that gaed a wee a-back,
Was in the fashion shining
Fu' gay that day.

The twa appear'd like sisters twin,
In feature, form, an' claes;
Their visage wither'd, lang an' thin,
An' sour as only slaes:
The third cam up, hap-stap-an'-lowp,
As light as ony lambie,
An' wi'a curchie low did stoop,
As soon as e'er she saw me,
Fu' kind that day.

Wi' bonnet aff, quoth I, "Sweet lass,
I think ye seem to ken me;
I'm sure I've seen that bonie face
But yet I canna name ye. "
Quo' she, an' laughin as she spak,
An' taks me by the han's,
"Ye, for my sake, hae gien the feck
Of a' the ten comman's
A screed some day. "

"My name is Fun--your cronie dear,
The nearest friend ye hae;
An' this is Superstitution here,
An' that's Hypocrisy.
I'm gaun to Mauchline Holy Fair,
To spend an hour in daffin:
Gin ye'll go there, yon runkl'd pair,
We will get famous laughin
At them this day. "

Quoth I, "Wi' a' my heart, I'll do't;
I'll get my Sunday's sark on,
An' meet you on the holy spot;
Faith, we'se hae fine remarkin! "
Then I gaed hame at crowdie-time,
An' soon I made me ready;
For roads were clad, frae side to side,
Wi' mony a weary body
In droves that day.

Here farmers gash, in ridin graith,
Gaed hoddin by their cotters;
There swankies young, in braw braid-claith,
Are springing owre the gutters.
The lasses, skelpin barefit, thrang,
In silks an' scarlets glitter;
Wi' sweet-milk cheese, in mony a whang,
An' farls, bak'd wi' butter,
Fu' crump that day.

When by the plate we set our nose,
Weel heaped up wi' ha'pence,
A greedy glowr black-bonnet throws,
An' we maun draw our tippence.
Then in we go to see the show:
On ev'ry side they're gath'rin;
Some carrying dails, some chairs an' stools,
An' some are busy bleth'rin
Right loud that day.

Here stands a shed to fend the show'rs,
An' screen our countra gentry;
There Racer Jess,^2 an' twa-three whores,
Are blinkin at the entry.
Here sits a raw o' tittlin jads,
Wi' heaving breast an' bare neck;
An' there a batch o' wabster lads,
Blackguarding frae Kilmarnock,
For fun this day.

Here, some are thinkin on their sins,
An' some upo' their claes;
Ane curses feet that fyl'd his shins,
Anither sighs an' prays:
On this hand sits a chosen swatch,
Wi' screwed-up, grace-proud faces;
On that a set o' chaps, at watch,
Thrang winkin on the lasses
To chairs that day.

O happy is that man, an' blest!
Nae wonder that it pride him!
Whase ain dear lass, that he likes best,
Comes clinkin down beside him!
Wi' arms repos'd on the chair back,
He sweetly does compose him;
Which, by degrees, slips round her neck,
An's loof upon her bosom,
Unkend that day.

Now a' the congregation o'er
Is silent expectation;
For Moodie^3 speels the holy door,
Wi' tidings o' damnation:

[Footnote 2: Racer Jess (d. 1813) was a half-witted daughter of
Possie Nansie. She was a great pedestrian. ]

[Footnote 3: Rev. Alexander Moodie of Riccarton. ]

Should Hornie, as in ancient days,
'Mang sons o' God present him,
The vera sight o' Moodie's face,
To 's ain het hame had sent him
Wi' fright that day.

Hear how he clears the point o' faith
Wi' rattlin and wi' thumpin!
Now meekly calm, now wild in wrath,
He's stampin, an' he's jumpin!
His lengthen'd chin, his turned-up snout,
His eldritch squeel an' gestures,
O how they fire the heart devout,
Like cantharidian plaisters
On sic a day!

But hark! the tent has chang'd its voice,
There's peace an' rest nae langer;
For a' the real judges rise,
They canna sit for anger,
Smith^4 opens out his cauld harangues,
On practice and on morals;
An' aff the godly pour in thrangs,
To gie the jars an' barrels
A lift that day.

What signifies his barren shine,
Of moral powers an' reason?
His English style, an' gesture fine
Are a' clean out o' season.
Like Socrates or Antonine,
Or some auld pagan heathen,
The moral man he does define,
But ne'er a word o' faith in
That's right that day.

In guid time comes an antidote
Against sic poison'd nostrum;
For Peebles,^5 frae the water-fit,
Ascends the holy rostrum:

[Footnote 4: Rev. George Smith of Galston. ]

[Footnote 5: Rev. Wm. Peebles of Newton-upon-Ayr. ]

See, up he's got, the word o' God,
An' meek an' mim has view'd it,
While Common-sense has taen the road,
An' aff, an' up the Cowgate^6
Fast, fast that day.

Wee Miller^7 neist the guard relieves,
An' Orthodoxy raibles,
Tho' in his heart he weel believes,
An' thinks it auld wives' fables:
But faith! the birkie wants a manse,
So, cannilie he hums them;
Altho' his carnal wit an' sense
Like hafflins-wise o'ercomes him
At times that day.

Now, butt an' ben, the change-house fills,
Wi' yill-caup commentators;
Here 's cryin out for bakes and gills,
An' there the pint-stowp clatters;
While thick an' thrang, an' loud an' lang,
Wi' logic an' wi' scripture,
They raise a din, that in the end
Is like to breed a rupture
O' wrath that day.

Leeze me on drink! it gies us mair
Than either school or college;
It kindles wit, it waukens lear,
It pangs us fou o' knowledge:
Be't whisky-gill or penny wheep,
Or ony stronger potion,
It never fails, or drinkin deep,
To kittle up our notion,
By night or day.

The lads an' lasses, blythely bent
To mind baith saul an' body,
Sit round the table, weel content,
An' steer about the toddy:

[Footnote 6: A street so called which faces the tent in
Mauchline. --R. B. ]

[Footnote 7: Rev. Alex. Miller, afterward of Kilmaurs. ]

On this ane's dress, an' that ane's leuk,
They're makin observations;
While some are cozie i' the neuk,
An' forming assignations
To meet some day.

But now the Lord's ain trumpet touts,
Till a' the hills are rairin,
And echoes back return the shouts;
Black Russell is na sparin:
His piercin words, like Highlan' swords,
Divide the joints an' marrow;
His talk o' Hell, whare devils dwell,
Our vera "sauls does harrow"
Wi' fright that day!

A vast, unbottom'd, boundless pit,
Fill'd fou o' lowin brunstane,
Whase raging flame, an' scorching heat,
Wad melt the hardest whun-stane!
The half-asleep start up wi' fear,
An' think they hear it roarin;
When presently it does appear,
'Twas but some neibor snorin
Asleep that day.

'Twad be owre lang a tale to tell,
How mony stories past;
An' how they crouded to the yill,
When they were a' dismist;
How drink gaed round, in cogs an' caups,
Amang the furms an' benches;
An' cheese an' bread, frae women's laps,
Was dealt about in lunches
An' dawds that day.

In comes a gawsie, gash guidwife,
An' sits down by the fire,
Syne draws her kebbuck an' her knife;
The lasses they are shyer:
The auld guidmen, about the grace
Frae side to side they bother;
Till some ane by his bonnet lays,
An' gies them't like a tether,
Fu' lang that day.

Waesucks! for him that gets nae lass,
Or lasses that hae naething!
Sma' need has he to say a grace,
Or melvie his braw claithing!
O wives, be mindfu' ance yoursel'
How bonie lads ye wanted;
An' dinna for a kebbuck-heel
Let lasses be affronted
On sic a day!

Now Clinkumbell, wi' rattlin tow,
Begins to jow an' croon;
Some swagger hame the best they dow,
Some wait the afternoon.
At slaps the billies halt a blink,
Till lasses strip their shoon:
Wi' faith an' hope, an' love an' drink,
They're a' in famous tune
For crack that day.

How mony hearts this day converts
O' sinners and o' lasses!
Their hearts o' stane, gin night, are gane
As saft as ony flesh is:
There's some are fou o' love divine;
There's some are fou o' brandy;
An' mony jobs that day begin,
May end in houghmagandie
Some ither day.




Third Epistle To J. Lapraik

Guid speed and furder to you, Johnie,
Guid health, hale han's, an' weather bonie;
Now, when ye're nickin down fu' cannie
The staff o' bread,
May ye ne'er want a stoup o' bran'y
To clear your head.

May Boreas never thresh your rigs,
Nor kick your rickles aff their legs,
Sendin the stuff o'er muirs an' haggs
Like drivin wrack;
But may the tapmost grain that wags
Come to the sack.

I'm bizzie, too, an' skelpin at it,
But bitter, daudin showers hae wat it;
Sae my auld stumpie pen I gat it
Wi' muckle wark,
An' took my jocteleg an whatt it,
Like ony clark.

It's now twa month that I'm your debtor,
For your braw, nameless, dateless letter,
Abusin me for harsh ill-nature
On holy men,
While deil a hair yoursel' ye're better,
But mair profane.

But let the kirk-folk ring their bells,
Let's sing about our noble sel's:
We'll cry nae jads frae heathen hills
To help, or roose us;
But browster wives an' whisky stills,
They are the muses.

Your friendship, Sir, I winna quat it,
An' if ye mak' objections at it,
Then hand in neive some day we'll knot it,
An' witness take,
An' when wi' usquabae we've wat it
It winna break.

But if the beast an' branks be spar'd
Till kye be gaun without the herd,
And a' the vittel in the yard,
An' theekit right,
I mean your ingle-side to guard
Ae winter night.

Then muse-inspirin' aqua-vitae
Shall make us baith sae blythe and witty,
Till ye forget ye're auld an' gatty,
An' be as canty
As ye were nine years less than thretty--
Sweet ane an' twenty!

But stooks are cowpit wi' the blast,
And now the sinn keeks in the west,
Then I maun rin amang the rest,
An' quat my chanter;
Sae I subscribe myself' in haste,
Yours, Rab the Ranter.




Epistle To The Rev. John M'math

Sept. 13, 1785.

Inclosing A Copy Of "Holy Willie's Prayer,"
Which He Had Requested, Sept. 17, 1785

While at the stook the shearers cow'r
To shun the bitter blaudin' show'r,
Or in gulravage rinnin scowr
To pass the time,
To you I dedicate the hour
In idle rhyme.

My musie, tir'd wi' mony a sonnet
On gown, an' ban', an' douse black bonnet,
Is grown right eerie now she's done it,
Lest they should blame her,
An' rouse their holy thunder on it
An anathem her.

I own 'twas rash, an' rather hardy,
That I, a simple, country bardie,
Should meddle wi' a pack sae sturdy,
Wha, if they ken me,
Can easy, wi' a single wordie,
Lowse hell upon me.

But I gae mad at their grimaces,
Their sighin, cantin, grace-proud faces,
Their three-mile prayers, an' half-mile graces,
Their raxin conscience,
Whase greed, revenge, an' pride disgraces
Waur nor their nonsense.

There's Gaw'n, misca'd waur than a beast,
Wha has mair honour in his breast
Than mony scores as guid's the priest
Wha sae abus'd him:
And may a bard no crack his jest
What way they've us'd him?

See him, the poor man's friend in need,
The gentleman in word an' deed--
An' shall his fame an' honour bleed
By worthless, skellums,
An' not a muse erect her head
To cowe the blellums?

O Pope, had I thy satire's darts
To gie the rascals their deserts,
I'd rip their rotten, hollow hearts,
An' tell aloud
Their jugglin hocus-pocus arts
To cheat the crowd.

God knows, I'm no the thing I should be,
Nor am I even the thing I could be,
But twenty times I rather would be
An atheist clean,
Than under gospel colours hid be
Just for a screen.

An honest man may like a glass,
An honest man may like a lass,
But mean revenge, an' malice fause
He'll still disdain,
An' then cry zeal for gospel laws,
Like some we ken.

They take religion in their mouth;
They talk o' mercy, grace, an' truth,
For what? --to gie their malice skouth
On some puir wight,
An' hunt him down, owre right and ruth,
To ruin straight.

All hail, Religion! maid divine!
Pardon a muse sae mean as mine,
Who in her rough imperfect line
Thus daurs to name thee;
To stigmatise false friends of thine
Can ne'er defame thee.

Tho' blotch't and foul wi' mony a stain,
An' far unworthy of thy train,
With trembling voice I tune my strain,
To join with those
Who boldly dare thy cause maintain
In spite of foes:

In spite o' crowds, in spite o' mobs,
In spite o' undermining jobs,
In spite o' dark banditti stabs
At worth an' merit,
By scoundrels, even wi' holy robes,
But hellish spirit.

O Ayr! my dear, my native ground,
Within thy presbyterial bound
A candid liberal band is found
Of public teachers,
As men, as Christians too, renown'd,
An' manly preachers.

Sir, in that circle you are nam'd;
Sir, in that circle you are fam'd;
An' some, by whom your doctrine's blam'd
(Which gies you honour)
Even, sir, by them your heart's esteem'd,
An' winning manner.

Pardon this freedom I have ta'en,
An' if impertinent I've been,
Impute it not, good Sir, in ane
Whase heart ne'er wrang'd ye,
But to his utmost would befriend
Ought that belang'd ye.




Second Epistle to Davie

A Brother Poet

Auld Neibour,
I'm three times doubly o'er your debtor,
For your auld-farrant, frien'ly letter;
Tho' I maun say't I doubt ye flatter,
Ye speak sae fair;
For my puir, silly, rhymin clatter
Some less maun sair.

Hale be your heart, hale be your fiddle,
Lang may your elbuck jink diddle,
To cheer you thro' the weary widdle
O' war'ly cares;
Till barins' barins kindly cuddle
Your auld grey hairs.

But Davie, lad, I'm red ye're glaikit;
I'm tauld the muse ye hae negleckit;
An, gif it's sae, ye sud by lickit
Until ye fyke;
Sic haun's as you sud ne'er be faikit,
Be hain't wha like.

For me, I'm on Parnassus' brink,
Rivin the words to gar them clink;
Whiles dazed wi' love, whiles dazed wi' drink,
Wi' jads or masons;
An' whiles, but aye owre late, I think
Braw sober lessons.

Of a' the thoughtless sons o' man,
Commen' to me the bardie clan;
Except it be some idle plan
O' rhymin clink,
The devil haet,--that I sud ban--
They ever think.

Nae thought, nae view, nae scheme o' livin,
Nae cares to gie us joy or grievin,
But just the pouchie put the neive in,
An' while ought's there,
Then, hiltie, skiltie, we gae scrievin',
An' fash nae mair.

Leeze me on rhyme! it's aye a treasure,
My chief, amaist my only pleasure;
At hame, a-fiel', at wark, or leisure,
The Muse, poor hizzie!
Tho' rough an' raploch be her measure,
She's seldom lazy.

Haud to the Muse, my daintie Davie:
The warl' may play you mony a shavie;
But for the Muse, she'll never leave ye,
Tho' e'er sae puir,
Na, even tho' limpin wi' the spavie
Frae door tae door.




Song--Young Peggy Blooms

Tune--"Loch Eroch-side.
"


Young Peggy blooms our boniest lass,
Her blush is like the morning,
The rosy dawn, the springing grass,
With early gems adorning.
Her eyes outshine the radiant beams
That gild the passing shower,
And glitter o'er the crystal streams,
And cheer each fresh'ning flower.

Her lips, more than the cherries bright,
A richer dye has graced them;
They charm th' admiring gazer's sight,
And sweetly tempt to taste them;
Her smile is as the evening mild,
When feather'd pairs are courting,
And little lambkins wanton wild,
In playful bands disporting.

Were Fortune lovely Peggy's foe,
Such sweetness would relent her;
As blooming spring unbends the brow
Of surly, savage Winter.
Detraction's eye no aim can gain,
Her winning pow'rs to lessen;
And fretful Envy grins in vain
The poison'd tooth to fasten.

Ye Pow'rs of Honour, Love, and Truth,
From ev'ry ill defend her!
Inspire the highly-favour'd youth
The destinies intend her:
Still fan the sweet connubial flame
Responsive in each bosom;
And bless the dear parental name
With many a filial blossom.




Song--Farewell To Ballochmyle

Tune--"Miss Forbe's farewell to Banff. "


The Catrine woods were yellow seen,
The flowers decay'd on Catrine lee,
Nae lav'rock sang on hillock green,
But nature sicken'd on the e'e.
Thro' faded groves Maria sang,
Hersel' in beauty's bloom the while;
And aye the wild-wood ehoes rang,
Fareweel the braes o' Ballochmyle!

Low in your wintry beds, ye flowers,
Again ye'll flourish fresh and fair;
Ye birdies dumb, in with'ring bowers,
Again ye'll charm the vocal air.
But here, alas! for me nae mair
Shall birdie charm, or floweret smile;
Fareweel the bonie banks of Ayr,
Fareweel, fareweel! sweet Ballochmyle!




Fragment--Her Flowing Locks

Her flowing locks, the raven's wing,
Adown her neck and bosom hing;
How sweet unto that breast to cling,
And round that neck entwine her!

Her lips are roses wat wi' dew,
O' what a feast her bonie mou'!
Her cheeks a mair celestial hue,
A crimson still diviner!




Halloween^1

[Footnote 1: Is thought to be a night when witches, devils,
and other mischief-making beings are abroad on their baneful
midnight errands; particularly those aerial people, the
fairies, are said on that night to hold a grand
anniversary,. --R. B. ]

The following poem will, by many readers, be well enough understood; but
for the sake of those who are unacquainted with the manners and
traditions of the country where the scene is cast, notes are added to
give some account of the principal charms and spells of that night, so
big with prophecy to the peasantry in the west of Scotland. The passion
of prying into futurity makes a striking part of the history of human
nature in its rude state, in all ages and nations; and it may be some
entertainment to a philosophic mind, if any such honour the author with
a perusal, to see the remains of it among the more unenlightened in our
own. --R. B.

Yes! let the rich deride, the proud disdain,
The simple pleasure of the lowly train;
To me more dear, congenial to my heart,
One native charm, than all the gloss of art. --Goldsmith.

Upon that night, when fairies light
On Cassilis Downans^2 dance,
Or owre the lays, in splendid blaze,
On sprightly coursers prance;
Or for Colean the rout is ta'en,
Beneath the moon's pale beams;
There, up the Cove,^3 to stray an' rove,
Amang the rocks and streams
To sport that night;

[Footnote 2: Certain little, romantic, rocky, green hills,
in the neighbourhood of the ancient seat of the Earls of
Cassilis. --R. B. ]

[Footnote 3: A noted cavern near Colean house, called the
Cove of Colean; which, as well as Cassilis Downans, is
famed, in country story, for being a favorite haunt of
fairies. --R. B. ]

Amang the bonie winding banks,
Where Doon rins, wimplin, clear;
Where Bruce^4 ance rul'd the martial ranks,
An' shook his Carrick spear;
Some merry, friendly, countra-folks
Together did convene,
To burn their nits, an' pou their stocks,
An' haud their Halloween
Fu' blythe that night.

[Footnote 4: The famous family of that name, the ancestors
of Robert, the great deliverer of his country, were Earls of
Carrick. --R. B. ]

The lasses feat, an' cleanly neat,
Mair braw than when they're fine;
Their faces blythe, fu' sweetly kythe,
Hearts leal, an' warm, an' kin':
The lads sae trig, wi' wooer-babs
Weel-knotted on their garten;
Some unco blate, an' some wi' gabs
Gar lasses' hearts gang startin
Whiles fast at night.

Then, first an' foremost, thro' the kail,
Their stocks^5 maun a' be sought ance;

[Footnote 5: The first ceremony of Halloween is pulling each
a "stock," or plant of kail. They must go out, hand in hand,
with eyes shut, and pull the first they meet with: its being
big or little, straight or crooked, is prophetic of the size
and shape of the grand object of all their spells--the
husband or wife. If any "yird," or earth, stick to the root,
that is "tocher," or fortune; and the taste of the
"custock," that is, the heart of the stem, is indicative of
the natural temper and disposition. Lastly, the stems, or,
to give them their ordinary appellation, the "runts," are
placed somewhere above the head of the door; and the
Christian names of the people whom chance brings into the
house are, according to the priority of placing the "runts,"
the names in question. --R. B. ]

They steek their een, and grape an' wale
For muckle anes, an' straught anes.
Poor hav'rel Will fell aff the drift,
An' wandered thro' the bow-kail,
An' pou't for want o' better shift
A runt was like a sow-tail
Sae bow't that night.

Then, straught or crooked, yird or nane,
They roar an' cry a' throu'ther;
The vera wee-things, toddlin, rin,
Wi' stocks out owre their shouther:
An' gif the custock's sweet or sour,
Wi' joctelegs they taste them;
Syne coziely, aboon the door,
Wi' cannie care, they've plac'd them
To lie that night.

The lassies staw frae 'mang them a',
To pou their stalks o' corn;^6
But Rab slips out, an' jinks about,
Behint the muckle thorn:
He grippit Nelly hard and fast:
Loud skirl'd a' the lasses;
But her tap-pickle maist was lost,
Whan kiutlin in the fause-house^7
Wi' him that night.

[Footnote 6: They go to the barnyard, and pull each, at
three different times, a stalk of oats. If the third stalk
wants the "top-pickle," that is, the grain at the top of the
stalk, the party in question will come to the marriage-bed
anything but a maid. --R. B. ]

[Footnote 7: When the corn is in a doubtful state, by being
too green or wet, the stack-builder, by means of old timber,
etc. , makes a large apartment in his stack, with an opening
in the side which is fairest exposed to the wind: this he
calls a "fause-house. "--R. B. ]

The auld guid-wife's weel-hoordit nits^8
Are round an' round dividend,
An' mony lads an' lasses' fates
Are there that night decided:
Some kindle couthie side by side,
And burn thegither trimly;
Some start awa wi' saucy pride,
An' jump out owre the chimlie
Fu' high that night.

[Footnote 8: Burning the nuts is a favorite charm. They name
the lad and lass to each particular nut, as they lay them in
the fire; and according as they burn quietly together, or
start from beside one another, the course and issue of the
courtship will be. --R. B. ]

Jean slips in twa, wi' tentie e'e;
Wha 'twas, she wadna tell;
But this is Jock, an' this is me,
She says in to hersel':
He bleez'd owre her, an' she owre him,
As they wad never mair part:
Till fuff! he started up the lum,
An' Jean had e'en a sair heart
To see't that night.

Poor Willie, wi' his bow-kail runt,
Was brunt wi' primsie Mallie;
An' Mary, nae doubt, took the drunt,
To be compar'd to Willie:
Mall's nit lap out, wi' pridefu' fling,
An' her ain fit, it brunt it;
While Willie lap, and swore by jing,
'Twas just the way he wanted
To be that night.

Nell had the fause-house in her min',
She pits hersel an' Rob in;
In loving bleeze they sweetly join,
Till white in ase they're sobbin:
Nell's heart was dancin at the view;
She whisper'd Rob to leuk for't:
Rob, stownlins, prie'd her bonie mou',
Fu' cozie in the neuk for't,
Unseen that night.

But Merran sat behint their backs,
Her thoughts on Andrew Bell:
She lea'es them gashin at their cracks,
An' slips out--by hersel';
She thro' the yard the nearest taks,
An' for the kiln she goes then,
An' darklins grapit for the bauks,
And in the blue-clue^9 throws then,
Right fear't that night.

[Footnote 9: Whoever would, with success, try this spell,
must strictly observe these directions: Steal out, all
alone, to the kiln, and darkling, throw into the "pot" a
clue of blue yarn; wind it in a new clue off the old one;
and, toward the latter end, something will hold the thread:
demand, "Wha hauds? " i. e. , who holds? and answer will be
returned from the kiln-pot, by naming the Christian and
surname of your future spouse. --R. B. ]

An' ay she win't, an' ay she swat--
I wat she made nae jaukin;
Till something held within the pat,
Good Lord! but she was quaukin!
But whether 'twas the deil himsel,
Or whether 'twas a bauk-en',
Or whether it was Andrew Bell,
She did na wait on talkin
To spier that night.

Wee Jenny to her graunie says,
"Will ye go wi' me, graunie?
I'll eat the apple at the glass,^10
I gat frae uncle Johnie:"
She fuff't her pipe wi' sic a lunt,
In wrath she was sae vap'rin,
She notic't na an aizle brunt
Her braw, new, worset apron
Out thro' that night.

[Footnote 10: Take a candle and go alone to a looking-glass;
eat an apple before it, and some traditions say you should
comb your hair all the time; the face of your conjungal
companion, to be, will be seen in the glass, as if peeping
over your shoulder. --R. B. ]

"Ye little skelpie-limmer's face!
I daur you try sic sportin,
As seek the foul thief ony place,
For him to spae your fortune:
Nae doubt but ye may get a sight!
Great cause ye hae to fear it;
For mony a ane has gotten a fright,
An' liv'd an' died deleerit,
On sic a night.

"Ae hairst afore the Sherra-moor,
I mind't as weel's yestreen--
I was a gilpey then, I'm sure
I was na past fyfteen:
The simmer had been cauld an' wat,
An' stuff was unco green;
An' eye a rantin kirn we gat,
An' just on Halloween
It fell that night.

"Our stibble-rig was Rab M'Graen,
A clever, sturdy fallow;
His sin gat Eppie Sim wi' wean,
That lived in Achmacalla:
He gat hemp-seed,^11 I mind it weel,
An'he made unco light o't;
But mony a day was by himsel',
He was sae sairly frighted
That vera night. "

[Footnote 11: Steal out, unperceived, and sow a handful of
hemp-seed, harrowing it with anything you can conveniently
draw after you. Repeat now and then: "Hemp-seed, I saw thee,
hemp-seed, I saw thee; and him (or her) that is to be my
true love, come after me and pou thee. " Look over your left
shoulder, and you will see the appearance of the person
invoked, in the attitude of pulling hemp. Some traditions
say, "Come after me and shaw thee," that is, show thyself;
in which case, it simply appears. Others omit the harrowing,
and say: "Come after me and harrow thee. "--R. B. ]

Then up gat fechtin Jamie Fleck,
An' he swoor by his conscience,
That he could saw hemp-seed a peck;
For it was a' but nonsense:
The auld guidman raught down the pock,
An' out a handfu' gied him;
Syne bad him slip frae' mang the folk,
Sometime when nae ane see'd him,
An' try't that night.

He marches thro' amang the stacks,
Tho' he was something sturtin;
The graip he for a harrow taks,
An' haurls at his curpin:
And ev'ry now an' then, he says,
"Hemp-seed I saw thee,
An' her that is to be my lass
Come after me, an' draw thee
As fast this night. "

He wistl'd up Lord Lennox' March
To keep his courage cherry;
Altho' his hair began to arch,
He was sae fley'd an' eerie:
Till presently he hears a squeak,
An' then a grane an' gruntle;
He by his shouther gae a keek,
An' tumbled wi' a wintle
Out-owre that night.

He roar'd a horrid murder-shout,
In dreadfu' desperation!
An' young an' auld come rinnin out,
An' hear the sad narration:
He swoor 'twas hilchin Jean M'Craw,
Or crouchie Merran Humphie--
Till stop! she trotted thro' them a';
And wha was it but grumphie
Asteer that night!

Meg fain wad to the barn gaen,
To winn three wechts o' naething;^12
But for to meet the deil her lane,
She pat but little faith in:

[Footnote 12: This charm must likewise be performed
unperceived and alone. You go to the barn, and open both
doors, taking them off the hinges, if possible; for there is
danger that the being about to appear may shut the doors,
and do you some mischief. Then take that instrument used in
winnowing the corn, which in our country dialect we call a
"wecht," and go through all the attitudes of letting down
corn against the wind. Repeat it three times, and the third
time an apparition will pass through the barn, in at the
windy door and out at the other, having both the figure in
question, and the appearance or retinue, marking the
employment or station in life. --R. B. ]

She gies the herd a pickle nits,
An' twa red cheekit apples,
To watch, while for the barn she sets,
In hopes to see Tam Kipples
That vera night.

She turns the key wi' cannie thraw,
An'owre the threshold ventures;
But first on Sawnie gies a ca',
Syne baudly in she enters:
A ratton rattl'd up the wa',
An' she cry'd Lord preserve her!
An' ran thro' midden-hole an' a',
An' pray'd wi' zeal and fervour,
Fu' fast that night.

They hoy't out Will, wi' sair advice;
They hecht him some fine braw ane;
It chanc'd the stack he faddom't thrice^13
Was timmer-propt for thrawin:
He taks a swirlie auld moss-oak
For some black, grousome carlin;
An' loot a winze, an' drew a stroke,
Till skin in blypes cam haurlin
Aff's nieves that night.

[Footnote 13: Take an opportunity of going unnoticed to a
"bear-stack," and fathom it three times round. The last
fathom of the last time you will catch in your arms the
appearance of your future conjugal yoke-fellow. --R. B. ]

A wanton widow Leezie was,
As cantie as a kittlen;
But och! that night, amang the shaws,
She gat a fearfu' settlin!
She thro' the whins, an' by the cairn,
An' owre the hill gaed scrievin;
Whare three lairds' lan's met at a burn,^14
To dip her left sark-sleeve in,
Was bent that night.

[Footnote 14: You go out, one or more (for this is a social
spell), to a south running spring, or rivulet, where "three
lairds' lands meet," and dip your left shirt sleeve. Go to
bed in sight of a fire, and hang your wet sleeve before it
to dry. Lie awake, and, some time near midnight, an
apparition, having the exact figure of the grand object in
question, will come and turn the sleeve, as if to dry the
other side of it. --R. B. ]

Whiles owre a linn the burnie plays,
As thro' the glen it wimpl't;
Whiles round a rocky scar it strays,
Whiles in a wiel it dimpl't;
Whiles glitter'd to the nightly rays,
Wi' bickerin', dancin' dazzle;
Whiles cookit undeneath the braes,
Below the spreading hazel
Unseen that night.

Amang the brachens, on the brae,
Between her an' the moon,
The deil, or else an outler quey,
Gat up an' ga'e a croon:
Poor Leezie's heart maist lap the hool;
Near lav'rock-height she jumpit,
But mist a fit, an' in the pool
Out-owre the lugs she plumpit,
Wi' a plunge that night.

In order, on the clean hearth-stane,
The luggies^15 three are ranged;
An' ev'ry time great care is ta'en
To see them duly changed:
Auld uncle John, wha wedlock's joys
Sin' Mar's-year did desire,
Because he gat the toom dish thrice,
He heav'd them on the fire
In wrath that night.

[Footnote 15: Take three dishes, put clean water in one,
foul water in another, and leave the third empty; blindfold
a person and lead him to the hearth where the dishes are
ranged; he (or she) dips the left hand; if by chance in the
clean water, the future (husband or) wife will come to the
bar of matrimony a maid; if in the foul, a widow; if in the
empty dish, it foretells, with equal certainty, no marriage
at all. It is repeated three times, and every time the
arrangement of the dishes is altered. --R. B. ]

Wi' merry sangs, an' friendly cracks,
I wat they did na weary;
And unco tales, an' funnie jokes--
Their sports were cheap an' cheery:
Till butter'd sowens,^16 wi' fragrant lunt,

[Footnote 16: Sowens, with butter instead of milk to them,
is always the Halloween Supper. --R. B. ]

Set a' their gabs a-steerin;
Syne, wi' a social glass o' strunt,
They parted aff careerin
Fu' blythe that night.




To A Mouse, On Turning Her Up In Her Nest With The Plough, November, 1785

Wee, sleekit, cow'rin, tim'rous beastie,
O, what a panic's in thy breastie!
Thou need na start awa sae hasty,
Wi' bickering brattle!
I wad be laith to rin an' chase thee,
Wi' murd'ring pattle!

I'm truly sorry man's dominion,
Has broken nature's social union,
An' justifies that ill opinion,
Which makes thee startle
At me, thy poor, earth-born companion,
An' fellow-mortal!

I doubt na, whiles, but thou may thieve;
What then? poor beastie, thou maun live!
A daimen icker in a thrave
'S a sma' request;
I'll get a blessin wi' the lave,
An' never miss't!

Thy wee bit housie, too, in ruin!
It's silly wa's the win's are strewin!
An' naething, now, to big a new ane,
O' foggage green!
An' bleak December's winds ensuin,
Baith snell an' keen!

Thou saw the fields laid bare an' waste,
An' weary winter comin fast,
An' cozie here, beneath the blast,
Thou thought to dwell--
Till crash! the cruel coulter past
Out thro' thy cell.

That wee bit heap o' leaves an' stibble,
Has cost thee mony a weary nibble!
Now thou's turn'd out, for a' thy trouble,
But house or hald,
To thole the winter's sleety dribble,
An' cranreuch cauld!

But, Mousie, thou art no thy lane,
In proving foresight may be vain;
The best-laid schemes o' mice an 'men
Gang aft agley,
An'lea'e us nought but grief an' pain,
For promis'd joy!

Still thou art blest, compar'd wi' me
The present only toucheth thee:
But, Och! I backward cast my e'e.
On prospects drear!
An' forward, tho' I canna see,
I guess an' fear!




Epitaph On John Dove, Innkeeper

Here lies Johnie Pigeon;
What was his religion?
Whae'er desires to ken,
To some other warl'
Maun follow the carl,
For here Johnie Pigeon had nane!

Strong ale was ablution,
Small beer persecution,
A dram was memento mori;
But a full-flowing bowl
Was the saving his soul,
And port was celestial glory.




Epitaph For James Smith

Lament him, Mauchline husbands a',
He aften did assist ye;
For had ye staid hale weeks awa,
Your wives they ne'er had miss'd ye.

Ye Mauchline bairns, as on ye press
To school in bands thegither,
O tread ye lightly on his grass,--
Perhaps he was your father!




Adam Armour's Prayer

Gude pity me, because I'm little!
For though I am an elf o' mettle,
An' can, like ony wabster's shuttle,
Jink there or here,
Yet, scarce as lang's a gude kail-whittle,
I'm unco queer.

An' now Thou kens our waefu' case;
For Geordie's jurr we're in disgrace,
Because we stang'd her through the place,
An' hurt her spleuchan;
For whilk we daurna show our face
Within the clachan.

An' now we're dern'd in dens and hollows,
And hunted, as was William Wallace,
Wi' constables-thae blackguard fallows,
An' sodgers baith;
But Gude preserve us frae the gallows,
That shamefu' death!

Auld grim black-bearded Geordie's sel'--
O shake him owre the mouth o' hell!
There let him hing, an' roar, an' yell
Wi' hideous din,
And if he offers to rebel,
Then heave him in.

When Death comes in wi' glimmerin blink,
An' tips auld drucken Nanse the wink,
May Sautan gie her doup a clink
Within his yett,
An' fill her up wi' brimstone drink,
Red-reekin het.

Though Jock an' hav'rel Jean are merry--
Some devil seize them in a hurry,
An' waft them in th' infernal wherry
Straught through the lake,
An' gie their hides a noble curry
Wi' oil of aik!

As for the jurr-puir worthless body!
She's got mischief enough already;
Wi' stanged hips, and buttocks bluidy
She's suffer'd sair;
But, may she wintle in a woody,
If she wh-e mair!




The Jolly Beggars: A Cantata^1

[Footnote 1: Not published by Burns. ]

Recitativo

When lyart leaves bestrow the yird,
Or wavering like the bauckie-bird,
Bedim cauld Boreas' blast;
When hailstanes drive wi' bitter skyte,
And infant frosts begin to bite,
In hoary cranreuch drest;
Ae night at e'en a merry core
O' randie, gangrel bodies,
In Poosie-Nansie's held the splore,
To drink their orra duddies;
Wi' quaffing an' laughing,
They ranted an' they sang,
Wi' jumping an' thumping,
The vera girdle rang,

First, neist the fire, in auld red rags,
Ane sat, weel brac'd wi' mealy bags,

And knapsack a' in order;
His doxy lay within his arm;
Wi' usquebae an' blankets warm
She blinkit on her sodger;
An' aye he gies the tozie drab
The tither skelpin' kiss,
While she held up her greedy gab,
Just like an aumous dish;
Ilk smack still, did crack still,
Just like a cadger's whip;
Then staggering an' swaggering
He roar'd this ditty up--




Air

Tune--"Soldier's Joy. "


I am a son of Mars who have been in many wars,
And show my cuts and scars wherever I come;
This here was for a wench, and that other in a trench,
When welcoming the French at the sound of the drum.
Lal de daudle, &c.

My 'prenticeship I past where my leader breath'd his last,
When the bloody die was cast on the heights of Abram:
and I served out my trade when the gallant game was play'd,
And the Morro low was laid at the sound of the drum.

I lastly was with Curtis among the floating batt'ries,
And there I left for witness an arm and a limb;
Yet let my country need me, with Elliot to head me,
I'd clatter on my stumps at the sound of a drum.

And now tho' I must beg, with a wooden arm and leg,
And many a tatter'd rag hanging over my bum,
I'm as happy with my wallet, my bottle, and my callet,
As when I used in scarlet to follow a drum.

What tho' with hoary locks, I must stand the winter shocks,
Beneath the woods and rocks oftentimes for a home,
When the t'other bag I sell, and the t'other bottle tell,
I could meet a troop of hell, at the sound of a drum.




Recitativo

He ended; and the kebars sheuk,
Aboon the chorus roar;
While frighted rattons backward leuk,
An' seek the benmost bore:
A fairy fiddler frae the neuk,
He skirl'd out, encore!
But up arose the martial chuck,
An' laid the loud uproar.




Air

Tune--"Sodger Laddie. "


I once was a maid, tho' I cannot tell when,
And still my delight is in proper young men;
Some one of a troop of dragoons was my daddie,
No wonder I'm fond of a sodger laddie,
Sing, lal de lal, &c.

The first of my loves was a swaggering blade,
To rattle the thundering drum was his trade;
His leg was so tight, and his cheek was so ruddy,
Transported I was with my sodger laddie.

But the godly old chaplain left him in the lurch;
The sword I forsook for the sake of the church:
He ventur'd the soul, and I risked the body,
'Twas then I proved false to my sodger laddie.

Full soon I grew sick of my sanctified sot,
The regiment at large for a husband I got;
From the gilded spontoon to the fife I was ready,
I asked no more but a sodger laddie.

But the peace it reduc'd me to beg in despair,
Till I met old boy in a Cunningham fair,
His rags regimental, they flutter'd so gaudy,
My heart it rejoic'd at a sodger laddie.

And now I have liv'd--I know not how long,
And still I can join in a cup and a song;
But whilst with both hands I can hold the glass steady,
Here's to thee, my hero, my sodger laddie.




Recitativo

Poor Merry-Andrew, in the neuk,
Sat guzzling wi' a tinkler-hizzie;
They mind't na wha the chorus teuk,
Between themselves they were sae busy:
At length, wi' drink an' courting dizzy,
He stoiter'd up an' made a face;
Then turn'd an' laid a smack on Grizzie,
Syne tun'd his pipes wi' grave grimace.




Air

Tune--"Auld Sir Symon. "


Sir Wisdom's a fool when he's fou;
Sir Knave is a fool in a session;
He's there but a 'prentice I trow,
But I am a fool by profession.

My grannie she bought me a beuk,
An' I held awa to the school;
I fear I my talent misteuk,
But what will ye hae of a fool?

For drink I would venture my neck;
A hizzie's the half of my craft;
But what could ye other expect
Of ane that's avowedly daft?

I ance was tied up like a stirk,
For civilly swearing and quaffin;
I ance was abus'd i' the kirk,
For towsing a lass i' my daffin.

Poor Andrew that tumbles for sport,
Let naebody name wi' a jeer;
There's even, I'm tauld, i' the Court
A tumbler ca'd the Premier.

Observ'd ye yon reverend lad
Mak faces to tickle the mob;
He rails at our mountebank squad,--
It's rivalship just i' the job.

And now my conclusion I'll tell,
For faith I'm confoundedly dry;
The chiel that's a fool for himsel',
Guid Lord! he's far dafter than I.




Recitativo

Then niest outspak a raucle carlin,
Wha kent fu' weel to cleek the sterlin;
For mony a pursie she had hooked,
An' had in mony a well been douked;
Her love had been a Highland laddie,
But weary fa' the waefu' woodie!
Wi' sighs an' sobs she thus began
To wail her braw John Highlandman.




Air

Tune--"O, an ye were dead, Guidman. "


A Highland lad my love was born,
The Lalland laws he held in scorn;
But he still was faithfu' to his clan,
My gallant, braw John Highlandman.




Chorus

Sing hey my braw John Highlandman!
Sing ho my braw John Highlandman!
There's not a lad in a' the lan'
Was match for my John Highlandman.